Read Sabu 2 TIMOTIUS 2 Bible Online

2 TIMOTIUS 2 - Sabu bible

2 TIMOTIUS 2

¹Wo Timotius, ana ya! Do jhamma ke au ta rui ta kedi, ri lua ruba dhara do wie pa di ne, taga tari do heujhu-headde ke di nga Yesus Kristus.

²Ne liajha do dhanno ri au do uru he ngati ya, pa hedhapa ddau lowe he, do jhamma ke ri au ta wie pa ddau-ddau do nara ta parahajha ri au jhe do i'a ta ajha ddau do wala.

³Do jhamma au ta dutu hela'u le ta hedui mii heddau horodhadhu Kristus Yesus do dho i'a nuni-anni.

⁴Heddau horodhadhu do pa dhara pekako jhagga, adho do pekewallu-anni nga lua lai no miha, rowi do ddhei no ta pemengallo dhara kattu unu no ne.

⁵Heddau do peuji perai nara dho ta nome ahhi, ki adho do pedute ri no ne lai-lai do petakke jhara lua peuji do naanne.

⁶Ddau do jhagga worai-wowadu do wohe la'a-rui, no ke ne do petari-tari do nga haa ta nara ne nga'a habha ne ngati habha nga la'a no ne.

⁷Dhino we ne nga ne do pedhae ri ya do napoanne, rowi do medae ri Muri ta wie ne lua rui nga kedi pa au mita tada au hari-hari ne napoharre.

⁸Henge we ne nadhe: Ne Li Hagha Dhara do pepeke ri ya ne, naanne lii jhara lua Yesus Kristus, kolo loro Daud ne; No ke Kristus do alla ke pemuri bhale wari ngati lua made mada.

⁹Taga ri pepeke Li Hagha Dhara do naanne ke, hakku dhui hape ya ne lua hedui-herui; rihi ri ko ti naanne tade dhae ta petuke ri rate mii heddau do tao apa he. Tapulara ne lipedai Deo nara dho ta rate.

¹⁰Ri do mina harre ke hakku ta tee ihi we ya ne dhui hape hari-hari ne na harre tu lua paralu ddau-ddau do alla pepidhi ri Deo, mita ie le ro ta nara ne lua helama tona ie ne, do wie pelake jhara Yesus Kristus, jhe do lere ri lua dhida nga kelodo do peloro ne.

¹¹Do petu tarra ne lipedai do nadhe, ”Ki do alla ke di pemade hela'u-la'u nga No, do muri lema di hela'u-la'u nga No.

¹² Ki do pee ma di nga makka tee nga wangnge, do medae lema di ta pereda hela'u-la'u nga No. Ki pehile No ri di, ri No lema do ta pehile di.

¹³Ki do dho henarru di, do pee ma No nga henarru, rowi do dho nara No ta pebhata nga ngi'u No miha.”

¹⁴Do jhamma ke ri au ta pekebhaddi ne ddau-ddau he, ne jhara lai do na hedhe hari-hari. Pa hedhapa Deo, takka lii we pa ro mita bhole pehala jhara kewahhu-kewahhu lipedai. Napo harre bhule dho nga guna, wata ke ta pekenyawu ne ddau-ddau do dhanno he we.

¹⁵Do jhamma ke au ta la'a rui nga petarra tarra mita hamme au ri Deo, mii ddau do jhamma ta jhagga tu No. La'a-rui we au mita do dho nara au lua mekae ngati lua jhagga au, tapulara ajha we ri au nga petu ne liajha-liajha do mola do mira do ngati Deo he.

¹⁶Pejjhau-anni we au ngati lipelolo-lipelolo do dho bhule nga guna he nga do ta kare ta menihe Deo he. Lai-lai do na harre ke ne do ta hebhubhu ddau wata ke ju la do woapa we.

¹⁷Ne liajha-liajha ddau do na harre do jhala mii bhewi he we la hebhakka-hebhakka. Patelora ro do maho le ke Himeneus nga Filetus.

¹⁸Alla ke ro pehuli ngati liajha do mola do mira ne, jhe do pekenyawu ne lua parahajha ddau he haghe. Ne lii ro, ne lua kaddhi ngati lua made mada ne do alla ke pejadhi.

¹⁹ Tapulara ne kepue do rui do pejaddhe ri Deo ne adho ke do nara ta kerattu wari ri. Pa dhida No do bhuke mina hedhe, ”Do tada ri Muri ne ddau-ddau do unu do oha ri No,” jhe, ”Ne ddau do lii ta no do unu ri Muri, ddau do napoanne do jhamma ke ta pengaha ngati tao ne wui ai-wui tao do hala.”

²⁰Pa dhara hewue ammu do worena do era heworawwu-heworawwu nalu. Era do tao ngati mela pudi kiadho ngati mela lara, tapulara do era lema do tao nga ti ajhu kiadho ti worai. Era do pake ta tu lua do ta ale ko jhe era, jhe era ri ma do pake tu ta lua do tima he.

²¹Ddau do pemo ne ngi'u no ngati hari-hari do woapa, ddau do napoanne do ta pake ta tu lua do ta ale ko jhe era. No do jadhi ke ta nalu do petone ko jhe itu era nga guna tu muri no. Do pemoke ke no ta pake tu lua jhagga ne nga do woie.

²²Pejjhau-anni we ti lua mengallu dhara-lua mengallu dhara ana-ana do ngarru. La'a-rui we ta muri mada pedute nga lua ddhei Deo, halla-anni we pa liajha No jhe hajha-ddhei we nga ddau nga ddau ihi-anga, jhe do nga ade do ketanna. Muri mada we mina harre hela'u-la'u nga ro do peka ta ami lua ruba dhara pa Muri nga ade do mmau do megala.

²³Bhole luu la dhara lua pebhata ddau-ddau do bhodho do dho tada ne nga-nga he. Do toi ke ri au ma ta do hari-hari ne na harre do ta pedubhe ne lua pehala we.

²⁴Ddau do jhagga tu Muri adho do jhamma ta pehala; do jhamma ta kehaka no penaja nga hari-hari ddau, jhe do nara ta ajha ddau nga woie nga makka tee nga wangnge.

²⁵Do jhamma ke no ta wie ne liajha pa ddau-ddau do ddhei ta pelawa nga lumu nga majho; nge ta ie mudhe he ta wie ri Deo pa ddau-ddau do na harre ne loro jhara mita jharra ngati lubhu harro nga menyilu ro, jhe tada ne liajha do mola nga mira ne.

²⁶Nga mina harre ke ro ne jadhi ta tada wari, jhe nara ta mahhu-anni ngati dhara hii Wango do alla pe kappa ro jhe pehahhi ro ta pedute ne lua ddhei no.