Read Sabu FILIPI 4 Bible Online

FILIPI 4 - Sabu bible

FILIPI 4

¹Rowi do mina harre ke wo Tuahhu-tuahhu ddhei ya, mina harre ke ne do jhamma mu ta muri mada jhe parahajha tarra-tarra pa Muri. Do ddhei tarra-tarra ke ne ade ya ta la peabu nga mu! Mu ke ne kepue lua latta-anni ya, do pemengallo dhara ya.

²Nawanni Euodia nga Nawanni Sintike! Ta ami tarra-tarra mu ri ya, mita he la'u ade mu mii ddau-ddau do hela'u lua manno nga kaho.

³Pa ihi anga-ihi anga ya he do dhai halla-anni he, ami lema ri ya mita ie Tuahhu he ta perabha-pedharru nga do dhue mobanni do na harre. Do alla ke ro pejhagga rihi me janni hela'u-la'u nga ya tu ta pepeke ne Li Hagha Dhara do ngati Deo ne, hela'u lema mii Klemen nga hari-hari ddau do wala he, do jhagga hela'u-la'u nga ya. Ne ngara-ngara ro hhai ke pa dhara Buku Ddau do Muri ne.

⁴Ki ie mudhe he, era loro mu pa dhara mengallu nge nga kehaka dhara, taga tari do muri mada ke mu pa dhara heujhu-headde nga Muri. Hewari ri ne lii ya: mengallu nge nga kehaka dhara we mu!

⁵Do jhamma ke hari-hari ddau ta heleo ne wue muri mada mu do woie nge danni ade ne. Rowi adho ke do rajja ri, do ta dakka ke Muri.

⁶Bhole kepapi penaja nga lai ne nga we. Pa dhara hari-hari lai, hebhajha we, jhe pedhae ne liami mu pa Deo. Ne nga ne do paralu mu, peke we ri loro-loro naanne pa Deo we, ri kolo lii ie-ae.

⁷Moko ne lua kehaka dhara do ngati Muri ne do dho nara ta toi ri ddau raiwawa dhe, do medae ta jage nga menege ne ade nga penge mu do peheujhu-headde nga Kristus Yesus.

⁸Pedakka rahi Tuahhu-tuahhu, ihe we ne penge mu ri lai do nga kebhue, do jhamma ta ta puji, lai-lai do petu, do dho pemekae dahara ddau, do mola do henarru, do dho pehiwo nga do woapa, do manynyi do natta nga do woie.

⁹Pekako we, ne nga ne do ajha nga do hamme ri mu ngati ya; ie ta ngati kolo lipali nga lipedai ya, mina harre lema ngati wui-ai wui-tao ya. Deo do kepue lua kehaka dhara ne, do medae ta penau-pelere nga mu.

¹⁰Pa dhara muri mada ya do peheujhu-headde nga Muri, do toi ke ri ya ne lua mengallu nge nga kehaka dhara ne, rowi ta lalla pemina harre ne worawwu tui, pa awe nadhe nara ri ke mu ta henge ya ri. Ne lua pedabbho ya, adho jhe tari do ballo ke ya ri mu; do pee ma nga heleo ya ri mu, wata ke tari do dho bhule dau ne awe tu ta pedhelo ri mu ne lua ruba dhara mu.

¹¹Ne pe ri ya ne nadhe, adho taga tari do era ke ya pa dhara lua dau nga gahara, rowi do alla ke ya pepetima-anni ta waji we ri ne nga ne do era pa ya.

¹²Do alle ke ri ya penarro ne muri mada nga do dho bhule le nga wuru ne nga-nga, jhe do ngaddi lema ke ta muri mada pa dhara lua kereja-kenata. Do toi ke ri ya ne loro jahara tu ta penaja nga lua muri mada do mina mii we; ie ta pa keruka-kerakki, mina harre lema pa dhara lua kehia nga gahara, ie ta pa dhara kereja-kenata mina harre lema pa dhara lua ddau nga gahara.

¹³Nga ri kuaha do wie ri Kristus ne pa ya, do nga lua rui nga kedi ya ta penaja nga lua do mina mii we.

¹⁴Tapulara alla ke mu peruba dhara nga ya pa dhara lua hedui-herui ya, jhe ne nga ne do tao ri mu do na harre do woie tarra.

¹⁵ Tuahhu-tuahhu do Filipi! Do toi ke ri mu miha, ta dhai ya ta pekaddhi ngati Makedonia do uru he pa awe ta jhari ta pelebe ne ri ya ne Li Hagha Dhara ne, titu wata mu ne jemaat do rabhe-do dharro ya; titu wata mu we ne do kajo hari nga ya ne lua ha'i nga mangngi ne.

¹⁶ Ta dhai ya la Tesalonika jhe do paralu ke ya nga lua ruba dhara, adho ke ta hewari he we mu ne moa lua ruba dhara tu ya.

¹⁷Napoanne, adho ke ya taga tari ddhei ta hammi lua ruba dhara he we. Ne ddhei ya, mita nara le ri ya ta heleo ne wue-wila do ta pebhue ne lua mangngi mu.

¹⁸ Hari-hari ne na harre alla ke ri ya pehammi — lakka ta do rihi ae ri ko! Hari-hari ne lua ruba dhara mu do moa tu ya he, alla ke ri ya pehammi ngati Epafroditus. Pa dhara awe nadhe, nabbu le ke hari-hari ne nga we ne lua paralu ya. Ne lua ruba dhara do ngati mu he, do dho hala ke mii wwau mangngi ngati bhara tunu nga menahu pa Deo, jhe do hamme ri Deo nga me ngallu nge nga kehaka dhara.

¹⁹Deo, do pa No ke ya ne wie hu nga mejura, do mina harre ne worawwu kaja nga kete'e pa dhara Kristus Yesus, do medae ta petobo hari-hari ne lua paralu mu.

²⁰Lua dhida nga kelodo tu Deo Ama di lodho do nami-mii ne.

²¹Pedhae we ne lipelangu ya pa hari-hari annu-niki Deo do peheujhu-headde nga Kristus Yesus. Jhe mina harre lema, hammi we ri mu ne lipelangu ngati tuahhu-tuahhu do hela'u nga ya he pa dhe.

²²Hari-hari annu-niki Deo do era pa dhara rae do nadhe, rihi-rihi lema ro he do ngati dhara rae Kehe he, do hee le nga moa lipelangu tu mu.

²³Ki ie mudhe he, Muri di Yesus Kristus ta wie ne lua tarro ie nga menyarro mangngi tu Tuahhu he hari-hari. Lipelangu jhi, Paulus nga Timotius