Read Sabu 1 TIMOTIUS 2 Bible Online

1 TIMOTIUS 2 - Sabu bible

1 TIMOTIUS 2

¹Petari-tari, ne ame nga menangnge ri ya nga petu-tu, mita ne liami nga menangngi, lihebhajha, nga lihebhajha tu ddau do wala, mina harre lema kolo lii ie-ae do pedhae pa Deo tu hari-hari ddau;

²tu duae-duae nga tu hari-hari ddau do parrua pereda. Ami we mita ie di ta muri mada nga ketanna nga bilu kattu tu Deo nga wui-ai do jhamma.

³Napoharre ke ne do woie nga do pemengallo dhara Deo, Mone-ma'i Mone-golodi.

⁴Ne ddhei No mita pehelama ke hari-hari ddau jhe toi ne do mola do mira ne.

⁵Rowi, do era wata ke heddau Deo we, jhe wa ta ke heddau we ne Mone Pehiri pa telora Deo nga ddau raiwawa, Yesus Kristus we.

⁶No heddau ddau raiwawa do alle pejhole ne ngi'u No tu ta golo hari-hari ddau ngati lubhu harro nga menyilu ro. Ri lua jhula anni Kristus ke do naanne ta peteleo ke ri Deo pa awe do petu ne ta Deo do ddhei ta pehelama hari-hari ddau.

⁷ Jhe ri do mina harre ke hakku pepue ya la nga ddau do adho do Yahudi tu ta la pepeke pa ro ne lii jhara lua parahajha do petu-petarra ne. Ne do pedhae ri ya do na hedhe do petu, adho ya ta pote.

⁸Ne ddhei ya mita pa mii we, hari-hari momone ta hebhajha nga ade do mmau do megala bhole era nga lua pebubu dhara nga lua pehala-pealla ne.

⁹ Kejie mobanni do jhamma ke ta nnau-anni nga lua mudhe hakku he we jhe nga pake bhara do kenyajjhe nga woie, do adho do pemekae dhara ddau. Bhole nga rukattu do pewala kea-kea, kiadho nga nnau bhara nnau ti mela lara kiadho ngati mutiara kiadho bhara nnau do dhida kebhue.

¹⁰Ne do woie ne, mobanni do jhamma ke ta peno ne ngi'u no ri wui ai-wui tao do woie do jhamma tu mobanni do i'a wie hu nga mejura pa Deo.

¹¹Mobanni do jhamma ke ta petima-anni ta pehangngo-anni jhe pedhanno.

¹²O'o dho ya, mobanni ta ajha momone, kiadho lema ta pereda pa momone, ne do jhamma tu ro wala dho ke ta pehangngo-anni.

¹³ Rowi ne do petari rai ne do tao ri Deo, Adam jhe itu Hawa ri.

¹⁴ Jhe adho Adam, tapulara mobanni ne do lakka ta pelue, hakku do hiho do pagge ne lipereda Deo.

¹⁵Maji lema ta mina harre, do medae ma mobanni ta helama ri do pemetana ana, hadhi we no ta nga wawa nge danni-ade ne halla-anni pa dhara parahajha pa Kristus jhe pehajha-peddhei nga ddau nga ihi-anga jhe petone ne muri mada no tu Deo.