Read Sabu EFESUS 5 Bible Online

EFESUS 5 - Sabu bible

EFESUS 5

¹Mu ke ne ana-ana do hajha do ddhei ri Deo, rowi do mina harre ke do jhamma ke mu ta la'a rui ta pedute ne telia nga tuladha Deo.

² Ne muri mada mu do jhamma ke ta wute-ta kebore ri lua pehajha peddhei, mii Kristus le ne hajha-ne ddhei nga di. Do alle ke ri No pejhole nga pae ne ngi'u No tu di, mii hahhi bhara jhula nga menahu do wwau mangngi nga do pemengallo dhara Deo.

³Mu hari-hari annu-niki Deo. Rowi do mina harre ke, ne wui-ai wui-tao do kerjhe he nga lai-lai do jhamma he, kiadho lua lala nga hopa he, adho ke do jhamma ri ta era pa telora mu. Bhole dhai ta era ri ne era jhalli pa ddau do wala tu ta lii pa mu, ta do tao ko mu ne lai-lai do mina harre.

⁴Adho lema do jhamma tu mu ta pali ne lipedai-lipedai do ra'i, do kerejhe nga do dho jhamma he. Ne do woie ne, do jhamma ke mu ta peha'e kolo lii ie-ae pa Deo.

⁵Heleo we pewoie-woie: ddau do kenyo-langa-huka, kiadho do tao lai-lai do dho jhamma, kiadho lala nga hopa (do ne wui-ai do na harre hari-hari do hela'u ke mii lua wie hu nga mejura pa ajhu nga wowadu), ddau do mina harre adho do nara ta jadhi ta ai-alla ngati annu-niki do pereda ri Kristus nga Deo.

⁶Bhole luu mu ri lipedai-lipedai do hewo'o he. Rowi ri lai-lai do na hedhe ke ne do pedubhe ne lua bubu dhara Deo penaja nga ddau-ddau do dho pedhanno nga No.

⁷Hakku bhole pakki lai nga ddau-ddao do mina harre.

⁸Mu lema do uru he do era pa dhara lua kerabba lema. Pa awe nadhe do jadhi ke mu ta annu-niki Muri, hakku ri do mina harre ke, do pa dhara teleo ke mu. Rowi do mina harre ke, do jhamma ke mu ta muri mada pa dhara teleo.

⁹Rowi ngati dhara teleo do naanne ke, ne hhau ne hari-hari worawwu wui-ai wui-tao do woie, do mola do mira pa dhara namada Deo.

¹⁰La'a rui we mu ta kale toi ne nga ne do pemengallo dhara Muri.

¹¹Bhole tao ne wui-ai wui-tao do dho bhule nga guna he, mii do tao ri ddau-ddau do pa dhara kerabba he. Ne do woie ne tu mu, do jhamma ke ri mu ta boka petengalla ne lai-lai do mina harre.

¹²(Rowi ne lai-lai do tao ri ro he do nga pewuni-wuni-anni he, ta pedae he we, do mekae ke.)

¹³Hari-hari ne nga we ne do ketarre pa dhara teleo, do me dae nga ngadde nga teleo mo.

¹⁴Rowi hari-hari do heleo nga teleo, napoanne ke ne teleo ne. Rowi do mina harre ke hakku lii, ”Kaddhi we au wo do bba'i, jhe kaddhi we ngati dhara made mada! do ta kelala ke Kristus pa mu.”

¹⁵Rowi do mina harre ke, heleo we pewoie-ie ne loro jhara muri mada mu. Bhole muri mada we mii ddau-ddau do bhodho he; muri mada we mii ddau-ddau do mmau dhara he.

¹⁶ Pake we ri mu pewoie-woie ne awe do era pa mu, rowi ne awe do nadhe, awe do apa do kerewe ke.

¹⁷Bhole bhodho we, tapulara pereha we pe woie-ie ne nga ne do ddhei Muri.

¹⁸Bhole mawo ri ei-ago, rowi ri naanne do ta peapa mu. Ne do woie ne, do jhamma ke mu ta tobo ri Henga Deo.

¹⁹ Pake we ri mu ne lii-lii ti dhara Mazmur, lilodho-lilodho lii waje Deo, pa dhara lipedai-lipedai mu. Do jhamma ke mu ta jhuka lodho nga mengallu nge nga kehaka dhara ta wue-waje Muri.

²⁰Loro-loro we nga jhara lai ne nga we mu, do jhamma ke mu ta peha'e kolo lii ie ae pa Deo Ama, pa dhara ngara Yesus Kristus Muri di.

²¹Tu ta takke pekerihe Kristus, do jhamma ke mu ta pewawa-anni heddau pa heddau.

²² Mobanni do jhamma ke ta pewawa-anni pa ddau pa hedhapa no, mii pe wawa-anni pa Muri le.

²³Rowi momone ke ne do jadhi ta kattu pa mobanni, mii Kristus lema do jadhi ta kattu pa jemaat, jhe No miha ne Duae Mone-mai Mone-golo ne tu jemaat do jadhi ta ngi'u No.

²⁴Hela'u lema mii jemaat ne pewawa-anni pa Kristus, mina harre lema pa dhara hari-hari lai do jhamma ke mobanni pa ddau pa hedhapa no.

²⁵ Momone, hajha ddhei we nga ihi-ammu au, hela'u le mii Kristus ne hajha ne ddhei penaja nga jemaat, nga jhole nga pae ne ngi'u No tu jemaat he.

²⁶Hakku tao ri Kristus mina harre, mita ie ke ri No ta pemo-pemegale ne jemaat he ri liajha do pelake jhara ei-pejhiu, mita ki alla ke pemina harre ta nara ke ri No ta jula ne jemaat he pa Deo.

²⁷Jhe ri do mina harre ke, ta petitu nga keparru ke, nga mmau nga megala ke ne jemaat he ri Kristus pa hedhapa No nga do dho bhule kura nga terujha.

²⁸Mina harre lema ke momone do jhamma ke ta hajha ta ddhei nga ihi-ammu no, do hela'u ke mii ddhei nga ngi'u no miha. (

²⁹Ngaddi dho ta era ddau do paddhu nga ngi'u no miha. Ne do tao ri no, tapiare-pelojhe nga ta jage nga menege ri no, mii Kristus le ne piare-pelojhe ne jemaat No he.

³⁰Do toi ke ri di ne napoanne, di hedhe ai-alla ngati ngi'u Kristus.)

³¹ Pa dhara Buku Lidara-Likewahhu Deo, era do hure do bhuke, ”Rowi do mina harre ke, heddau momone do medae ta hani ri no ne ama nga ina no, tu ta peheujhu-headde nga ihi-ammu no, jhe ro hari do dhue do jadhi ta hahhi ke.”

³²Ne pedabbho lilolo do naanne do dhai meramma. Jhe ri ya ta pedue ke nga lua pedu Kristus nga jemaat.

³³Tapulara ne lilolo do naanne do era lema ne lua pedu no nga mu: Do jhamma ke momone do nami we ta hajha ta ddhei nga ihi-ammu no, mii ddhei nga ngi'u no le miha, jhe do jhamma ke mobanni do nami we ta la'a rui ta takke pekerihe ne ddau pa hedhapa no.