Read Sabu GALATIA 4 Bible Online

GALATIA 4 - Sabu bible

GALATIA 4

¹Tapulara do paralu ta perue ri pa mu ri ya, jhe pa dahara nga kappi ne ko ne pemuri heddau ana mone hammi puhaka ne, do era ko ne ddau do jage jhe do pemoke hari-hari ne lua paralu no, tade dhai hape la awe do petato ne ri ama no. Ne tao pa no hala dho mii pa heddau naannu he, maji lema no ne pa petu ta mone unu ngati hari-hari puhaka do na harre.

³Mina harre lema di. Nga do dho kepai dae di do tao mii naannu he ko ke di ri henga-henga do pereda pa raiwawa do nadhe.

⁴Tapulara ta dhai le pa awe do petu-tu ne, ta pepue ke ri Deo ne Ana No ne ma danni raiwawa. Ana No ke do naanne, do metana ri heddau mobanni,

⁵ jhe do muri mada No pa dha'i pereda uku aigama, mita nara di ta jadhi ana-ana ri Deo.

⁶Taga tari mu do ana-ana ke ri Deo, ta lii ke Deo pa Henga Ana No ne ta maho la dhara ade Tuahhu he, mina harre lema ma dhara ade ya, Henga do pali, ”Ama, wo Ama ya.”

⁷Hakku, mu adho ke ta naannu ri, tapulara do ana ke. Jhe taga tari do ana ke mu ri Deo, moko do medae ke ta wie ri Deo pa mu, hari-hari ne nga we ne do pemoko ri No tu ana-ana No.

⁸Do uru he adho dae do tade Deo ri mu, jhe ri do mina harre ke hakku do jadhi mu ta naannu ri kuaha-kuaha do perihi ta mii Deo he ri mu, tapulara do pa petu ne, adho tu-tu Deo.

⁹Tapulara pa dhara awe nadhe do tade ke Deo ri mu, kiadho do rihi petu ri, do tade ke mu ri Deo. Nah, kido mina harre ma, ta nga mu hakku ddhei ri ta bhale wari la nga henga-henga raiwawa nadhe, do rogho nga keloe jhe do kehia nga gahara ri ko? Ta nga mu hakku ddhei ta penaannu-anni ri pa henga-henga do na harre?

¹⁰Pehenge ri mu ne lodho-lodho do petato he, warru-warru do petato he nga ttau-ttau do petatu he ri mu.

¹¹Do ta kepapi ne ade ya, jaga-jaga ta do ta parahuma wue he we ne lua lobho ya tu mu.

¹²Tuahhu-tuahhu! Ne do menangnge ri ya nga petarra-tarra mita ie ke mu ta jadhi mii ya le. Rowi ya lema do alla ke pejadhi mii mu le. Ngaddi dho mu ta tao hahhi hala he penaja nga ya.

¹³Do tatu ta do pe ko ma nga henge ri mu, ta nga ya pa uru jhara he, ne pepeke ne Li Hagha Dhara ne pa mu. Taga tari do nadhe ke, ta lakka ri paddha ne ke ya.

¹⁴Pa dhara awe do naanne, bhule dho mu nga lua bhege penaja nga ya, maji lema ne ngi'u ya mii hahhi ruhakku do mone-ae he tu mu. Rihi ti naanne ta ju la'a ri we mu ne hamme ya mii heddau naju Deo he, kiadho mii hamme Yesus Kristus miha.

¹⁵Do dhai mengallu dhara mu pa dhara awe do naanne. Tapulara pa dhara awe nadhe, nnai ke la mii ne lua me ngallu dhara mu do naanne? Do toi ri ya pa dhara awe naanne, kita jadhi he ne namuhi namada mu ta wuke, do ta wuke ma ri mu jhe wie pa ya.

¹⁶Adho ke pa dahara awe nadhe do ege ke ya ri mu ta mii ihi muhu he, taga tari do peteleo ri ya ne do petu ne pa mu?

