Read Sabu FILIPI 3 Bible Online

FILIPI 3 - Sabu bible

FILIPI 3

¹Pedakka rahi, wo Tuahhu-tuahhu ya, do jhamma ke mu ta mengallu nge nga kehaka dhara taga tari do peheujhu headde ke mu nga Muri. Mejanni dho pa ya ta kebhale wari ne nga ne do alla pebhuki ri ya do uru he, rowi ne lai-lai do na harre do ie tu lua helama tona ie mu.

²Jhagga pewoie-ie ne we mu penaja nga ddau-ddau do tao lai-lai do apa do kerewe, ddau-ddau do jhamma ta pali ta ’ngaka’ he. Do pee ke ro nga meggai loro mita ie ne ddau-ddau he ta dara ngutu.

³Jhe ne pa petu ne di hedhe ddau-ddau do alla ke pe hammi lua dara ngutu do petu-petarra ne, adho ro. Wie hu nga mejura di pa Deo ri lua hewai-hewewe Henga Deo miha, jhe peha'e ri di kolo lii ie-ae rowi do muri mada ke di pa dhara heujhu-headde nga Kristus Yesus. Adho di ta peketoe-anni pa lua pemane-lua pemane do ngaddi ri namada dhe, do nara lema ya ta peketoe-anni pa lua pemane-lua pemane do na harre.

⁴Rowi kinga era ke heddau ddau do pa dhara penge no, ta do era no nga era jhalli ta peketoe-anni pa lua pemane-lua pemane do wata ke do ngadde ri namada we, moko ya rihi ri ko.

⁵ Do alle ke ya pedare ngutu pa pemuri aru lodho ko we. Ya metana mii heddau do Israel, ngati huhu Benyamin; do Ibrani ihi ya. Pa dhara lai lua pedhanno nga uku-uku aigama Yahudi, ya dhe do ngati kejie do Farisi.

⁶ Moko ta ya ri ko ne do rihi pana, hakku hudhi-peraga jhe dede-jhe merahhu ri ya ne jemaat he. Kita pekire ngati kebhihu uku aigama Yahudi, ya heddau do ie, nga adho do era nga lua kura nga terujha.

⁷Tapulara taga tari Kristus, moko hari-hari ne do ege ri ya pa do uru he, ta mii hahhi lai do wie mangngi, pa awe nadhe jadhi ke ta mii hahhi lai do wie lua ha'i nga bhangi.

⁸Adho ta lai-lai do na harre we, era ri ko do rihi tina harre, hari-hari ne nga we, do ege ke ri ya ta mii lai-lai do wata ke ta wie ne lua ha'i nga bhangi we. Ne do jadhi ta unu rowi ya pa dhara awe nadhe, do rihi ne dhida kebhue ne, ta tade Kristus Yesus, Muri ya. Taga tari Kristus ke, alla ke ri ya pegolo hari-hari ne nga we. Do ege ta merama he we ri ya hari-hari ne na harre, mita jadhi ta abo Kristus ri ya,

⁹jhe do tarra-tarra ta do heujhu-headde ke nga No. Lua pedu do woie nga Deo, adho ke do kale ri ya miha nga loro jhara ta pedute ne uku aigama ne. Pa dhara awe nadhe do nga lua pedu do woie ke ya nga Deo, taga tari do parahajha ke ya pa Kristus. Hakku ne lua pedu do woie do naanne, dakka ngati Deo, jhe do pejaddhe pa lua parahajha pa Yesus Kristus.

¹⁰Wata hahhi we do ddhei ya, mita ie ke ta tade Kristus we ri ya, jhe nara ri ya ta toi tarra pa dhara muri mada ya ne kuaha do pemure No ne ngati dhara lua made mada ne. Do ddhei le ya ta hela'u-la'u ne dhui-hape lua hedui-herui nga No, jhe jadhi ta hela'u nga No pa dhara lai lua made No.

¹¹Jhe do nga henao ri ya, ta do ya lema miha do medae ta pemure bhale wari ngati lua made mada.

¹²Lii dho ya ta do pue ke ri ya ne wue-ne wila ne, kiadho ta do keteme ke ya. Tapulara do pee ma ya nga la'a-rui ta la kajhe dhae ne bhara parahe do pemoke ri Kristus Yesus ne. Tu do naanne ke, alle ke ya perabhe ri No, jhe pejadhi ya ta unu-oha No.

¹³Do tarra, Tuahhu-tuahhu, do ne pe petu toi de dho ri ya ta do kajhe dhae ke ri ya ne bhara parahe do naanne. Tapulara we ne hahhi lai ne do toi ri ya, ta peballu ke ri ya ne nga ne do ludu he la kejhunga, jhe wohe la'a-rui tarra ya ta hudhe kajhe dhae ne nga ne do era pa hedhapa ya.

¹⁴Ri do mina harre ke, hakku pee ya nga perai loro ju la era do petuje ne la rahi do pedakka ne, mita hamme ri ya ne lua nara ne, lua muri mada do era pa era do mmau do megala ne; jhe tu lua do naanne ke ne pedoa di ri Deo, do pelake jhara Kristus Yesus.

¹⁵Di hari-hari do kepai ke pa dhara lua muri mada do pedu nga Deo, do jhamma ke di ta pedhelo ne wue do mina harre. Tapulara kinga pa telora mu, ki do era ko ne lua tada do wala, moko, do medae ma ta la pejhare lema ri Deo pa mu.

¹⁶Ta mina harre lema ne lai do nadhe, do jhamma ke ri mu ta heleo: Do jhamma ke di ta muri mada pedute nga do alle ke pepeato, do nee ke ri do petu lohe ma dhara awe do nadhe.

¹⁷ Tuahhu-tuahhu hari-hari! Pedute we ri mu ne telia nga tuladha ya. Do alla ke pewie ri jhi ne telia nga tuladha do petu pa mu, rowi do mina harre heleo we nga petu-tu ne ddau-ddau do pedutu ne telia nga tuladha jhi do na harre.

¹⁸Jhajhi wari ke ne peke ri ya pa mu, jhe pa dhara awe nadhe ta kebhale wari ke ri ya pa mu nga huti ei-namada; do ae ke ne ddau do ne muri mada ro do ta peape ne lua pedabbho lua made Kristus pa kolo ajhu ketoe ne.

¹⁹Ne muri mada ddau-ddau do mina harre, do ne pedakka ne muri ro la dhara lua apa nga kerewe ne, rowi ne deo ro wata ke lua ddhei nga ngi'u ro we miha. Lai-lai do pemekae dhara ddau we ne do pekerihi ri ro, rowi ne do penge ri ro wata ke lai-lai do pedu nga lua raiwawa nadhe he we.

²⁰Tapulara di hedhe ana-ari ngati era do mmau do megala. Do ngati ni lema ke ne do medae ta dakka ne Duae Mone-ma'i Mone-golo ne di ne. No ke ne do lore pemate-mate ne ri di.

²¹Ne ngi'u di do keloe nga do medae ta apa do nadhe, do medae ta lare ke ri Kristus, ta jadhi mii ngi'u No miha do dhida do kelodo ne. Hakku nara No ta tao mina harre, ri do nga kuaha No tu ta pejharra hari-hari ie ta ne nga we.