Read Sabu KOLOSE 4 Bible Online

KOLOSE 4 - Sabu bible

KOLOSE 4

¹ Tuahhu-tuahhu do jadhi ta muri! Do jhamma ke mu ta tao lai do petu nga do dho i'a bibhi hebhakka penaja nga annu-niki mu. Henge we ri mu ta do mu lema do nga heddau Muri do era pa era do mmau do megala ne.

²Do jhamma ke mu ta halla-anni pa dhara lihebhajha jhe pemoko-anni we pe woie-ie, jhe peha'e we ne kolo lii ie-ae pa Deo.

³Hebhajha lema we mu tu jhi, mita wie pa jhi ri Deo ne awe do woie tu ta pemenyabbhe ne lii jhara lua Kristus. Taga tari lai do naanne ke, hakku ne ya pa dhara ammu bhaddo pa dhara awe do nadhe.

⁴Hebhajha we mita nara ri ya ta peteleo nga woie-ie ne lai do wowuni do naanne, mina mii ne do jhamma pa petu-tu ne.

⁵ Pa dhara lua pedu mu nga ddau-ddau do parahajha, do jhamma ke mu ta muri mada nga woie jhe pake we ne awe do na mii we nga woie-ie.

⁶Do jhamma ke ne lai-lai do ta pale ri mu do pemengallu dhara nga ddhei ddau. Do jhamma ke ri mu ta toi mina mii ta bhale ri mu ne likebhali-likebhali ddau he.

⁷ Tikhikus, tuahhu ddhei di, do medae ta pika pa mu, hari-hari lai jhara lua ya. Do mappe no ne jhagga hela'u-la'u nga jhi tu Muri.

⁸No ke ne do pe pue ri ya la nga mu, do nga lua pedabbho, mita ie ta toi ri mu ne jhara lua jhi, jhe nara mu ta mengallu dhara.

⁹ Onesimus do medae ta kako hela'u-la'u nga Tikhikus, no heddau ngati kejie mu ma. No heddau do mejhanni, jhe do hajha jhi nga no. No nga Tikhikus do medae ta pika pa mu, hari-hari lai do jadhi pa era ya dhe.

¹⁰ Aristarkhus, do pee pa dhara ammu bhaddo hela'u-la'u nga ya, do ne do moa lipelangu le tu mu. Mina harre lema Markus do penamone ina nga Barnabas. (Do alla ke pepedhai lii ma pa mu ta hamme no kinga ki nga dakka la nga mu).

¹¹Lipelangu ngati Yesus do pedoe lema ne ngara no ta Yustus. Ngati ddau-ddau do Yahudi do parahajha he pa Muri Yesus, wata ro he ke hari do tallu do pee ko nga jhagga hela'u nga ya tu ta pekako ne tenge do ngati Deo ne. Do tarra-tarra ro ne dhai ruba dhara nga ya ne rabhe ne dharro ya.

¹² Lipelangu ngati Epafras. No lema ngati kejie mu. No naannu ri Yesus Kristus, do pee loro nga halla-anni ne hebhajha tu mu. Do pee ke no nga meggai ne ami pa Deo, mita ie ne lua parahajha mu ta ju rui jhe do tarra-tarra ke mu ta do kepai, mita nga keteme ke mu ne pedute ne lua ddhei Deo.

¹³Do ngadde miha ke ri ya ta do wohe la'a-rui tarra no tu ddau-ddau do pa Laodikia nga pa Hierapolis.

¹⁴ Dote Lukas, do ddhei di ne, nga Demas hee do le lipelangu tu mu.

¹⁵Pedhai ne lipelangu jhi tu tuahhu-tuahhu do Herani pa Laodikia, mina harre lema pa Nimfa, nga pa jemaat do wie hu nga mejura pa ammu no he.

¹⁶Ki alle ne huri do nadhe tu mu, kale ne loro jhara mita nara le ta ajhe pa jemaat pa Laodikia. Mina harre lema ri mu miha do jhamma ta ajhe ne huri do medae ta moe ngati Laodikia tu mu.

¹⁷ Jhe peke le pa Arkipus, ”Pemoke we ne tenge do wie pa mu ne, tu ta pekako ne lua jhagga tu Muri.”

¹⁸Lipelangu ngati ya, Paulus. Ya miha ne do bhuke ne do hetajji do nadhe. Bhole ballo ya, do nee ko ya pa dhara ammu bhaddo. Ki ie mudhe he Muri ta wie ne lua tarro ie nga menyarro mangngi tu mu. Lipelangu ngati jhi, Paulus