Read Sabu KOLOSE 3 Bible Online

KOLOSE 3 - Sabu bible

KOLOSE 3

¹ Do alla ke mu pepemuri bhale wari hela'u-la'u nga Kristus. Rowi do mina harre ke, do jhamma ke mu ta wohe la'a-rui mita nara ne nga ne do era pa era do mmau do megala ne, do pa ni ke Kristus ne pereda hela'u-la'u nga Deo.

²Pe tuje we ri mu ne penge mu pa lai-lai do era pa ni, pa lai-lai do pa raiwawa dhe.

³Rowi do alla ke mu pemade, jhe muri mada mu do herimo ke hela'u nga Kristus pa dhara Deo.

⁴Nah, Kristus ke ne era wattu muri mada mu do petu ne, jhe kinga dhai No ta ngadde hine, mu lema do medae ke ta hhau hela'u-la'u nga nga No pa dhara lua dhida nga kelodo No!

⁵Rowi do mina harre ke, pemade we ne lua ddhei-lua ddhei raiwawa do pee nga pehero ne ngi'u mu ta peape, mii lua kenyo-langa-huka, lai-lai do dho mangnga, henginga ne ha'e raa, lua ddhei nga lua do woapa, nga lua jingi wi ki (rowi lua jingi wiki do hela'u lema mii lua wie hu nga mejura pa ajhu nga wowadu).

⁶Ri lai-lai do mina harre ke ne do pedubhe ne lua kete nga bubu dhara Deo penaja nga ddau do dho pedhanno nga No.

⁷Do uru he lema, mu miha do pedutu ko ne lua ddhei-lua ddhei do mina harre, pa awe mu hari-hari do pa dha'i pereda lai-lai do na harre ko.

⁸Tapulara pa awe nadhe, do jhamma ke mu, ta hora ne lai-lai do woapa do na harre ngati ngi'u mu; bhole bubu dhara ri, kiadho ddhei ta peapa ne nga-nga, kiadho ta pee nga takka nui-takka bubu nga ddau do wala. Bhole mahhu tu-tu ngati dhara ubha mu ne lii diu nga pedaddha, kiadho lipedai do woapa.

⁹ Bhole pote nga appi mu heddau penaja nga heddau, rowi ne muri mada do dui ne, nga hari-hari nga hari-hari alu nga hadha no he do alla ke ri mu pegolo.

¹⁰ Pa awe nadhe do alla ke pewie pa mu ne muri mada do wowiu ne. Ddau raiwawa do woiu ke mu, do nee pa dhara pewowio loro ri Mone tao mu ne, ri Deo, pedute nga hia nga wewo No miha. Ne pedabbho ne wala dho ke mita ie ke ri mu ta tade Deo nga kemolo.

¹¹Jhe taga tari naanne ke, moko ta ila ke hari-hari ne lua pewala-wala he pa telora do Yahudi nga do adho do Yahudi, ddau do dara ngutu nga do adho do dara ngutu, adho ke do era ne lua pewala ri, do wala rai nga ddau do addu nga do bhodho, pa telora naannu nga do balla kattu, rowi Kristus ke pa hari-hari do na harre, jhe do peheujhu-headde ke No nga ro hari-hari!

¹² Tuahhu ke ne naannu-niki Deo. Deo do hajha do ddhei nga mu nga do pidhi mu, tu ta jadhi unu-oha No we. Rido mina harre ke, do jhamma ke ri mu ta pedhelo ne lua ruba dhara, do jhamma ke ta pedhelo ne woie ade mu, wawa nge danni ade, lumu nga majho, nga makka tee nga wangnge ta dhui hape lua hedui-herui.

¹³ Do jhamma ke mu ta makka tee nga wangnge heddau penaja nga heddau, jhe pehuba ne hala heddau ri heddau ki do era heddau do takka nui pa heddau. Muri, do nga mengallu nge nga kehaka dhara ne pehai-pehuba ne ha la nga ludu mu, ri do mina harre ke do jhamma lema ke mu ta pehuba heddau ri heddau.

¹⁴Jhe ne do rihi paralu ne ti na harre, nadhe ke: Do jhamma ke mu ta pehajha-peddhei heddau nga heddau rowi ri lua pehajha-peddhei do naanne ke ne do peheujhu-headde Tuahhu-tuahhu he hari-hari ta pehekeradde, mo ko ta jadhi ke mu ta keteme.

¹⁵Do jhamma ke ne lihappo-lihappo mu do pejaddhe ri lua pedhuri-pemira do ngati Kristus ne pa dhara ade nga penge mu. Do jhamma ke mu ta peha'e ne kolo lii ie-ae.

¹⁶ Do jhamma ke liajha Kristus he do tobo ri lua tarro ie nga menyarro mangngi ne ta nure tarra la dhara ade mu. Do jhamma ke mu ta peajha-pewolo heddau nga heddau, jhe petakka lii ra'a langu we mu heddau nga heddau do nga mina harre ne worawwu mmau dhara. Jhuka we mu lilodho ta wue-waje Deo ri liwue-waje nga ri lilodho-lilodho alu lua manno, alu-re majho-koko we mu tu Deo nga kolo lii ie-ae pa dhara ade mu.

¹⁷Hari-hari ne nga we ne do jhagge ri mu, mina harre lema ne do pale ri mu do jhamma ke na poharre ta tao nga pale pa dhara ngara Muri di Yesus. Peha'e we ne kolo lii ie-ae pa Deo Ama tu ne nga ne do tao ri Yesus tu mu.

¹⁸ Nawanni-nawanni do jadhi ta ihi-ammu! Pewawa-anni we pa ddau pa hedhapa mu, rowi do mina harre ke ne do jhamma ne wui ai-wui tao mu mii heddau do Herani.

¹⁹ A'a-ari do jhadhi ta ddau pa hedhapa. Hajha ddhei we mu nga ihi-ammu mu. Bhole heggarri we mu penaja nga ro.

²⁰ Woo ana-ana ya! Ne tenge mu mii do Herani, do jhamma ke mu ta era loro pa dhara pewawa anni penaja nga ina-ama mu, rowi do mina harre ke ne do pemengallo dhara Deo.

²¹ Tuahhu-tuahhu do mada ta ama. Bhole pepaddha ne ade ana-ana mu, dhe jadhi ro ta atta dhara.

²² Tuahhu-tuahhu do jadhi ta naannu! Pa dhara hari-hari lai, do jhamma ke mu ta pewawa-anni pa muri mu do pa danni raiwawa do nadhe. Bhole we ta pewawa-anni pa dhara nga jaga we ri ro, taga tari ddhei ta kale puji he we mu. Pedhanno we mu nga ro nga pudi ade, taga tari mu do pedhanno nga Muri.

²³Lua jhagga ne nga we ne do wie pa mu, do jhamma ke ri mu ta jhagga nga mengallu dhara, jhagga we mii pemoke Muri le ri mu, jhe adho ta wata pa ddau raiwawa we.

²⁴Henge we do medae ta hamme ma ri mu ne pai-pala mu ngati Muri. Ne nga we ne do pemoke ri Muri tu annu-niki No, naanne lema ke ne medae ta wie pa mu. Rowi Kristus ke ne Muri do petu ne, do pemoke ri mu ne.

²⁵ Jhe nadu do tao hala, do medae ri no ta dhue hape ne hala nga ludu no do na harre; rowi Muri adho do ketarri worawwu ddau.