Read Sabu EFESUS 6 Bible Online

EFESUS 6 - Sabu bible

EFESUS 6

¹ Ana-ana! Mii ddau do pedute Kristus, pedhanno we nga ina-ama mu, rowi naanne ke ne do jhamma ta tao ri mu,

² ”Takka we pekerihi ina nga ama mu” nadhe ke ne lipereda do petari-tari ngati Deo, nga lijaji,

³”Mita mengallu nge kehaka dhara nga medi melatu au pa raiwawa dhe.”

⁴ Tuahhu-tuahhu do mada ta ama. Bhole tao we au pa ana-ana au tade mina-harre worawwu, do ta peha'e ne lua bubu dhara ro. No woie, piara-peluja we ro ri lua lai kenyajjhe nga ri liajha Muri.

⁵ Tuahhu-tuahhu do jadhi ta naannu! Pedutu we ri mu nga lipereda muri mu do pa danni raiwawa do nadhe. Jhagge we ri mu ne na harre nga ade do i'a pe wawa-anni jhe do pedhanno nga do petarra-tarra mii do tao Kristus miha.

⁶Jhe bhole tao mu mina harre ki nga pa dhara nga jage ko mu, jhe wata ke mita nara lipuji ngati ddau raiwawa we. Tapulara do jhamma ke mu ta jaggha ne na harre mii naannu ri Kristus do pa dhara pedute ne ddhei Deo nga hewue nge danni-ade.

⁷Lua jhagga do jhagge ri mu mii heddau naannu ne, do jhamma ke ri mu ta jhagge nga mengallu nge nga kehaka dhara mii do ta pemoke Muri le ke ri mu, jhe adho ke ta wata pa ddau raiwawa we.

⁸Henge we, nadu we, ie ta naannu ko no, mina harre lema ddau do balla kattu, do medae ta hamme ri no ne pai-pala ngati Muri, tu lai-lai do woie, do alla petao ri no ne.

⁹ Tuahhu-tuahhu do jadhi ta muri! Do jhamma ke ta mina harre lema ne alu nga hadha mu penaja nga naannu-naannu mu. Bhole pake ne lua bhani nga karri. Henge we ri mu ta do mu lema nga naannu-naannu mu he, do hela'u-la'u ta do nga muri do heddau we, Muri do era pa era do mmau do megala ne. Adho No do ketarri worawwu ddau.

¹⁰Pa pedakka rahi, do jhamma ke mu ta rui nga kedi ri lua rui nga kedi do hamme ri mu ngati kuaha Muri, taga tari do heujhu-headde ke mu nga No.

¹¹Pake we hari-hari ne rakka nnau muhu di, do wie ri Deo he pa di, mita na ra di ta penaja nga hari-hari uku do mina harre ne worawwu i'a pelappa ngati Wango.

¹²Rowi adho di do pedhutu-pemuhu nga ddau raiwawa, tapulara pedhutu-pemuhu nga lua rui nga kedi ngati hari-hari wango do mange do bangnge ne awe do apa-do kerewe do nadhe. Do pelawa-pemuhu nga hari-hari higa henga kerabba. Henga kerabba do kemale jhara ihi liru nidhe.

¹³Rowi do mina harre ke, pa dhara awe nadhe, pake we hari-hari ne rakka nnau muhu do ngati Deo he, mita ie pa lodho apa nga kerewe dhe, nara mu ta penaja nga hari-hari lua dhutu ihi muhu-ihi lawa. Jhe ki alla ke mu pepemuhu-pelawa nga ihi muhu-ihi lawa mu hape la pedakka rahi, pee ko ma mu nga keharru-kelidu.

¹⁴ Do jhamma ke mu ta era pa dhara lua jaga nga meniga. Pake we ri mu ne lua halla-anni pa Deo ne, mii dari wake pa kelebho mu, nga lua mola mira mu ne mii bhajhu bbhahhi pa ngi'u mu.

¹⁵ Do jhamma ke ne lua pemoko-anni mu ta pepeke ne Li Hagha Dhara do nga aggu lua pedhuri-pemira nga muri mada pa dhara mengallu nge nga kehaka dhara ne do jadhi ta mii helapa mu.

¹⁶Pa awe nami we ne lua parahajha pa Muri, do mii tami he; ri lua manno nga kaho do naanne ke, ne nara ri mu ta pemade ne woana-woana kelatti-ai ngati wango.

¹⁷ Pake we ne lua helama tona-ie mu ne, mii taddhu wajha he, nga lipedai Deo mii kelewa ngati Henga Deo.

¹⁸Jhagga we ri mu hari-hari ne na harre nga hebhajha tu ami rurabha-rudharru ngati Deo. Pa awe nami we hebhajha we mu, mina mii mu ne hewai-hewewe ri Henga Deo. Do jhamma ke mu ta era loro pa dhara lua jaga nga meniga jhe bhole i'a jharra. Hebhajha we loro-loro tu hari-hari annu-niki Deo.

¹⁹Jhe hebhajha le we tu ya, mita kinga dhai ya ta pedai lii, ta wie ke pa ya ri Deo ne lipedai-lipedai do pekatta. Jhe mita ie lema nga bbharra dhallu, nara ta pepeke ne do pewune pa Li Hagha Dhara ne.

²⁰Ri Li Hagha Dhara do naanne ke ne jadhi ya ta heddau ddau pepu, jhe pa dhara awe nadhe, ne ke pa dhara ammu bhaddo. Hebhajha we, mita ie ya ta bhani ta pedai lii jhara lua Li Hagha Dhara ne, mina mii ne do jhamma ta pedai.

²¹ Tikhikus, tuahhu di nga ddau kako-kaddhi do mappe nga mejhanni pa dhara lua jhagga Muri, no ke ne do medae ta la peke pa mu, hari-hari ne jhara lai ya mita toi ri mu ne lua ngi'u nga lua jhagga ya.

²²Taga naanne ke hakku pe pue no ri ya la nga mu, tu la pika ne jhara lua jhi pa mu hari-hari, mita na ra mu ta mengallu dhara.

²³Ki ie mudhe he, Deo Ama, nga Muri di Yesus Kristus ta boka ne rujhara mita ie hari-hari jemaat ta heujhu-headde jhe pehajha-peddhei heddau nga heddau jhe halla-anni pa dhara lua parahajha pa Kristus.

²⁴Ki ie mudhe he Deo ta wie ne lua tarro ie nga menyarro mangngi pa tuahhu he hari-hari do hajha do ddhei nga Muri di Yesus Kristus nga hajha nga ddhei do dho i'a made wari. Lipelangu mahu jhi, Paulus