Read Sabu 1 TESALONIKA 5 Bible Online

1 TESALONIKA 5 - Sabu bible

1 TESALONIKA 5

¹Tuahhu-tuahhu, tenge dho ke jhi ta bhuki ri tu mu, parri ne awe do petu ne, ne lai-lai do na harre ne jadhi.

² Rowi do toi miha ke ri mu ma nga keteme ta do ne lodho dakka Muri ne, do medae ta dakka mii do mena'o he do dakka pa dhara awe maddha.

³Kinga era ddau do lii, ”Hari-hari hee do ie he we, do ketanna, jhe bhule dho lai nga-nga,” moko pa dhara awe do naanne ke ne harra hewakka ne lua apa nga kerewe ne la nappi la kebi ro, jhe bhule dho heddau he do nara ta ludu. Ne lai do naanne do medae ta jadhi nga do dho e'e do dho toi, do mii lua paddha dhallu pa mobanni do ta metana ana he.

⁴Tapulara mu adho ddau do muri mada pa dhara kerabba, hakku jadhi dho ne lai do naanne ta pekebhaddi mu mii lua dakka do mena'o.

⁵Tuahhu he hari-hari, ddau do muri mada pa dhara teleo; mu do maho ke ta kejie anni lodho do teleo. Di hedhe adho ddau do muri mada pa dhara kerabba, kiadho do maho pa dhara kejie anni maddha do kerabba.

⁶Rowi do mina harre ke, ie dho ke di ta bba'i-bba'i he we mii ddau do wala he. Do jhamma ke di ta jaga pewoie ie, jhe ne penge di do jhamma ta teleo ke.

⁷Pa awe anni maddha ddau ne bba'i, jhe pa awe anni maddha lema ke ne jadhi ddau ta mawo.

⁸ Tapulara di hedhe ddau-ddau do maho pa dhara kejie anni lodho do teleo, rowi mina harre ke ne lua penge di do jhamma ke ta teleo. Do jhamma ke di ta halla-anni pa dhara parahajha pa Muri, jhe hajha nga ddhei nga ddau-ddau do wala, jhe do tarra-tarra ne henao ta do ri Deo do medae ta pehelama di, pa dhara pedhutu pemuhu di, do nara ta jage pa dhara pelawa nga lua kerabba.

⁹Ne pidhi di ri Deo adho mita wolo tapulara tu ta pehelama, do pelake jhara Muri di Yesus Kristus.

¹⁰Ne made No tu di ke, mita ie pa awe dakka No hine — ie ta era ko di do muri mada, ie ta do alla ke di pemade — do nara ke di ta muri mada hela'u nga No.

¹¹Rowi do mina harre ke do jhamma ke mu ta pee nga perabbha-pedharru nga perui heddau ri heddau, hela'u mii do tao ri mu pa dhara awe nadhe.

¹²Tuahhu-tuahhu, ne ami ri jhi nga petarra-tarra, mita takka pekerihi ri mu ne ddau-ddau do jhagga pa telora mu he, ro do alla ke pepidhi ri Muri ta bhau ta bhata nga ta ra'a lii takka langu pa mu.

¹³Hammi we ro jhe takka pekerihi tu-tu we ro jhe hajha jhe ddhei we nga ro, taga tari do henge ne nga ne do tao ri ro. Muri mada we nga lua penau ie-penadhe ae.

¹⁴Ami lema ri jhi, Tuahhu-tuahhu he, lii ie-ie we pa ddau do dho wae ta jhagga, ruba dhara we nga ddau do jhamma ta ruba dhara, perui we ne ade ddau do meghighi-meda'u, jhe makka tee nga wangnge we penaja nga hari-hari ddau.

¹⁵Jaga we mita bhole era ddau do pebhale lua woapa ri lua woapa. La'a-rui we mu mita era loro mu pa dhara lai do woie heddau penaja nga heddau, mina harre nga hari-hari ddau.

¹⁶Do jhamma ke mu ta era loro pa dhara lua mengallu nge nga kehaka dhara,

¹⁷jhe hebhajha we loro-loro.

¹⁸Pa dhara hari-hari lua do jhamma ke mu ta peha'e kolo lii ie-ae, rowi do mina harre ke ne do ddhei Deo, ngati mu ddau do muri mada pa dhara heujhu-headde nga Kristus Yesus.

¹⁹Bhole labbe Henga Deo.

²⁰Bhole awe la kejhunga ne lii do peke ri Henga Deo ne.

²¹Hari-hari lai do jhamma ke ta uje uru jhara ko, jhe nami ne do woie ne do jhamma ke ta pedute.

²²Pejjhau-anni we ngati hari-hari do apa do kedhaha.

²³Ki ie mudhe he, Deo miha do wie di ne lua kehaka dhara ne, ne do ta pe jadhi mu hari heddau, ie ta henga, hemanga mina harre lema ngi'u mu, hakku bhule dho ke ta era ri nga lua kura nga terujha pa awe dakka Muri di Yesus Kristus.

²⁴Deo do alla pepedoa mu ne, do medae ta tao ne lai no naanne, ro wi do henarru No pa dhara lijaji No.

²⁵Hebhajha we Tuahhu-tuahhu he tu jhi!

²⁶Era we mu pa dhara lua pelangu heddau ri heddau ri lipelangu do tobo ri lua pehajha-peddhei mii tuahhu do Herani hari.

²⁷Pa dhara kuaha Muri, ne ame ri ya nga petarra-tarra mita ajhe ri mu hu ri do nadhe pa hari-hari tuahhu do hela'u lua manno nga kaho.

²⁸Ki ie mudhe he Muri di Yesus Kristus ne do ta wie ne lua tarra ie nga menyarro mangngi tu mu. Lipelangu jhi, Paulus