Read Sabu GALATIA 3 Bible Online

GALATIA 3 - Sabu bible

GALATIA 3

¹Tuahhu-tuahhu, ddau-ddau do Galatia! Do dhai bhodho tarra mu! I'a dho ke ya ta do alla pelakka ri henga nadu marra? Jhara lua made Kristus pa kolo ajhu ketoe ne, do alle ke ri ya pepejhare nga dhai teleo pa mu.

²Hakko ko ri mu ta peke pa ya ne hahhi lai do nadhe. Do alle ke ri mu pehamme Henga Deo, taga tari do pekako ke ne uku aigama ne, we taga tari dhanno ne Li Hagha Dhara do ngati Deo jhe parahajha pa Kristus?

³Ta nga mu hakku mina harre ne worawwu bhodho! Do jhari ke mu ta muri mada pa dhara hahhi muri mada do wowiu nga Henga Deo, ta nga mu hakku pa dhara awe nadhe, do ddhei ta kajhe dhae ne lua keteme nga kemolo ne ri lua rui nga kedi mu miha?

⁴Ta parahuma wue he ke hari-hari ne do alla pelake ri mu he? Ta mina mii hakku parahuma!

⁵Ne wie ri Deo ne Henga No ne pa mu, jhe tao ne lua-luamadalae he patelora mu. Hakku tao ri Deo ne napoharre taga tari do pekako ne uku aigama ne ke ri mu, we taga tari do dhanno ke ri mu ne Li Hagha Dhara ne jhe parahajha pa Kristus?

⁶ Napoanne hela'u mii do hure do bhuke pa dhara Buku Lidara-Likewahhu Deo jhara lua Abraham — do mina hedhe, ”Abraham do parahajha ke pa Deo, jhe taga tari do parahajha ke no pa Deo, ta hamme he ke no ri Deo mii ddau do pemengallo dhara Deo.”

⁷ Hakku do jhamma ke mu ta tada, ta do ne ddau do petu tu ta kolo loro Abraham, ro ke ne do parahajha pa Deo.

⁸ Do ngadde ke uru ri Buku Lidara-Likewahhu Deo ta do ri Deo do boke ke ne loro jhara tu ddau-ddau do adho do Yahudi ta peie bhale wari nga Deo, kinga parahajha ro pa Deo. Li Hagha Dhara do naanne ke, ne do pepeke uru jhara pa Abraham pa lijaji do nadhe, ”Do pelake jhara au ke do ta wie ke ri Deo ne lua tarro ie nga menyarro mangngi tu hari-hari ddau pa danni raiwawa.”

⁹Abraham do parahajha ke, ta wie ke ri Deo ne lua tarro ie nga menyarro mangngi ne pa no. Mina harre lema ke hari-harai ddau do parahajha do medae ta wie ne lua tarro ie nga menyarro mangngi hela'u-la'u nga Abraham.

¹⁰ Ddau-ddau do peketoe-anni pa uku aigama, hari-hari ro do muri mada pa dha'i pereda lua unu-kolo-taddhu. Rowi pa dhara Buku Lidara-Likewahhu Deo do hure do bhuke, ”Ddau do dho mappe pa dhara pekako hari-hari ne do hure do bhuke pa dhara Buku Uku Aigama, do ta wie lua-unu-kolo-taddhu ri Deo.”

¹¹ Bhule dho heddau do nara ta peie bhale wari nga Deo ri do pekako ne uku aigama ne. Ne lai do naanne do peteleo ke pa dhara Buku Lidara-Likewahhu Deo, ”Wata ke ddau do parahajha pa Deo we, ne jadhi ta ie bhale wari ne lua pedu nga Deo, do medae ta muri!”

¹² Tapulara uku aigama adho do jhalli pa lua manno nga kaho. Pa dhara Buku Lidara-Likewahhu Deo do hure do bhuke ta do ne ddau do pekako ne uku aigama he, do medae ta muri mada ri uku do naanne ma.

¹³ Tapulara Kristus ke ne mone peballa kattu di ngati dha'i pereda lua unu kolo taddhu uku aigama ne. Ne tao ri No ne lai do naanne nga jhole ri No ne ngi'u No penappe-pekebie ri lua unu kolo taddhu ne taga di. Rowi pa dhara Buku Lidara-Likewahhu Deo do era do hure do bhuke, ”Do lua unu kolo taddhu ke ne ddau do made pa kolo ajhu ketoe ne.”

¹⁴Hakku tao ri Kristus mina harre mita ie ke ne lua tarro ie nga menyarro mangngi do jaje ri Deo ne pa Abraham ta wie lema ke pa ddau-ddau do adho do Yahudi. Jhe ri do mina harre ke di lema ne do parahajha pa Deo, nara ta hamme ne Henga do jaje ri Deo ne.

