Read Sabu EFESUS 3 Bible Online

EFESUS 3 - Sabu bible

EFESUS 3

¹Ri do mina harre ke, ya, Paulus, ne pemaho la dhara ammu bhaddo taga Kristus tu mu ke do adho do Yahudi he.

²Do bhara tatu ta do rangngi ke mu, ta Deo taga tari woie ade No, alle ke pe wie ne tenge do nadhe pa taga lua paralu mu ke.

³Do peteleo ke ri Deo ne lua pedabbho No nga peke pa ya. (Jhara lai do nadhe alle ke ri ya pepeteleo nga nabhabha pa dhida ne ngine ne,

⁴ jhe kina ajhe ke ri mu, do medae ke ri mu ta toi ne jhara lua Kristus do mina mii ne tade ri ya ne jhara lua No.)

⁵Pa awe do uru he, ne lai do pehune-penite do naanne, adho do ngaddi dae ta pepeke pa ddau raiwawa, tapulara pa dhara awe nadhe, alle ke pepeke ri Henga Deo pa rasul-rasul nga nabi-nabi No he.

⁶Ne lai do pehune-penite do naanne, nadhe ke: Pelake jhara Li Hagha Dhara do naanne ddau do adho do Yahudi he, do hammi le ke ne lua tarro ie nga menyarro mangngi ngati Deo, do uru he do pemoke wata ke tu do Yahudi we. Ddau-ddau do adho do Yahudi, alla ke pejadhi ta ai alla ngati ngi'u do hela'u we, jhe do hela'u-la'u ke ne hamme ne nga ne do jaje ri Deo do pelake jhara Kristus Yesus.

⁷Wie ri Deo ne lua ruba pa ya — tenge — tu ta la pelebe ne Li Hagha Dhara ne. Ne hamme ri ya ne lua ruba dhara Deo do naanne, do pelake jhara kuaha Deo do jhagga pa dhara ngi'u ya.

⁸Pa telora hari-hari annu-niki Deo, ya ke ne do dhai woapa. Maji lema ta mina harre ta wie ma ri Deo ne lua ruba dhara No do nadhe: tenge tu ta la pepeke pa ddau-ddau do adho do Yahudi ne Li Hagha Dhara jhara lua kaja nga kete'e Kristus do dho i'a ele ne;

⁹jhe mina harre lema mita ie pelake jhara ya, nara ke ta toi ri hari-hari ddau ta do mina mii Deo, Mone peera hari hewue raiwawa do nadhe, ne pekako ne lua pedabbho No, rai ti petari rai do pehune-penite ne pa raiwawa.

¹⁰Ne lua pedabbho Deo ne nadhe ke, mita pa dhara awe nadhe, pelake jhara jemaat, hari-hari do parru pereda jhara dhida nidhe ta toi ne uku nga mmau dhara Deo pa dha ra hari-hari worawwu, ie ta nenga we.

¹¹Ne tao ri Deo ne naanne do penau ke nga lua pedabbho No do peloro ne, do pekako ri No pelake jhara Yesus Kristus muri di ne.

¹²Jhe ri parahajha Kristus nga taga tari heujhu-headde nga No, do wie ke ne lua pa di ta hedharre-hedakke Deo nga lua parahajha do tobo.

¹³Rowi do mina harre ke, ne liami ya, nadhe ke: bhole kebhaddi jhara lua ne nga we ne do dhue do hape ri ya taga mu, rowi hari-hari ne napoharre tu lua ie mu.

¹⁴Rowi do mina harre ke, ta lakku rutuu ke ya pa hedhapa Ama.

¹⁵Ngati No ke hari-hari ana-oha do pa era do mmau do megala nga pa danni raiwawa ne hamme ne amma muri mada pa ro heddau-heddau.

¹⁶Hebhajha ki ie mudhe he Deo do mone rihi Wiki dhida nga kelodo ne ta maddhi pa No ta perui ne ade nga penge mu ri Henga No.

¹⁷Ki ie mudhe he taga tari do parahajha ke mu pa Kristus, Kristus ta eta-ta pee pa dhara ade mu, jhe ne muri mada mu do pejaddhe nga do pereda ri lua hajha-peddhei.

¹⁸Hebhajha ya ki ie mudhe he, hela'u-la'u nga annu-niki Deo, nara ri mu ta kanynye mina mii ne balla nga merai, mina harre lema ne dhida nga meramma ne lua ddhei Kristus,

¹⁹do dho nara ta kanynye ne meramma ne ri uku nga penge ddau raiwawa. Ki ie mudhe he ta taoi ri mu ne lua ddhei Kristus ne, jhe nara mu ta tobo ri lua amma ngi'u Deo do ke teme ne.

²⁰Jhe ri kuaha Deo do pee nga jhagga loro pa dhara ngi'u di, nara ta tao ri Deo do dhai rihi ae ri ngati ne nga do nara ta ame kiadho ta penge ri di.

²¹Do jhamma ke Deo ta pedhede-pekelodo ti hehuhu la hehuhu pa dhara jemaat, do pelake jhara Kristus Yesus. Lua dhida nga ketutu tu Deo lohe la lodho do nami mii ne! Amin.