Read Sabu 1 TIMOTIUS 6 Bible Online

1 TIMOTIUS 6 - Sabu bible

1 TIMOTIUS 6

¹Hari-hari do Herani do jadhi ta naannu, do jhamma ke ta pee ma nga takke ne muri no ta do jhamma ta takke pekerihe, mita do dho era ne ddau do nara ta peape ne ngara Deo kiadho ne liajha di he.

²Naannu-naannu do ne muri ro Herani ma, adho do ie ri ta bbahhe ri ro muri ro, rowi do hela'u-la'u ta do Herani. Ne do rihi woie ne ri, kinga pemoke ri ro ne muri ro nga rihi woie ri, rowi ne muri do pemoke nga woie do naanne do hela'u-la'u ta ddau do parahajha, jhe do hajha do ddhei ri ro. Hari-hari ne do na hedhe do jhamma ke ri au ta ajha nga ta takka lii.

³Na du ne do pekako liajha do wala ngati do naanne, jhe adho do penau nga liajha do mola do ngati Muri di Yesus Kristus, mina harre lema nga liajha aiga ma di,

⁴ddau do mina poharre ke ddau do dhida ade nga do dho tada nga-nga! Ne lua apa ro, do ddhei ta pebhata nga ta pehala we jhara kewahhu-kewahhu lipedai, hakku do ta penahhu we ne lua pepana dhara, pehagghi-pebhagi, pekara pemenihi, peanynyi-peira pa lai-lai do dho mangnga,

⁵jhe pee nga pehihu do dho ngaddi ta pengaha. Ne lua penge ddau do mina harre do kedhaddu ke jhe adho ke do petu ri. Ne penge ri ro do nara ta kaja ro ngati aigama.

⁶Do tarra ma aigama do wie ne lua mangngi do mone-ae, ki do pengke ke ta do waji ri ne nga ne do era pa ruai no.

⁷Rowi bhule dho di nga aggu ne nga nga ma raiwawa do nadhe, jhe bhule le dho ma ne nga-nga ne do nara ta aggo di ngati raiwawa do nadhe!

⁸Hakku ki do era ke nga bhara nga'a nga bhara pake, waji he ke ne napoharre.

⁹Tapulara ddau do ddhei ta kaja, do luu jhe do hie ke ri heworawwu-heworawwu lua ddhei do woapa nga do bhodho. Lua ddhei lua ddhei do mina harre do pejadhi ddau ta apa nga kerewe.

¹⁰Rowi do ddhei ta kepie-keparre nga doi, moko ta hhau ke heworawwu-heworawwu lai do woapa. Era lema ddau haghe do pee nga pehudhi nga doi we, jhe ri do mina harre ke adho ke do pedute ri ne liajha Herani ne, moko ta nappi ta kebi ke ro ri lua hedui-herui do pemae tebho ttei ne ade ro.

¹¹Tapulara au ddau do unu-do oha ri Deo, hakku do jhamma ke au ta pejjhau-anni ngati lai-lai do napoharre hari-hari. La'a-rui we au mita jadhi ddau do mola do mira pa dhara namada Deo, jhe do jhula-anni pa Deo, do parahajha pa Kristus, do hajha do ddhei nga ddau nga ddau ihi-anga, do makka tee nga wangnge pa dhara lua hedui nga herui jhe do lumu do majho.

¹²Petadi we au nga petarra-tarra ta muri mada mii heddau do Herani, mita nara ri au ta kajhe-dhae ne bhara parahe ne, lua muri do petu nga do peloro ne. Rowi tu lua do naanne ke ne pedoe au ri Deo, pa awe kelole ri au pa hedhapa ddau lowe ta do parahajha tarra ke au pa Kristus.

¹³ Jhe pa dhara awe nadhe, pa hedhapa Deo do mone wie muri mada ne pa hari-hari ne nga we nga pa hedhapa Kristus Yesus do alle pe wie ne lilolo do petu ne pa hedhapa Pontius Pilatus, ame ri ya ne nadhe ngati au:

¹⁴Pedute we ri au hari-hari ne lipereda do naharre nga petu-pete-petarra nga do dho bhule kura nga terujha tade dhai la Lodho Muri di Yesus Kristus ta dakka bhale wari ne.

¹⁵Ne jhara lua dakka No do medae ma ta peato pa awe do petu ne ri Deo miha. Titu wata No ke ne Mone pereda, No ke ne do dhida nga kelodo, Duae ngati hari-hari duae nga Muri ngati hari-hari muri.

¹⁶Titu wata No we ne do nara ta pereda ri lua made mada, nnai ke No do muri pa dhara lua weo nga kana No, do dho nara ta he dharre-hedakke ne ie tari nadu we. Bhule dho heddau ddau raiwawa he do ngaddi ta ngadde No. Tu No ke ne lua dhida nga kelodo nga kuaha lohe la lodho do nami mii ne! Amin.

¹⁷Penaja nga ddau do kaja pa danni raiwawa do nadhe, do jhamma ke au ta ami pa ro mita ie ro ta bhole wue-anni, jhe bhole henao pa bhara-bhara do pa dhara hemelila we — mii pa lua kaja nga kete'e. Do jhamma ke ro ta henao pa Deo we do Mone wie hari-hari ne nga we pa di do mina harre ne worawwe'a nga lale, mita ie ri di ta unu ta oha, jhe pake nga mengallu nge nga kehaka dhara.

¹⁸Ami we ua pa ro tu ta pedhelo ne lua tao ie tu ta ae ri ne tao lua tao-ie, ade do i'a ruba dhara nga do ddhei ta wie ne nga-nga.

¹⁹Rowi ri lua tao do mina harre ke do medae ro ta nara ne lua muri mada do peloro, lua muri mada do petu-petarra ne.

²⁰Ne nga ne do alle pejhole pa au ne, jhagge we ri au pewoie-ie, wo Timotius! Pejjhau we anni ngati lipedai-lipedai do dho bhule nga guna he, nga lua pebhata-lua pebhata jhara lua kinga lii nga henginga: ”Lua mmau dhara”.

²¹Rowi do era ne ddau-ddau do lii ta do ro do nga lua mmau dhara do mina harre, hakku ta huli ke ro ngati liajha-liajha Herani do pa uru he do parahajha ko ro. Ki ie mudhe he ri Muri ta wie pa Tuahhu he ne lua tarro ie nga menyarro mangngi. Lipelangu ngati jhi, Paulus