Read Sabu KOLOSE 2 Bible Online

KOLOSE 2 - Sabu bible

KOLOSE 2

¹Do ddhei ya ta toi ri mu ne lua dhai petadi ya tu mu nga tu ro do pa Laodikia nga tu ro hari-hari do dho penajha tanga mada dae nga ya.

²Hari-hari ne na hedhe ne tao ri ya, mita rui ke ne ade ro, jhe nara ro ta pehajha-peddai heddau nga heddau, jhe nara ta bharra nga woie ne lua heujhu-headde ro. Jhe ri do mina harre ke, ta nara ke ri ro ta ketarra-tarra ne nga ne do ketarra ri ro he, jhe nara ta toi ne lai do pehune-penite ri Deo ne adhoke, do wala ri ngati Kristus.

³Kristus ke ne do boke peteleo hari-hari ne lua uku nga mmau dhara Deo pa do uru jhara he, do pehune penite ko.

⁴Ne peke ri ya ne lai do nadhe, mita ie ke mu ta do dho nara ta pelu ie tari nadu we, mina harre lema ri ddau do nga ubha do manynyi do natta he pa mu.

⁵Rowi maji lema ya ta do jjhau ngati mu, ege we ta do era ma pa telora mu. Jhe do mengallu dhara lema ya, ki heleo mu ta do hewue nge danni ade, jhe do titu halla-anni ne lua parahajha pa Kristus.

⁶Alle ke pehamme Kristus ri Tuahhu-tuahhu he mii Muri. Rowi do mina harre ke, do jhamma ke mu ta muri mada pa dhara heujhu-headde nga No,

⁷jhe halla-anni we pa dhara No. Do jhamma ke mu ta petito ne muri mada mu, jhe Kristus we ne era titu ne. Do jhamma ke mu ta ju ne perahajha pa Kristus, pedutu nga ne nga we ne do alla peajha pa mu he. Jhe do jhamma ke ngati ade mu ta lale nga re'a ne kolo lii ie-ae.

⁸Do jhamma ke mu ta meniga pewoie-ie, bhole dhai ta era ne do ta happi ne ade mu ri lua tada-lua tada ddau raiwawa do dho bhule nga guna he, tapulara do titu wata ke ta pehuli-peteballi he we. Ne lua tada nga lua ngaddi ro do na harre adho ngati Kristus, tapulara ngati lua tada nga penge ddau raiwawa we, jhe ngati henga-henga do pereda pa raiwawa dhe we.

⁹Rowi hari-hari ne hia nga wewo Deo, do pee pa dhara Kristus ke, do pa dhara lua mii ddau raiwawa ne.

¹⁰Jhe taga tari do peheujhu-headde nga Kristus ke, moko pa mu lema do wie ke ne lua muri mada do tobo. Rowi Kristus ke ne kattu pa henga do na mii we, do nga kuaha nga do parru higa nga pereda.

¹¹Taga tari do peheujhu headde nga Kristus ke, moko alla ke mu pedara ngutu, adho ri lua dara ngutu do tao ri ddau raiwawa, tapulara lua dara ngutu do tao ri Kristus, do peballa kattu mu ngati kuaha wue muri mada do nga lubhu harro nga menyilu ne.

¹² Rowi pa dhara awe ta pejhio ne mu, do pedane ke mu hela'u- la'u nga Kristus; jhe ri lua pejhiu do naanne lema ke, do pemuri le ke mu he la'u-la'u nga Kristus, rowi do parahajha mu pa kuaha Deo, do pemure Kristus ne ngati dhara made mada.

¹³ Do uru he do alla ke mu pemade pa dhara lua pedu nga Deo, taga tari ri mu do nga lubhu harro nga menyilu, jhe do adho mu do dara ngutu pa loro jhara do ngadde ri namada. Tapulara pa dhara awe nadhe do pemuri bhale wari ke mu ri Deo hela'u-la'u nga Kristus. Alla ke ri Deo pepehuba ne lubhu harro nga menyilu di,

¹⁴ jhe alle ke pehappe bhale wari ne huri kallu do penaja nga di ne, do pehedui di do ga lua dhuki-lua dhuki do mejanni duru-duru. Jeh ri do ketoe ke ne huri do naanne pa kolo ajhu ketoe ne, ta pemmau ke ri Deo hari-hari ne lua peanynyi ta toa penaja nga di he.

¹⁵Pa kolo ajhu ketoe do naanne ke ne pepade ri Kristus hari-hari ne henga do parru pereda nga do kuaha he do dho i'a ke ro kemuki-keiko ri. Do lagghe ke ro mii bhara do ta pahe ta heleo ri ddau lowe, mii ddau do jharra pa dhara muhu pa awe lere nga kelao Kristus, pa dhara lua penanna lua nara No.

¹⁶ Rowi do mina harre ke, bhole hani we ddau ta pebui lua hala pa mu, taga tari bhara nga'a, ki adho ri bhara nginu mu, kiadho jhara lodho-lodho mone-ae pa dhara aigama, kiadho pa lua nga'a kewahhu pa awe luha warru, kiadho jhara lua Lodho Pengaha-ihi.

¹⁷Hari-hari ne do na harre, wata ke mii raimawo he we ngati lai-lai do medae ta dakka, tapulara ne lua do ta petobe ne lai-lai do na harre, Kristus ke.

¹⁸Bhole hani we peperugi ne ngi'u mu ri ddau-ddau do hengaja ta pewawa-anni, jhe do wie hu nga mejura pa naju-naju Deo. Ddau do na harre do wue-anni bhaja rebho, ri lua penge-lua penge raiwawa dhe, ne do era pa ro, jhe do latta-latta-anni ri lai nii ro do wala keakea he,

¹⁹ hakku ri do mina harre ke, adho ke ro parru ri pa Kristus do jadi ta kattu ne. Pa dhara lua hewai-hewewe Kristus, do piare-peloje ke hari-hari ne ngi'u dhe, jhe do peakki ta jadhi hahhi ri kewahhu-kewahhu-kewahhu he, jhe muri pedute nga lua ddhei Deo.

²⁰Do alla ke mu pemade hela'u-la'u nga Kristus, jhe do alla ke mu pepeballa kattu ngati henga-henga do kemale pekehero raiwawa dhe hari ta hewue. Nah, ta nga mu hakku muri mada mii ddau do pa dha'i pereda raiwawa do nadhe? Ta nga mu hakku pedhanno ri nga lai-lai do mina hedhe,

²¹”Bhole bhuje nadhe”, ”Bhole nga'e nanidhe”, ”Bhole rohe nadhe”?

²²Hari-hari ne uku do na harre wata ke jhara lai-lai do kinga moko ke ne pake do alle le dhangnge ma ne guna ne. Napoharre wata ke lai-lai nga liajha-liajha do tao ri ddau raiwawa we.

²³Do tarra kinga ta heleo do woie tarra, jhe lii pa ddau ta wie hu nga mejura pa naju-naju Deo, pewawa-anni jhe tao ta pehedue ne ngi'u dhe, tapulara hari-hari ne napoharre, adho do era nga guna tu ta tahe ne lua pegabbho ade ddau raiwawa.