Read Sabu 1 TIMOTIUS 1 Bible Online

1 TIMOTIUS 1 - Sabu bible

1 TIMOTIUS 1

¹ Timotius, ana ya do petu-petarra pa dhara Muri. Huri do nadhe ngati ya Paulus, rasul Yesus Kristus ri lipereda Deo Mone-ma'i, Mone-golo di nga ri lipereda Kristus Yesus do kepue lua henao di ne. Ke ie mudhe he Deo Ama nga Kristus Yesus Muri ta wie ne lua tarro ie nga menyarro mangngi, lua ruba dhara nga lua kehaka dhara tu au.

³Ne ddhei ya, mita pee teru au pa Efesus, mii do alla ma pe lii pa au pa awe do ta ju ne ya la Makedonia. Rowi, pa Efesus do harre do parri ddau do pelebe ne liajha do dho petu, jhe au ke ne do jhamma ta pepada ro.

⁴Lii au pa ro mita bhole pedhanno ri nga lijawi-lijawi nga lii pelolo huhu-kebie do pee nga pearre-re he. Hari-hari ne na harre do wata ke ta pemuri ne lua kenya'u nga buluru we, adho do ta peballe ne lua pedabbho Deo do titu wata ne nara ta toi pelake jhara lua parahajha pa No we.

⁵Ne pedabbho ne litakka ya do nadhe mita ie ke ddau ta era nga ade do pudi, jhe nga ade nga penge do mmau do megala, jhe do tarra-tarra ne parahajha pa Muri, jhe ri do mina harre ke ta nara ke ro ta hajha ta ddhei nga ddau nga ddau ihi-anga.

⁶Harre ke haghe ne ddau he, do adho ke muri mada do mina harre, jhe huli la dhara lua pebhata do dho bhule guna nga-nga he.

⁷Ddhei ro ta jadhi guru-guru aigama, jhe dhai ne pa petu ne, ro miha tada dho ne lipedai-lipedai do pake ri ro kiadho ne lai-lai do pedhae ri ro nga mina harre ne worawwu ketarra ri ro.

⁸Do toi ke ri di ta do tarra ma ne uku aigama he do woie ki do pake tarra nga petu.

⁹Do tatu ke, do jhamma ta henge ta do ne uku he adho ne peera ta tu ddau do tao lua do woie, tapulara penaja nga ddau do pehihu-pejhajjhi nga uku nga do tao apa nga kerewe, do pebhodho-anni, penaja nga ddau do nga lubhu harro nga menyilu, ddau do dho bhule nga aigama, ddau do penge ne lua raiwawa dhe we, penaja nga ddau do pemade ina nga ama no, nga hari-hari ddau do pemade nadu we,

¹⁰penaja nga ddau do tao lai do ju la lua kenyo la nga huka, penaja nga momone do manga miha dhangnge nga momone, kiadho mobanni do manga dhangnge nga mobanni, nga do mena'o, ddau do pote do appi, do jadhi ta hakahi-hakahi pote, nga nadu we do tao ne lai-lai do pelawa-petaddhu nga liajha do petu ne.

¹¹Ne liajha do naanne do era pa dhara Li Hagha Dhara ne nga jhara lua pelebe Li Hagha Dhara ne do jhole pa ya ke, Li Hagha Dhara do ngati Deo do dhida nga kelodo ne do jhamma ta wue ta waje pedhede peketute ne.

¹²Peha'e ri ya ne kolo lii ie-ae pa Kristus Yesus Muri di. Do alle ke ri No pe wie ne lua rui nga kedi ne pa ya tu ta pemoke ne lua jhagga No ne, jhe do ege ke ri No ta do jhamma ke ya, tu tenge do naanne,

¹³ maji lema ya do uru he do pewoape ne ngara No, do dede do dhaba nga do kare do menihe No. Tapulara do hajha do ddhei Deo nga ya, rowi pa dhara awe naanne adho dae ya do parahajha, hakku adho dae do toi ri ya ne nga ne do toi ri ya dhe,

¹⁴jhe rihi ri ti naanne do alle ke pehegabbhe tu ya ne lua ruba dhara Muri di. Do wie ke ri No ne lua rui nga kedi tu ta parahajha pa No, nga ta hajha ta ddhei nga ddau nga ddau ihi-anga. Ne lua rui nga kedi do naanne do wie ke pa di hari-hari do peheujhu-headde nga Kristus Yesus.

¹⁵Ne lipedai do nadhe do petu-petarra — rowi do mina harre ke do jhamma ke ta hamme, jhe parahajha nga petarra-tarra — : ”Ne dakka Kristus Yesus ma danni raiwawa do nadhe tu ta ma pehelama ddau do nga lubhu harro nga menyilu.” Jhe ya ke ne ddau do kenani pa dhara lubhu harro nga menyilu, jhe do rihi tarra ne apa nga kerewe.

¹⁶Tapulara taga tari naanne ke Deo ne hajha ne ddhei nga ya, mita nara ke Yesus Kristus ta pedhelo ne lua makka tee makka wangnge No penaja nga ya, ddau do kenani pa dhara lubhu harro nga menyilu do nadhe. Jhe nadhe ke ne do jadhi ta hahhi telia tu hari-hari ddau do medae ta paraha pa No, jhe do ta nara ne muri mada do petu nga do peloro ne.

¹⁷Deo, do Duae pa hari-hari awe ne do jhamma ta pekerihe, nga do ta wue-waje loro-loro, ro wi No ke ne do peloro, do dho ngadde ri namada ne do kemolo ta do hahhi wie! Amin.

¹⁸Wo Timotius ana ya! Ne tenge do nadhe, do jhole pa au ke ri ya, pedutu nga litakka Deo do pedhae ri nabi-nabi pa dhara jemaat jhara lua ngi'u au. Do jhamma ke ne litakka do naanne ta mii woperaggu nga'a-dhae nginu-llau he tu au pa dhara lua petadi au do woie ne.

¹⁹Petadi we nga parru pa lua parahajha do petu-petarra ne nga ade nga penge do henono henarru. Do era ne ddau-ddau do dho pedhuli nga lii do dubhu ngati ade nga penge no, hakku do mae tebho-ttei ke ne lua parahajha ro.

²⁰Pa telora ro do na harre Hemeneus nga Aleksander, ddau na harre hari do dhue do alla ke ri ya pewolo jhe jhula la dhara wolaabba Wango, mita petima-anni ro ta pengaha ngati kare-menihe Deo.