Read Sabu TITUS 3 Bible Online

TITUS 3 - Sabu bible

TITUS 3

¹Pehenge we ri au ne do Herani do pa jemaat-jemaat do pemoko ri au he, mita i'a ro pewawa-anni pa kattu-kattu nga mone pereda rai nga liha, jhe pedhanno nga pemoko-anni ta tao ne nga we ne lai do woie ne.

²Lii pa ro mita ie ro ta do dho kara nga menihi kiadho ta pelaha ie ta nga nadu we, tapulara mita kehaka ie ta penaja nga nadu we. Do jhamma ke ro ta lumu nga majho penaja nga hari-hari ddau.

³Rowi do uru he di lema do bhodho, do huli do teballi nga do keti-ketinga. Do penaanno ko ri di heworawwu-heworawwu lua ddhei do woapa, do muri mada ko di nga lua pedabbho-lua pedabbho do woapa nga lua pana dhara, jhe do petakka nui heddau nga heddau.

⁴Tapulara Deo, Mone ma'i-Mone golo di ne, do pedhelo ke ne lua hajha nga ddhei No nga lua woie ade No penaja nga di.

⁵No ke ne do pehelama di, adho taga tari do alla ke di petao hahhi lai do woie, tapulara taga tari No miha ne do hajha do ddhei nga di. Ne pehelama di ri No do pelake jhara Henga Deo, do wie pa di ne lua metana bhale wari nga lua muri mada do wowiu nga loro jhara ta lonye di pemo.

⁶Hegute ri Deo ne Henga No tu di pelake jhara Yesus Kristus Duae Mone ma'i-Mone golo di ne,

⁷mita ri lua ruba dhara Yesus, ta nara ke di ta peie bhale wari nga Deo, jhe nara di ne lua muri mada do petu nga do peloro ne.

⁸Do petu tarra ne lipedai do nadhe. Ne ddhei ya ta halle tarra ri au ne lai-lai do na hedhe, mita ie ne ddau-ddau do perahajha pa Deo he ta tarra-tarra ne la'a-rui ta jhagga ne lai-lai do woie nga do nga guna tu hari-hari ddau.

⁹Pejjhau-anni we ngati lua pebhata do dho bhule nga guna, lilolo jhara lua huhu nga kebie, lua pehala-pealla jhara uku aigama. Hari-hari na poharre bhule dho nga guna jhe ledho ma nga lua mangngi.

¹⁰Ddau do pedubhe ne lua pemenyalla pa dhara jemaat do jhamma au ta takka lii pa no hewari-dhue wari; kialla pemina harre bhole penau ri nga no.

¹¹Do toi ke ri au ma ta do ne ddau do mina harre dokenyawu jhe ngati lubhu harro nga menyilu no do teleo ke no ta do hala.

¹² Bhole rajja ri ki alla ke ri ya pepepu Artemas kiadho Tikhikus la nga au, kale ri au ne loro jhara nga henginga mita dakka dhangnge ma nga ya pa Nikopolis, rowi do nga lua pedabbho ya ta pee pa ni pa dhara warru meringi dhe.

¹³ La'a-rui we au nga petarra-tarra ta perabha-pedharru nga Zenas, do mone dhai lohe tada jhara lua wee ne, nga Apolos, mita nara to ta pekaddhi nga do dho bhule lua kura nga-nga.

¹⁴Ne ddau-ddau di he do jhamma ke ro ta petima anni ta tao lai-lai do woie mita petobo ne lua paralu ro do kerihi he, bhole dhai ta muri mada nga dho bhule guna.

¹⁵Hari-hari ne tuahhu do hela'u-la'u nga ya he, do moa lipelangu tu au. Pedhae le ne lipelangu jhi pa ihi-anga di do hela'u lua manno nga kaho he. Ki ie mudhe he ta wie ri Muri ne lua tarro ie nga menyarro mangngi tu Tuahhu he hari-hari. Lipelangu jhi, Paulus