Read Sabu EFESUS 4 Bible Online

EFESUS 4 - Sabu bible

EFESUS 4

¹Ri do mina harre ke ya — heddau do rate, do bhaddo taga tari pekako lua jhagga tu Muri — nga meggai tarra ne ami pa mu: muri mada we mu penau nga kebhue mu mii ddau do alla pepedoa ri Deo.

² Do jhamma ke mu ta era loro pa dhara lua wawa nge danni-ade, lumu nga majho, nga makka tee nga wangnge. Pedhelo we ri mu ne lua pehajha-peddhei mu pa dhara lua perabha-pedharru mu heddau nga heddau.

³La'a rui we mu nga patarra-tarra tu ta muri mada nga pedhuri-pemira, mita ie ne lua heujhu headde do peera ri Henga Deo ne, pee nga muri loro pa telora mu.

⁴Wata ke ne do era hahhi we ne ngi'u, nga hahhi we ne Henga. Mina harre lema alla ke mu pepedoa tu ta hahhi we ne lua henao do hela'u.

⁵Jhe ne do era titu wata ta heddau we ne Muri, hahhi we ne lua manno nga kaho, hahhi we ne lua pejhiu,

⁶jhe heddau we ne Deo do jadhi ta Ama ri hari-hari ddau. No ke ne Deo liru balla nga raiwawa, do jhagga pelake jhara hari-hari, nga do pereda pa dhara hari-hari.

⁷Di heddau-heddau do hamme ke heworawwu lua ruba dhara pedute nga ne nga ne do wie ri Kristus.

⁸ Pa dhara Buku Lidara-Likewahhu Deo era do hure do bhuke, ”Ta dhai No ta ha'e la era do rihi dhida ne, do nga aggu do jhajhi ae ddau do jharra pa dhara muhu; jhe wie ri No ne bhara-bhara parahe pa ddau raiwawa.”

⁹Nah, ki do lii ke ta ”do ha'e ke No” do ne pa petu ne lema do alla ke No pepuru la era do dhai rihi wawa pa danni raiwawa do nadhe.

¹⁰Jhe No do alla pepuru do naanne, No lema ke ne do alla pe ha'e tade dhai hape la era do dhai rihi dhida ne ngati hari-hari ihi liru, hakku hari hewue liru nga raiwawa do kemale ke ri No.

¹¹No ke do ”pekepala ne unupala-unupala pa ddau raiwawa”; haghe dhede ri No jadhi ta rasul, do wala ri ta nabi; do wala ri jadhi ta mone pepeke Li Hagha Dhara ne, jhe do wala he ri dhede ri No ta jadhi Guru nga bhau-bhata jemaat.

¹²Ne tao ri No ne na hedhe mita ie ke ne annu-niki Deo ta pemoko nga petu-tu, mita nara ta pekako ne lua jhagga tu Muri nga ta petito ne ngi'u Kristus.

¹³Jhe ri do mina harre ke, moko di hari-hari ta jadhi ta hahhi ke ri lua manno nga kaho do hela'u, nga lua tada do hela'u jhara lua Ana Deo ne. Jhe di ta jadhi ke ta do kepai, jhe ju tui ju keteme mii Kristus.

¹⁴Moko di adho ke ta mii naiki he ri, do peabbe la hebhakka-hebhakka ri heworawwu-heworawwu liajha ngati ddau-ddau do dhai i'a pekelakku-anni he, do pehuli peteballi ddau ri lua pote nga appi ro.

¹⁵Di adho ke do mina harre. Ne do rihi woie tu di, do jhamma ke ta pedhelo ri di ne lai-lai do petu ne, nga ade do tobo ri lua hajha nga ddhei, hakku pa dhara hari-hari lai di, ju tui ju keteme mii Kristus le do jadhi kattu ngati di.

