Read Sabu EFESUS 1 Bible Online

EFESUS 1 - Sabu bible

EFESUS 1

¹ Annu-niki Deo pa Efesus, do pee nga titu halla-anni pa Kristus Yesus!

²Ya, Paulus, rasul Kristus Yesus taga ri lua ddhei Deo Ama di nga Muri di Yesus Kristus, ta wie ne lua tarro ie nga menyarro mangngi nga lua helama tona ie tu mu.

³Lua dhida nga ketutu tu Deo, Ama Muri di Yesus Kristus! No ke ne do wie di hari-hari ne lua tarro ie nga menyarro mangngi do era pa era do mmau do megala ne, taga tari do peheujhu-headde ke di nga Kristus.

⁴Uru jhara nga do dho peera dae raiwawa do nadhe, do alla ke di pepedhi ri Deo do pelake jhara Kristus do nga lua pedabbho mita ie ke di ta kemolo ta unu-oha ri No, jhe do adho ke do era ri nga lua kura nga terujha pa hedhapa No. Taga tari lua hajha nga ddhei Deo,

⁵do alle ke ri No pepetato uru jhara do pelake jhara Yesus Kristus, do ta dhede ke di ta jadhi ana-ana ri No miha. Jhe tarra naanne ke ne do ddhei ta tao ri No.

⁶Lua dhida nga kelodo tu Deo do mina harre ne worawwu kelodo, taga tari do pelake jhara Ana No do rihi hajha nga ddhei ne, do dhai tarra No ne hajha nga ddhei nga di.

⁷ Rowi, ri lua made Kristus, do peballa kattu ke di ri Deo, jhe ri do mina harre ke do teleo ke ta do alla ke pepehai-pehuba ne lubhu harro nga menyilu di.

⁸Ne tao ri No mina harre rowi do dhai tarra ne hajha nga ddhei No penaja nga di, jhe ne lua hajha nga ddhei No do naanne do dhute do hegabbhe ke ri No pa di, do tobo ri lua uku nga mmau dhara nga lua tada ne.

⁹Pedute nga lua ddhei No miha, ta peteleo ke ri Deo ne lai do wowuni ne ngati lua pedabbho No do naanne, do alla ke pepehappo ri No ta do lua pedabbho No do naanne do ta pemoke pelake jhara Kristus.

¹⁰Do mina hedhe ke ne lua pedabbho No do naanne mita ie ke hari-hari lai, ie ta do era pa era do mmau do megala mina harre lema do pa danni raiwawa do nadhe, ta jadhi hahhi nga Kristus do mii kattu. Jhe ne lai do naanne do medae ta pemoke ri Deo ki nga dhai ke ne awe ne.

¹¹Ne jhagge ri Deo hari-hari ne lai do na harre pedute nga lua ddhei No nga lihappo No ma miha. Rai tare ti petari do alla ke ri No pepidhi di, rowi ne ddhei No, mita ie ke di ta jadhi annu-niki No taga tari do peheujhu-headde ke nga Kristus.

¹²La'a we no ta di ne do petari-tari do henao pa Kristus, ne wue waje Deo rowi lua dhida nga kelodo No.

¹³Mu lema do jadhi ke ta annu-niki Deo, pa awe dhanno ri mu ne litakka Deo, Li Hagha Dhara do wie ne lua helama tona ie ne pa mu. Parahajha ke mu pa Yesus Kristus, ri do mina harre ke ta wie ke ri Deo ne tada unu-oha No ne pa mu, ne tada do naanne wala dho ke ti Henga No do jaje ri No.

¹⁴Henga do naanne ke do mii lipetakka ta do medae ri di ta hamme ne nga ne do alle pejaje ri Deo pa annu-niki No, jhe nadhe ne do peketarra pa dhara ade di ta do ta wie ri Deo ne lua balla kattu pa annu-niki No. Lua dhida nga ketutu tu Deo taga tari lua dhida nga kelodo No!

¹⁵Rowi do mina harre ke, rai tare ta rangngi ya, ta do parahajha ke mu pa Muri di Yesus, jhe do hajha do ddhei mu nga hari-hari annu-niki Deo,

¹⁶ngaddi dho ke ya ta pengaha ne hebhajha, ta peha'e kolo lii ie-ae pa Deo jhara lua mu. Do pali loro-loro ri ya ne ngara mu ki dhai ke ya ta hebhajha.

¹⁷Ne liami ya mita ie ke Deo Muri di Yesus Kristus, Ama do dhida do ketutu ne, do wie ne Henga No pa mu. Ri Henga do naanne ke ne do medae ta pejadhi mu ta mmau dhara, jhe medae ta peteleo Deo pa mu hakku nara ta tade No ri mu.

¹⁸Ne ame ri ya mita boka ke ri Deo ne penge mu mita jadi ta teleo, mita toi ke ri mu ne nga ne nara ta henao ri mu ngati Deo do alla pepedoa mu he. Mina harre lema mita toi ke ri mu mina mii ne re'a nga lale ne lua tarro ie nga menyarro mangngi do mina harre ne worawwu ga nga jhamma do pemoke ri Deo tu annu-niki No;

¹⁹jhe do mina mii ne rihi ngati ihi ne lua jhagga Deo do nga kuaha ne, do dhai tobo pa dhara di do parahajha he. Kuaha Deo do naanne ke, do mii kuaha do rihi ngati ihi ne,

²⁰ do pake ri No pa dhara pemure bhale wari Kristus ngati dhara made mada ne, jhe jhole pa No ne era mejaddhi do rihi dhida ne hela'u-la'u nga Deo pa era do mmau do megala ne.

²¹Ne era mejaddhi Kristus do naanne do dhai rihi dhida ngati era mejaddhi hari-hari mone pereda, hari-hari mone kuaha, hari-hari kattu, hari-hari tuan, nga nadu we ne do alla pewie era mejaddhi do dhida; ie ta do muri mada ko pa dhara awe nadhe mina harre lema ne do ta muri pa awe do ta medae ne hine.

²² Do pejharra ke ri Deo hari-hari ne na harre la dha'i pereda Kristus, jhe jhole Kristus pa jemaat mii kattu ngati hari-hari ne nga we.

²³Jemaat, do mii ngi'u Kristus do alle ke pepeketeme ri No do Mone peketeme hari-hari lai pa mii we ne era.