Read Sabu FILIPI 2 Bible Online

FILIPI 2 - Sabu bible

FILIPI 2

¹Do rui ke mu, rowi do peheujhu-headde ke mu nga Kristus. Jhe do kehaka ke ne dhara mu rowi do hajha do ddhei Kristus nga mu! Mu do hewai-hewewe ri Henga Deo, jhe mu lema do pehajha-peddhei ke heddau nga heddau.

²Nah, hakko tarra-tarra ko ri mu ta pemengallo ne dhara ya ri lai-lai do na hedhe: Muri mada we nga hewue nge danni ade ri lua pehajha-peddhei do hela'u, jhe nga lua penge do hela'u we, jhe nga lua pedabbho do hela'u we.

³Bhole jhagge we hahhi lai he taga tari pedide ri lua ddhei ta penge ngi'u miha, kiadho ta tu lua wue-anni ngi'u. Tapulara do jhamma ke mu heddau-heddau nga wawa nge danni ade ta heleo ddau do wala ta do rihi ngati ngi'u mu miha.

⁴Heleo we ne lua paralu ddau do wala; jhe bhole heleo we ne lua paralu ngi'u miha we.

⁵Do jhamma ke mu ta mii Yesus Kristus:

⁶Do ne pa petu-tu ne No do hela'u we nga Deo, tapulara parro dho ri No ne kebhue No do mii Deo ne.

⁷Walari nedo tao ri No, alla ke ri No pe golo hari-hari ne na harre ta jadhi ke mii keddau naannu. Jadhi No ta hela'u mii ddau raiwawa, jhe muri-mada mii ddau raiwawa.

⁸Pewawe ri No ne ngi'u No, jhe muri mada No pa dhara pewawa-anni pa Deo tade made — made ta ketoe peabbha-rappa pa kolo ajhu ketoe.

⁹Rowi do mina harre ke ta dhede ke No ri Deo pedhida-dhida, jhe jhole pa No ne lua higa nga kuaha do rihi mone ae ngati hari-hari lua higa nga kuaha do wala he.

¹⁰ Tu ta pekerihi Yesus, hari-hari do kemuki pa era do mmau do megala nga pa danni raiwawa, nga pa dha'i raiwawa do medae ke ta wie hu nga mejura pa No.

¹¹Hari-hari ro do medae ke ta mengaku ta Yesus Kristus ke ne Muri; jhe ri do mina harre ke ta pedhede-pekelode ke Deo Ama.

¹²Rowi do mina harre ke, wo Tuahhu-tuahhu do ddhei ri ya, do mina mii ne do pee loro pa dhara lua pedhanno nga ya, pa awe nga era ne ya pa telora mu moko rihi-rihi pa awe nga pejjhau dhe ko ya nga mu, do jhamma ke mu ta pee nga pedhanno ma nga ya. Do alla ke mu pepehelama ri Deo, rowi do mina harre ke pee we mu nga la'a rui, mita jadhi ta keteme ne lua kehaka dhara mu. Jhagge we ri mu ne lai do naanne nga takke pekerihe Deo jhe pedhanno we nga No,

¹³rowi Deo miha ne do jhagge pa dhara mu ta era lua pemoko-anni jhe nara ta pemengallo dhara Deo.

¹⁴Jhagga we hari-hari ie ta ne nga we, bhole era nga pegu-pegallo, kiadho nga peluru penyami.

¹⁵ Jhe ri do mina poharre ke, ta peteleo ke ri mu ta do mu ke ne ana-ana ri Deo, do adho ke do era nga lua kura nga terujha ri, do muri mada ke nga mola nga herannu pa telora ddau do apa do kerewe nga do nga lubhu harro nga menyilu. Jhe ki dhai ke pa awe ta pedhae ne ri mu ne lii do wie muri mada ne, do jhamma ke mu ta jadhi mii weo do kehabbha he ta pekelale ne raiwawa do nadhe, tu ro. Ki muri mada ke mu mina harre, do ta era ke ne era jhalli tu ya hine ta latta-anni jhara lua mu pa awe dakka bhale wari ne Yesus Kristus. Naanne ke ne teleo ta do lua la'a-rui ya, adho do parahuma wue, nga ne lua la'a-rui ya do era nga wue nga wila.

¹⁷Pa wue, do medae marra ya ta pemade, jhe ne raa ya do ya jadhi ke mii bhara jhula do ta pehute he pa dhida ne nga ne do ta jhole ne ri mu pa Deo, mii hahhi tada ta do parahajha ke mu pa No. Ki do tarra ma ta do jhamma ta mina harre, ta peha'e kolo lii ie ke ya tu lai do naanne jhe dutu le ya ta mengallu dhara hela'u-la'u nga mu.

¹⁸Mina harre lema do jhamma ke mu ta he la'u-la'u le ne mengallu dhara nga ya.

¹⁹Do parahajha ya ta do ri lua ruba dhara Muri Yesus, do nara ri ya ta pepue nga henginga Timotius la nga mu, mita nara ta mengallu dhara ri lii pika jhara lua mu.

²⁰Wata ke ta Timotius we miha ne ddau do hela'u penge nga ya, jhe do tarra-tarra do penge ne lua ie mu.

²¹Ne do wala he wata ke pehenge nga lua paralu ro he ke miha, adho ke lua paralu Yesus Kristus.

²²Do ngadde miha ke ri mu ne telia ne ta do Timotius do nga guna. Do tarra ta do alla ke no pewohe-la'a-rui hela'u-la'u nga ya tu ta la pelebe ne Li Hagha Dhara do ngati Deo ne. Jhi dhue do dho hala ke mii ana nga ama he.

²³Rowi do mina harre, do nga henginga ki nga toi ke ri ya mina mii ne pe dakka hine ne kewallu ya dhe, do ta pepue ke no ri ya, la nga mu.

²⁴Do parahajha ya, ta do ri lua ruba dhara Muri, ya le miha, adho ke do rihi tui ri, do medae ke ta kako la heahu mu lema.

²⁵Jhara lua tuahhu di Epafroditus do pepue ri mu ta ma rabhe ya, do rihi ie ta pepue bhale no ri ya la nga mu. Alla ke no pepenau hela'u nga ya pa dhara lua jhagga nga la'a-rui ya.

²⁶Do ddhei tu-tu ke no ta la peabu nga Tuahhu he hari-hari, jhe adho ke do ketanna ne ade no ri do rangngi ke mu ne lii, ta do paddha no.

²⁷Do petu tarra ma ta do paddha miga ta made no. Tapulara Deo do ruba dhara nga no, jhe adho ta pa no he we, tapulara pa ya lema, mita do dho rihi ya ne hedui.

²⁸Ri do mina harre ke hakku ta ju rui le ke ne lua ddhei tu ta pepue bhale no la nga mu, mita ie ri ta mengallu ne dhara mu, ki peabu ke mu nga no, jhe ne ade ya lema ta ketanna he ke.

²⁹Hakku hamme we no nga mengallu nge nga kehaka dhara ri mu mii heddau tuahhu do hela'u lua manno nga kaho. Takka we pa dhara kire hari-hari do mii no.

³⁰Tu lua jhagga Kristus, miga no ta made, do pewie ke ri no ne muri ma da no tu ta rabhe-ta dharro ya nga ngara mu.