¹⁷Ne ddau-ddau do wala do mina harre ne worawwu petadi ne kale mu, tapulara do nga lua pedabbho-lua pedabbho do woapa. Ne lua pedabbho ro mita nara ri ro ta pehappo ne lua pedu mu nga jhi, mita ie ke ta pedutu ro ri mu nga dhai mejhanni.

¹⁸Do ie tarra ma ta mina harre ne worawwu mejhanni, hadhi we ta pa dhara lai-lai do woie, jhe hadhi we ta do pee loro nga mina harre, bhole ta pa dhara nga era ya we hela'u-la'u nga mu.

¹⁹Wo ana-ana ya do hajha do ddhei ri ya! Pa dhara awe nadhe ne ke ya do hedui-herui taga mu. Ne ke ya do hedui mii ina do ta kehoo-dhara he. Do ta pee ma ke ya nga hedui, kinga ne wue-wue Kristus ne, adho dae do halla-anni pa dhara ngi'u mu.

²⁰Do ddhei tu-tu ke ya nadhe dhangnge ta era pa telora mu, mita nara ya ta pedai lii nga mu, nga lipedai do wala ri, rowi i'a dho ke ya ta tao ne nga ri penaja nga mu ri.

²¹Tuahhu-tuahhu do ddhei ta muri mada pa dha'i pereda uku-uku aigama, hakku ko ri mu ta dhanno ne lii ya dhe! Do ddhei ta peke ko ri ya pa mu ne nga ne do petu ne, do hure do bhuke pa dhara Buku Musa.

²² Pa ni era do bhuke ta do Abraham do nga do dhue ddau: Ina ri heddau ngati ana no he, heddau naannu, jhe heddau ri ngati ina ri ana no, heddau do balla kattu.

²³Ne ana ngati mobanni do jadhi naannu ne, do metana mii pa tima ti dhara lua ddhei ddau raiwawa. Tapulara ana ri mobanni do balla kattu ne, metana taga tari do jaje ri Deo.

²⁴Ne nadhe do nara ta peke mii lipehakku. Do dhue ddau mobanni do naharre do pehakku mii dhue lipejaji: do hahhi ne do dakka ngati Lede Sinai — do naanne do mii Hagar ke, ne ana-ana no do menata ta mii naannu.

²⁵Hakku, Hagar ke ne Lede Sinai ne, pa ihi rai Arab. No do periho ke mii rae Yerusalem nga hari-hari ddau do pee pa dhara no pa dhara awe do nadhe, do jadhi ke ta naannu.

²⁶Tapulara Yerusalem pa era do mmau do megala ne, Yerusalem do balla kattu, jhe no ke ne ina di.

²⁷ Rowi pa dhara Buku Lidara-Likewahhu Deo do hure do bhuke, ”Mengallu nge nga kehaka dhara we au, wo mobanni do kebaki, do dho ngaddi ta metana ana! Kerjhe-kewajji we jhe hodha-kelele we au do dho ngaddi ta paddha dhallu ta metana ana! Rowi ne mobanni do alla pehani ri ddau pa hedhapa he do ta nara ri ana do rihi ae ngati mobanni do muri mada nga ddau pa hedhapa no.”

²⁸Mu miha do ana-ana ke ri Deo, do pemetana ri lijaji do jaje ri Deo ne, mu do hela'u ke mii Ishak.

²⁹ Pa dhara awe naanne ana do metana taga tari lua ddhei ddau raiwawa, ta tao keriu ke pa ana do metana taga tari lua ddhei Henga Deo. Mina harre lema pa dhara awe nadhe.

³⁰ Tapulara ne nga ne do hure do bhuke pa dhara Buku Lidara-Likewahhu Deo? Pa ni do hure do bhuke mina hedhe: ”Hudhe we ne mobanni do naannu do naanne hela'u-la'u nga ana no ne, rowi ne ana ngati mobanni do naannu ne, adho ana hammi puhaka hela'u-la'u nga ana mobanni do balla kattu ne.”

³¹Hakku, Tuahhu-tuahhu, di hedhe adho ana-ana ngati mobanni do naannu ne; di ana-ana ngati mobanni do balla kattu ne.