Read Sabu 1 TIMOTIUS 3 Bible Online

1 TIMOTIUS 3 - Sabu bible

1 TIMOTIUS 3

¹Do petu tarra ne lipedai do nadhe, ”Ddau do ddhei ta jadhi ta mone heleo jemaat, do ddhei nga hahhi lua jhagga do dhida kebhue.”

² Heddau mone heleo jemaat do jhamma ke no ta heddau do dho bhule nga lua kura nga terujha, heddau we ne ihi-ammu no, adho do henginga ne ha'e bubu dhara, do mmau dhara jhe do kenyajjhe ne muri mada, do ddhei ta hammi ddau ta maho la dhara ammu no, jhe do i'a ajha ddau;

³bhole ta ddau do nginu mawo, kiadho do ddhei ta pehala. Ne do woie ne, no heddau do lumu do majho nga do ddhei nga lua penau-penadhe. No heddau do adho do kerijhi nga mada doi.

⁴Do jhamma ta heddau do i'a peato dhara ammu nga kemali nga woie. Jhe do i'a ajha ne ana-ana no tu ta takke no pekerihe.

⁵Rowi ki ddau do dho i'a peato dhara ammu nga kemali no miha, mina mii no ne nara ta peato jemaat Deo?

⁶Heddau mone heleo jemaat, ie dho ta ddau do itu ko ta maho Herani, rowi do medae no ta wue-anni jhe nara no lua-unu-kolo-taddhu mii Wango le do uru he.

⁷Do jhamma no ta heddau do nga ngara do woie pa dhara namada ddau lowe, ro wi ki do adho ke do mina harre, moko do medae ke no ta kare ta menihe ri ddau, jhe bunu la dhara lii Wango.

⁸Mone rabha-mone dharru jemaat do jhamma lema no ta heddau do woie nga do mola do henarru, adho do kerijhi nga mada doi, jhe adho ddau mone nginu mawo.

⁹Do jhamma ke ro ta ddau do titu halla-ani nga ade nga penge do mmau do megala pa liajha lua parahajha Herani do alle pepeteleo ri Deo ne.

¹⁰Do jhamma ta uji uru ko ro ta do dho bhule nga lua kura nga terujha, jhe itu ie ro ta perabha-pedharru pa dhara jemaat.

¹¹Ne ihi-ammu ro lema do jhamma ta ddau do woie, adho ddau do ddhei ta pewie ubha. Do jhamma ro ta ddau do adho do henginga bubu dhara jhe do mola pa dhara hari-hari lai.

¹²Mone rabha-mone dharru jemaat do jhamma ta heddau we ne ihi-ammu no. Do jhamma ta do i'a peato ne ana-ana no nga dhara ammu nga kemali no nga woie.

¹³Ddau do perabha-pedharru nga woie pa dhara jemaat do medae ta takka pekerihi jhe do ju bhani dhallu ta pedae ne lua parahajha pa Kristus ne.

¹⁴Ne henao ri ya, rihi dhoke ne tui ri, do medae ke ya ta la heahu mu. Ma ji lema ta mina harre, ta bhuke ma ri ya ne huri do nadhe tu au,

¹⁵mita ki nga hala he ya ta tui hudi he jhe itu dakka la au, do toi ke ri au mina mii ne jhamma di ta muri mada mii ana-oha pa dhara Ammu Deo, mii jemaat Deo do muri. Jemaat do nadhe ke do mii geri do tobhe do dharro ne liajha do mola do mira do ngati Deo ne.

¹⁶Bhule dho ke ie ta heddau he do nara ta pehile, mina mii ne worawwu mone-ae ne lai do wowuni ngati aigama di dhe: Do pengaddi-anni ke No pa dhara wewo nga worawwu ddau raiwawa, jhe peteleo ta do mola do mira ri Henga Deo, jhe do ngadde ri naju-naju Deo. Jhe ne lii jhara lua No dolango do petode ke pa telora hari-hari ddau-rai, jhe No ke, hari hewue raiwawa ne parahajha jhe do dhede ke la era do mmau do megala.