Read Sabu FILEMON 1 Bible Online

FILEMON 1 - Sabu bible

FILEMON 1

¹Tuahhu Filemon, ihi-anga nga mone jhagga hela'u-la'u nga jhi! Ya, Paulus, heddau do rate taga Kristus Yesus, hela'u-la'u nga tuahhu di Timotius, nee do bhuki huri do nadhe tu au,

² nga tu jemaat do peowu pa ammu au he; mina harre lema tu nawanni di Apfia nga ihi-anga hepenau di, Arkhipus.

³Ne henao ri jhi ki ie mudhe he Deo Ama nga Muri di Yesus Kristus, ta wie ne lua tarro ie nga menyarro mangngi nga lua kehaka dhara tu au.

⁴Hadhi hebhajha we ya, do pale ri ya ne ngara Tuahhu nga peha'e kolo lii ie-ae pa Deo.

⁵Rowi do rangnge ke ri ya ta do tarra-tarra Tuahhu ne parahajha pa Muri Yesus nga do hajha do ddhei nga hari-hari annu-niki Deo.

⁶Hebhajha ya, kinga ie mudhe he, ne lua petuahhu di mii ddau-ddau do parahajha do medae ta wie ne lua tada do rihi mone-ae ri pa hari-hari lua tarro ie nga menyarro mangngi do hamme ri di taga tari do peheujhu-headde nga Kristus.

⁷Tuahhu Filemon, ne lua hajha nga ddhei au penaja nga hari-hari annu-niki Deo, do pemengallo ne dhara ya nga do ta perue ne ade ya! Hari-hari annu-niki Deo do jadhi ta mengallu dhara taga Tuahhu.

⁸Rowi do mina harre ke, mii heddau tuahhu do hela'u lua manno nga kaho, do ta pereda he we ya pa Tuahhu, ta tao ne nga we ne do nara ta tao ri Tuahhu.

⁹Tapulara taga tari do ddhei ya nga au, moko wata ke ta ame he we ri ya pa au. Ya dhe heddau do weka ke, jhe do ne do tahe pa dhara ammu bhaddo taga Kristus Yesus.

¹⁰ Ya, Paulus, ne ta pedhae ne hahhi liami pa au jhara lua Onesimus, ana ya pa dhara Kristus. Rowi pa dhara ammu bhaddo do nadhe, do jadhi ke ta heddau ama tu no pa dhara lua pedu nga Deo.

¹¹Pa do uru he, bhule dho no nga guna tu au, tapulara pa dhara awe nadhe do nga guna ke no, adho ta tu au he we, tapulara tu ya lema.

¹²Pa awe nadhe ne ddau do ddhei ri ya do naanne, nee do moe bhale ri ya la nga au.

¹³Do ne papetu ne, do ddhei ke ri ya ta tahe no ta pee hela'u nga ya, mita hoo ngi'u au, mita ie no ta rabhe ya pa dhara ammu bhaddo dhe ko, taga tari Li Hagha Dhara do ngati Deo ne.

¹⁴Tapulara wae dho ya ta tao nga-nga ki do dho o'o dae au. Do rihi ddhei ya, ki nga tao ri Tuahhu taga ngati lua happo ade au ma miha; wae dho ya ta pehahhe au.

¹⁵Wue ke, hakku langnge Onesimus ti nga Tuahhu, pa dhara hemelila he we, mita ie no ta abo bhale wari ri Tuahhu lohe la lodho do nami mii ne.

¹⁶Pa awe nadhe adho ke no ta wata ta heddau naannu he we ri tu Tuahhu, do rihi ke no ngati do naanne. No heddau do Herani hel'au ke, do jadhi ta heddau do hajha do ddhei ya ke. Do tarra-tarra no ne guna tu ya, mina mii ri ko tu au ri. Do bhara tatu ke no ta do dhai tarra ne guna ie ta mii heddau naannu, mina harre lema ta mii heddau tuahhu pa dhara Muri.

¹⁷Rowi do mina harre ke, taga ta ri do kire ma ya ri Tuahhu ta mii heddau ihi-anga do Herani hela'u, hamme wari we Onesimus, hela'u le mii hamme ya le ma ri Tuahhu.

¹⁸Ki do nga hala no kiadho marra no do era nga kallu pa au ha ne we no pehape ri ya hari-hari ne na harre.

¹⁹Nah, mai ma bhuke miha ri ya pa dhe: Ya, Paulus, do medae ta ma'i pemmau hari-hari ne na harre. (Do tatu adho ke Tuahhu do tenge ta pekebhadde ri ya ri ta do Tuahhu miha do nga kallu pa ya, kallu lua muri mada au do wowiu ne mii heddau do Herani.)

²⁰Rowi do mina harre ke, pa dhara ngara Muri, hakku ko we au ta ruba dhara nga ya, pemengallo we ne dhara ya mii heddau tuahhu pa dhara Kristus.

²¹Ne bhuke ri ya ne huri do nadhe, rowi do ketarra ri ya ta do medae ta tao ri Tuahhu ne nga ne do ame ri ya. Rihi ri ko ti naanne, ne toi rowi ya, do medae ta tao ri Tuahhu do rihi ri tina harre.

²²Pa dhara napoanne lema, ruba we ne dhara au ta pemoke ne era tu ya pa dhara ammu au, rowi do henao ri ya pa Deo, ta do medae ta petobe ri No ne lihebhajha Tuahhu-tuahhu he hari-hari jhe aggo ya pebhale la nga mu ri.

²³ Epafras, do hela'u nga ya pa dhara ammu bhaddo dhe, taga tari Kristus Yesus, do moa le lipelangu no tu mu.

²⁴ Hammi lema we ne lipelangu ngati ihi anga jhagga ya: Markus, Aristarkhus, Demas nga Lukas.

²⁵Ki ie mudhe he Muri Yesus Kristus ta wie ne lua tarro ie nga menyarro mangngi tu mu. Lipelangu ngati jhi, Paulus