¹⁵Tuahhu-tuahhu! Rihi ie ya ta aggu lipehakku ngati lai do helodho-lodho he pa dhara muri mada. Ki tao ke ddau pepeparru pa dhara lipejaji, jhe ne lipejaji do naanne do alle ke peperue, moko bhule dho ke ie ta heddau he do nara ta bhete ri ne lipejaji do naanne, kiadho ta pebhue ri hahhi lai ri pa lipejaji do naanne.

¹⁶ Ne lijaji-lijaji Deo do tao ri Deo tu Abraham nga tu ddau kolo loro Abraham. Pa dhara Buku Lidara-Likewahhu Deo, bhule dho do bhu ke ta ”nga ddau-ddau kolo loro Abraham,” hakku ne pa petu ne do ae ddau. Ne do bhuke bhuke pa anne, wata ke, ”nga tu ddau kolo loro au,” hakku wata ke tu heddau we, tu Kristus ke.

¹⁷ Ne do pedhae ri ya pa dhe, na dhe ke: ne jaji Deo ne do alle ke petao jhe do alle ke peperue uru jhara. Ne uku aigama ne, ne wie appa ngahu tallu nguru bhue ttau ri ti naanne adho do nara ta bhe te ne lua perue lijaji do naanne nga ta pepele ne jaji Deo do naanne.

¹⁸ Ro wi kinga ne lua do wie ri Deo do naanne do peketoe-anni pa uku aigama ne, mo ko napoanne adho ke lua ruba do jaje. Tapulara taga tari do alle ke pejaje ri Deo pa Abraham, moko ta wie he ke ri Deo pa Abraham.

¹⁹Ki do mina harre ke, tu ta nga ke hakku wie ne uku aigama ne? Ne libhale ne nadhe ke: ne guna uku aigama ne wata ke tade dhai la awe dakka heddau ti kolo loro Abraham we, do pale pa dhara lijaji Deo ne pa Abraham. Ne uku aigama do naanne do pedhae ri naju-naju Deo do pelake jhara heddau ddau raiwawa.

²⁰Nah, hakku do jhamma ta era dhue bhakka, jhe itu era heddau do mone pehiri. Tapulara Deo adho do paralu nga mone pehiri, rowi do jhagge ri we No miha.

²¹Ta do petabbu ke ne uku aigama ne nga lijaji Deo? Do bhara tatu ta adho. Rowi ki do wie ke ne uku aigama ne tu ta wie muri mada pa ddau raiwawa, moko ddau raiwawa nara dho ta peie bhale wari nga Deo lake jhara uku aigama ne.

²²Tapulara pa dhara Buku Lidara-Likewahhu Deo do hure do bhuke ta do hari-hari ddau raiwawa do era pa dha'i pereda lubhu harro nga menyilu. Rowi do mina harre ke ne lua ruba dhara do jaje jhe do jhalli pa lua parahajha pa Yesus Kristus do wie ke pa ro do parahajha he.

²³Nga do dho dhai dae ne awe ne tu parahajha pa Kristus, do jage pebharra-bharra ke di ri uku aigama ne; hala dho ke di mii do bhaddo he tade dhai ta peteleo ne lua manno nga kaho ne.

²⁴Jhe ri mina harre ke, ne uku aigama ne ta jadhi ke mii mone jage di tade dhai hape ma awe dakka Kristus tu ta ma peie bhale wari di nga Deo taga tari do parahajha ke di pa Kristus.

²⁵Pa dhara awe nadhe, taga tari do dhai ke ne awe ne pa ddau raiwawa, do nara ke ta parahajha pa Kristus, moko tenge dho ke di ta jage ri, ri uku aigama ne.

²⁶Taga tari do parahajha ke mu pa Kristus, moko do heujhu headde ke mu nga No; jhe ri do mina harre ke, ta jadhi ke mu ta ana-ana ri Deo.

²⁷Hari-hari mu do alla ke pepejhiu pa dhara ngara Kristus, hakku do alla ke ri mu pehamme ne wue-wue Kristus miha pa ngi'u mu.

²⁸Pa dhara lai do nadhe adho ke do era ne lua pewala-wala ne pa telora do Yahudi nga adho do Yahudi, pa telora naannu nga ddau do balla kattu, patelora momone nga mobanni. Tuahhu he hari-hari do jadhi ta hahhi ke, taga tari Kristus Yesus.

²⁹ Ki do unu-oha ke mu ri Kristus, moko mu ke ne kolo loro Abraham. Jhe do medae ke ta hamme ri mu ne nga ne do jaje ri Deo ne.