Read Sabu GALATIA 2 Bible Online

GALATIA 2 - Sabu bible

GALATIA 2

¹ Ta dhai ta henguru appa bhue ttau ne ludu, ta bhale ri ke ya la Yerusalem, hela'u-la'u nga Barnabas, jhe do nga aggo lema Titus.

²Hakku kako ya la Yerusalem rowi do alla ke pepeteleo ri Deo ma pa ya, ta do jhamma ya ta kako la ni. Jhe pa dhara hahhi lua peowu do wata do wata ke nga kattu kattu do era pa ni, ta pejhare ke ri ya ne jhara Li Hagha Dhara, do pepeke ri ya ne pa ddau-ddau do adho do Yahudi. Rowi ddhei dho ya ne lua jhagga ya, ie ta rai do uru he lohe ma dhara awe do nadhe ta parahuma weu.

³Titus do penau nga ya, no heddau do Yunani, tapulara pehahhe dho no ta pedutu lua dara ngutu ne,

⁴maji lema ta era ne ddau-ddau do dhuke ne lai do naanne. Ro do dapoharre ddau do maho dhara-dhara ma dhara kejie di, jhe pehuri-anni ta mii tuahhu he. Maho ro dhara-dhara tu ta ma kale toi ne lua balla kattu do era pa telora di taga tari do peheujhu headde ke di nga Kristus Yesus. Ne ddhei ro ta ma pebhale di la dhara muri mada do uru ne ta mii naannu ri.

⁵Tapulara bhule ledho jhi ta kerattu ie ta hudi he, penaja nga ro, rowi do ddhei jhi ta jage ne Li Hagha Dhara ne ta pee ma nga kemolo tu mu.

⁶ Maji lema ta mina harre, bhule dho ne lai-lai do wiu ne do dhuke ngati ya ri ddau-ddau do ege ta do takka pekerihi he — tu ya bhule dho ne lua pewala, do takka pekerihi ko, do adho ko, rowi Deo adho do heleo worawwu ddau.

⁷Do wala ri ngati naanne ne ddau-ddau do ege ta do takka pekerihi do na harre do ketarra ma ta do alle ke Deo pe lii pa ya, ta pepeke ne Li Hagha Dhara ne pa ddau do adho do Yahudi, hela'u lema mii do lli Deo pa Petrus, ta pepe ke ne Li Hagha Dhara ne pa do Yahudi.

⁸Rowi do alle ke pewie ri Deo pa Petrus ne lua rui nga kedi ta jadhi rasul tu do Yahudi, mina harre lema pa ya do wie ne lua rui nga kedi ta jadhi rasul tu ddau do adho do Yahudi.

⁹Yakobus, Petrus nga Yohanes, do heleo ke ro do titu mii mone bhau-mone bhata jemaat, do ketarra lema ke ri ro ta do tarra do alle ke pewie pa ya ri Deo ne tenge do petone do nadhe. Moko do pehammi ruwai ke ro nga jhi dhue nga Barnabas mii hahhi tada lua penau jhi. Moko ta pehela'u lii ke ro nga jhi; jhi kako la jhagga la telora ddau do adho do Yahudi, jhe ro pa telora do Yahudi.

¹⁰Wata hahhi we ne liami ro, mita ie ta heleo ri jhi ne ddau do kehia nga gahara. Jhe ne lai do naanne do rihi ddhei ta tao ri ya.

¹¹Ta dhaia ta dakka ke Petrus la Antiokhia, ta la lawe ke no ri ya nga teleo-teleo, rowi do hala ne do tao ri no.

¹²Pa uru-uru jhara ko no, do me jaddhi ko no ta nga'a hela'u-la'u nga tuahhu do adho do Yahudi he. Tapulara ta dhai ta dakka ne ddau-ddau pepu Yakobus, ta pejjhau-anni ke no ngati tuahhu-tuahhu do adho do Yahudi he, jhe wae dho ke no ta nga'a hela'u ri nga ro, rowi do meda'u ri ddau-ddau do ddhei mita hari-hari ddau do jhamma ta dara ngutu.

¹³Ne tuahhu-tuahhu do Yahudi he lema ta pedutu ke ta pekebhalli-anni mii Petrus le, hakku ta tao le ke Barnabas mina harre.

¹⁴Ta ngaddi ri ya ta do mina harre ne tao ro do adho do penau nga lua mola mira nga Li Hagha Dhara ne, moko ta lii ke ya pa Petrus pa hedhapa hari-hari ddau do era paanne, ”Kinga Tuahhu do mii ddau do Yahudi do muri mada ke mii ddau do Yahudi, tanga Tuahhu pa dhara awe do nadhe ddhei ri ta pehahhi ddau-ddau do wala ta muri mada mii do Yahudi?”

¹⁵Do tarra ki pedutu nga lua raa nga menynyi, jhi hedhe do Yahudi jhe adho ”ddau do adho do Yahudi do nga lubhu harro nga menyilu”.

¹⁶ Majhi lema ta mina harre, do toi ri jhi ta do ne nara ddau ta peie bhale wari nga Deo, wata ke ri lua parahajha pa Yesus Kristus, jhe adho taga tari do pekako ne uku aigama ne. Jhi le dhangnge miha do parahajha pa Yesus Kristus, mita peie bhale wari nga Deo lake jhara lua manno nga kaho jhi ne, adho taga tari do pekako ri jhi ne uku aigama. Rowi ri pekako uku aigama ne, bhule dho heddau he do nara ta peie bhale wari nga Deo.

¹⁷Do kale ke ri jhi ne loro jhara tu ta peie bhale wari nga Deo, lake jhara muri mada do peheujhu-headde nga Kristus. Tapulara kinga alle ke jhi petao ne lai do mina harre, jhe do teleo ko ma jhi ta do pee ko ma ta ”ddau-ddau do nga lubhu harro nga menyilu nga menyilu” mii ddau-ddau do adho do Yahudi he, ta do Kristus ke ne do pedhube ta tao lubhu harro nga menyilu ne? Do bhara tatu ta adho!

¹⁸Kinga jhare ke ri ya ta petito bhale wari ne loro jhara do pa dhara uku aigama Yahudi do alle pebhage pemenyalle ne ri ya, moko do teleo ke ta ya ke ne mane bbahhe nga kerupe ne uku do naanne.

¹⁹Tapulara do alla ke ya pemade penaja nga uku aigama ne — do pemade ri uku do naanne dhangnge miha — mita nara ke ya ta muri mada tu Deo. Do alle ke ya peketoe hela'u-la'u nga Kristus.

²⁰Pa awe nadhe adho ke ya ne do muri ne, tapulara Kristus ke ne do muri ne pa dhara ngi'u ya. Ne muri mada do nadhe, do pa dhara no dhe ya ne muri pa dhara awe nadhe, muri mada ri lua manno nga kaho pa Ana Deo do hajha do ddhei nga ya ne, do alle ke pejhole ne ngi'u No tu ya.

²¹Adho ke do ta pehewa'o ri ya ri ne lua ruba dhara Deo ne. Kinga lua pedu ddau nga Deo do jadhi ke ta ie bhale wari taga tari pekako ne uku aigama ne, moko ta teleo ke ta do lua made Kristus ne bhule dho ke nga guna ri!