¹⁶ Pa dhara lua hewai-hewewe No ke, hari-hari ai-alla ngati ngi'u dhe, do peato mina harre ne worawwu kenyajjhe, jhe petuwu hahhi nga hahhi ri kewahhu-kewahhu. Jhe kinga hari-hari ne nalu he do jhagga nga petu, moko hari hengi'u do medae ke ta ju, jhe jadhi ta dokepai jhe do rui ri lua pehajha-peddhei.

¹⁷Rowi do mina harre ke, pa dhara ngara Muri, nadhe ne do pale nga do ta perue ri ya: bhole muri mada mii ddau-ddau do dho tade Deo, jhe penge ne lai-lai do dho bhule nga guna he.

¹⁸Ne lua penge ro do kerabba ke. Tade dho ri ro ne muri mada do wie ri Deo ne, rowi bhule tu-tu dho ro nga lua tada nga-naga jhara lua Deo. Hakku jadhi ro ta mina harre, dakka ngati lua keti-ketinga ro ke.

¹⁹Bhule dho ke ro nga i'a mekae dhara ri, hakku ta e'e ne ddhei he ke ro ta pedutu ne lua ddhei nge nga ade ro, jhe muri mada pa dhara kenyo-langa-huka pa e'e ne ddhei ade ro he ke.

²⁰Tapulara Kristus Yesus do tade ri mu ne adho do mina harre!

²¹Do rangnge ri mu ne jhara lua No! Jhe mu mii ddau-ddau pedute No, do alla lema ke mu pe ajha jhara wue-wue Deo do era pa No.

²² Rowi do mina harre ke gi'e we ri mu ne wue-wue ddau raiwawa ne do dui ne, nga lua pedabbho muri mada do dui ne do nee pa dhara peape ri lua ddhei-lua ddhei do pehuli-peteballi ne.

²³Do jhamma ke ta pewowio hari-hari ne ade nga penge mu.

²⁴ Do jhamma ke mu ta muri mada mii ddau raiwawa do wowiu do wore-do panynye pedute nga lua pedabbho Deo; nga wue-wue do petu ne, do mola do henarru ne, nga do mmau do megala ne.

²⁵ Rowi do mina harre ke wo Tuahhu ya hari-hari, bhole pote nga appi ri we mu. Henarru we mu heddau penaja nga heddau, rowi di hari-hari do hela'u-la'u ke ta ai-alla ngati ngi'u Kristus.

²⁶ Kinga bubu dhara mu, bhole addo we ne bubu dhara mu do naanne jhe pebune mu la dhara lubhu harro nga menyilu. Bhole bubu dhara tade helodo-rai balla-bilu,

²⁷mita do dho nara Wango ne lua kehoo ta peapa ne muri mada mu.

²⁸Ddau do tima ta mena'o, do jhamma ke no ta pengaha ti mena'o ne. Ne do rihi woie tu no, do jhamma ke no ta jhagga mita nara no muri mada ri lai do mola do mira, jhe nara nara ri no ta ruba dhara nga ddau do era pa dhara lua dau nga gahara.

²⁹Kinga pedai lii mu, bhole pake lipedai-lipedai do woapa. Pake we ne lipedai-lipedai do ta perui ddau nga do ta wie loro jhara pa ddau do wala. Lipedai-lipedai do mina harre do pedubhe ne lai do woie pa ddau do dhanno.

³⁰Bhole pehedue ne ade Henga Deo. Henga do naanne lema ke do mii lipetakka ta do ne Lodho Peballa Kattu ne do medae ta dakka ke tu mu.

³¹Peila we ne lua paddha ade he ne lua takka nui-takka bubu he nga lai-lai do mina harre ri.

³² Ne do woie ne, do jhamma ke mu ta nga ade do woie ne, jhe era pa dhara lua peruba dhara heddau penaja nga heddau, jhe pehuba we heddau ri heddau, mii Deo le do alla ke pepehuba mu do pelake jhara Kristus ne.