Read Sabu EFESUS 2 Bible Online

EFESUS 2 - Sabu bible

EFESUS 2

¹ Do uru he mu do made pa dhara lua pedu nga Deo taga tari do nga lubhu harro nga menyilu nga do pehihu-pejhajjhi ko mu nga lipereda-lipereda Deo.

²Pa dhara awe do naanne do pedutu ko ri mu ne lua tima-lua tima raiwawa do nadhe, napoanne ta peteleo ko, ta do pee ko ma mu nga pedhanno nga mo ne pereda do kemale pa kolo ngallu, henga do pa dhara awe do nadhe do mejaddhi pa dhara ade ddau-ddau do dho wae ta pedhanno nga Deo.

³Pa uru he, di hari-hari lema do hela'u we nga ro; do muri mada ko di pa dhara wue-wue ddau raiwawa ne, jhe tao ne nga we ne do pemengallo dhara ngi'u nga penge di. Pa dhara awe do naanne, di ddau-ddau do nappi do kebi ri kete nga bubu dhara Deo lema, hela'u-la'u mii ddau-ddau do wala he.

⁴Tapulara do dhai tarra ne ketutu lua ruba dhara Deo! Do dhai tarra No ne hajha nga ddhei nga di,

⁵hakku pa dhara nga made ko di pa dhara lua pedu nga Deo, taga tari lua pehihu pejhajjhi di, ta pemuri wari ke di ri No hela'u-la'u nga Kristus. Hakku, wata ke ri woie ade Deo we ne nara mu ta pehe lama.

⁶Taga tari do peheujhu-headde ke di nga Kristus, moko do ta pemuri bhale wari ke di ri Deo hela'u-la'u No, mita ie ke di ta pereda hela'u-la'u nga No, pa era do mmau do megala ne.

⁷Hakku tao ri Deo mina harre, mita ie ke hine, ta nara ta heleo ri ddau raiwawa mina mii ne mone-ae lua hajha nga ddhei Deo. Ne pedhelo ri Deo ne lua hajha nga ddhei No do naanne, do pelake jhara lua woie ade No penaja nga di do pedhae ri Kristus Yesus.

⁸Deo do hajha do ddhei nga mu, ri do mina harre ke hakku pehelama mu ri No taga ta ri do parahajha ke mu pa Yesus. Ne lua helama tona ie mu ne, adho dhe bhoke ngati lua wohe-la'a-rui mu miha. Naanne ngati lua ruba dhara Deo. Hakku bhule dho ie ta heddau he do nara ta lega nga wue-anni jhara lua do naanne.

¹⁰Di hedhe do woro do panynyi ri Deo, do pelake jhara Kristus Yesus, ta wore ta panynye ke ri Deo mita ie di ta tao ne lai-lai do woie do lore ke pepemoke tu di ri No.

¹¹Tuahhu-tuahhu do adho do Yahudi! Henge we ne jhara lua mu pa awe do uru he! Mu do pali ”ta ddau do dho dara ngutu”, ri do Yahudi do mengaku ne ngi'u ro ta do dara ngutu (do ne pedabbho ne, ro do alla ke penara tada do tao ri ddau raiwawa pa ngi'u ro).

¹²Pa dhara awe do naanne, adho dae mu do peheujhu-headde nga Kristus, mu ddau-rai do wala ko, do dho maho dae ta kejie annu-niki do jhujhu-do pidhi ri Deo. Hakku adho dae mu do maho la dhara lijaji do tao ri Deo nga annu-niki No he. Ne muri mada mu pa raiwawa dhe, do dho bhule nga lua henao, do muri mada nga do dho bhule Deo.

¹³Tapulara pa dhara awe nadhe, taga tari do peheujhu-headde ke mu nga Kristus Yesus, mu do pa uru he do jjhau, do hedharra-hedakka ke ri lua made Kristus.

¹⁴Rowi Kristus miha ne do mone pedhuri-pemira ne tu di. Do peheujhu-headde ke ri No, ddau-ddau do Yahudi nga ddau-ddau do adho do Yahudi ta jadhi hekejie ke. Ne tebo pewata do pa telora ro he, lua pemuhu-pelawa ne, alle ke pepemae ri Kristus nga loro jhara jhole nga pae ri No ne ngi'u No miha.

¹⁵ Uku aigama Yahudi, nga lipereda-lipereda nga hari-hari rutie-rutatta uku do naanne alle ke pepeele ri Kristus, mita ie ne dhue kejie ddau do na harre ta jadhi hekejie ddau raiwawa do wowiu, do peheujhu-headde nga No. Ri loro jhara do naanne ke ne tao ri Kristus ne lua pedhuri-pemira ne!

¹⁶ Ri lua made No pa kolo ajhu ketoe ne, ta peheujhu-hekeradde ke ri Kristus ne dhue kejie ddau do na harre, jhe pedhuri-pemira ro nga Deo, hakku ila ke ne lua pemuhu-pelawa he.

¹⁷ Jhe ri naanne ke ne dakka Kristus, tu ta ma pepeke ne Li Hagha Dhara ne jhara lua pedhuri-pemira ne pa mu, ie ta pa mu do adho do Yahudi do pa uru he do jjhau ngati Deo, mina harre lema pa do Yahudi do hedharra-hedakka nga Deo he.

¹⁸Nga pelake jhara Kristus ke, di hari-hari — ie ta do Yahudi, mina harre lema do adho do Yahudi — ri Henga do hahhi ne, nara ke ta hedharre-hedakke Ama.

¹⁹Rowi do mina harre ke, adho ke mu do maho ta ddau-rai do hewala ri, kiadho ta ddau tele ri. Pa dhara awe nadhe do hela'u-la'u ke mu ta ai-alla-annu niki Deo. Mu ana-oha pa dhara ammu nga kemali Deo ke.

²⁰Mu lema do petitu ke pa dhida era do alle pepetito ri rasul-rasul nga nabi-nabi, jhe Kristus ke mii wowadu kepue ne.

²¹No ke ne do peato nga do pera'a ne wowadu-wowadu do na harre tade jadhi ta Ammu Deo, do petone ta tu Muri we.

²²Taga tari do muri mada pa dhara heujhu-headde nga Kristus ke, mu lema do hee pa dhara ta pekaddhi hedhe hela'u-la'u nga ddau do wala he ta jadhi hewue ammu tu Deo, do paanne ke Deo ta pee nga Henga No.