Read Sabu 2 TIMOTIUS 1 Bible Online

2 TIMOTIUS 1 - Sabu bible

2 TIMOTIUS 1

¹ Timotius kewattu dhallu ya! Ya, Paulus, ne do bhuke ne huri do nadhe tu au, jhe nga henao ki ie mudhe he Deo Ama nga Muri di Kristus Yesus ta wie ne lua tarro ie nga menyarro mangngi, lua ruba dhara nga lua kehaka dhara tu au. Ti lua ddhei Deo, ta dhede ke ya ta jadhi rasul Kristus Yesus, jhe pepue tu ta la pepeke ne jhara lua muri mada do jaje ri Deo ne. Ne lua muri mada ne nara ta hamme ri di, ki do muri mada ke di pa dhara lua heujhu-headde nga Kristus Yesus.

³Peha'e ri ya ne kolo lii ie-ae pa Deo do pemoke ri ya nga ade do mmau do megala mido tao ri ama-appu ya do rai uru he. Loro-loro ya ne peha'e kolo lii ie-ae pa Deo, hadhi henge au ri ya pa dhara lihebhajha ya, ie ta anni lodho nga anni maddha.

⁴Do henge ri ya ne lua hedui ade au. Ri do mina harre ke do ddhei tarra-tarra ke ya ta la peabu nga au, mita mengallu tu-tu ne dhara ya.

⁵ Do henge ri ya ne lua parahajha au do petarra-tarra pa Kristus, do hela'u le mii lua parahajha appu banni au Lois nga ina au Eunike. Do ketarra ri ya ne lua parahajha au lema do mina harre.

⁶Rowi do mina harre ke ta pekebhadde ke au ri ya tu ta pemure teru ne lua ruba dhara Deo do wie pa au ne, pa awe takke ne ruai ya ne la wokolo au.

⁷Rowi ne Henga do wie ri Deo di, adho Henga do ta pejadhi di ta ddau do meda'u. Tapulara we ne Henga Deo ne, do ta pejadhi ta ddau do rui, do tobo ri lua pehajha-peddhei jhe do nara ta tahe ne ngi'u dhe.

⁸Rowi do mina harre ke bhole mekae dhara we ta pejha'e-pepeke ne jhara lua Muri di jhe bhole makae lema jhara lua ya, do bhaddo taga No. Tapulara do jhamma ke au nga lua rui nga kedi do ngati Deo ne ta dhue ta hape le ne lua hedui-herui tu Li Hagha Dhara ne.

⁹Deo ke ne do pehelama di nga do pedoa di mita jadhi ta annu-niki ri No miha. Ne tao ri No mina harre adho do jhalli pa ne nga ne alla petao ri di tapulara do jhalla pa dhara lua pedabho nga lua ruba dhara No ma miha. Wie ri No pa di ne lua ruba dhara ne, pelake jhara Kristus Yesus uru jhara ngati do dho peera dae ne raiwawa do nadhe.

¹⁰Jhe pa dhara awe nadhe ta pedhelo ke ri Deo ne lua ruba dhara No do naanne pa di, ri lua dakka Duae Mone-ma'i-Mone golo di, Yesus Kristus. Yesus ke ne do pejharre ne kuaha lua made mada nga do aggo ne lua muri mada do peloro ne, do pelake jhara Li Hagha Dhara ne.

¹¹ Tu ta pepeke ne Li Hagha Dhara do naanne ke hakku dhede ya ri Deo ta jadhi rasul nga guru.

¹²Taga ri do mina harre ke hakku dhui hape ya hari-hari lua hedui-herui do na hedhe, tapulara do pee ma ya nga ketarra, rowi do toi tarra ke ri ya ta pa nadu ya ne parahajha. Do ketarra ke ri ya ta do ne nga ne do alle pejhole ri No pa ya ne, do dhae lema ri No ta jage lohe la Lodho Pedakka rahi Raiwawa.

¹³Pedute we nga petarra-tarra ne liajha do mola do mira ne, do alle pewie ri ya pa au ne. Jhe do jhamma ke au ta pee nga parro ne lua manno nga kaho ne nga lua hajha nga ddhei do jadhi ta unu di ne taga tari do peheujhu-headde ke di nga Kristus Yesus.

¹⁴Ri rurabha-rudharru ngati Henga Deo do muri pa dhara di ne, do jhamma ke ri au ta jage nga woie-ie ne lai-lai do nga kebhue do alle pejhole pa au ne.

¹⁵Do toi ke ri au ma ta do hari-hari ddau pa ihi rai Asia, do alla ke pe hane ya, do maho le ke Figelus nga Hermogenes.

¹⁶Tapulara ana-oha Onesiforus do jhajhi wari ke ne pemengallo dhara ya. Ki ie mudhe he Muri, ta pedhe-lo ne lua ruba dhara No tu ro he. Maji lema ya ta do pa dhara ammu bhaddo, Onesiforus i'a dho mekae dhara jhara lua ya do naanne.

¹⁷Ta mina harre ne dhai dhangnge ya ma Roma, ta la kale dhangnge ke ya ri no, tade peabu nga ya.

¹⁸Jhe do toi ke ri au ma, do pa Efesus ko ro uru he, do dhai ae no ne ruba dhara nga ya. Ki ie mudhe he ta pedhelo ri Muri ne lua hajha nga ddhei No pa Onesiforus pa Lodho Pehappo ne hala hari-hari ddau raiwawa ne.