Read Sabu IBRANI 1 Bible Online

IBRANI 1 - Sabu bible

IBRANI 1

¹Pa awe do uru he, ae wari Deo ne pedai lii nga ama-appu di, pelake jhara nabi-nabi nga pake heworawwu-heworawwu loro jhara.

²Tapulara pa dhara awe pedakka rahi dhe, ki pedai lii No nga di, do pelake jhara Ana No ke. Pelake jhara Ana No ke, ne peera ri Deo raiwawa nga liru hari ta hewue. Jhe do petakke ke ri Deo ta do Ana do nadhe ke ne do mone unu hari-hari.

³No ke do pepelale ne lua dhida nga kelodo Deo do mina harre ne worawwu weo nga kana ne. No ke ne worawwu do ngadde ne ti ngi'u Deo miha. No lema ne do jage liru balla nga raiwawa hari ta hewue mita pee ma ta keteme, do jage ri lidara No do nga kuaha do dhai tarra ne. Ta alle ri No pewie ne loro jhara mita nara ddau raiwawa ta gole pelude ngati lubhu harro nga menyilu ro, ta mejaddhi ke No pa kedera lua pereda No do mmau do megala ne hela'u-la'u nga Deo, Mone Pereda do Wiki-rihi dhida ne.

⁴Ana do naanne do nara ke ne era mejaddhi do dhai rihi dhida ne ngati naju Dee he, jhe ne ngara do wie pa No lema ri Deo do dhai rihi dhida nga ketutu ngati ngara do wie pa naju Deo he.

⁵ Ngaddi dho Deo ta lii mina hedhe ie ta pa heddau naju Deo he, ”Au ke ne Ana Ya; pa lodho do nadhe, Ya ke ne do jadhi ta Ama au”, Ngaddi le dho ma Deo ta lii mina hedhe jhara lua naju Deo he, ie ta pa naju Deo do nami we, ”Ya ke ne do ta jadhi Ama no, jhe no ke ne do ta jadhi Ana Ya.”

⁶ Tapulara ta dhai ta pepue ri Deo ne Ana No do mone a'a ne ma danni raiwawa do nadhe, do mina hedhe ke ne lii Deo, ”Hari-hari naju Deo do jhamma ta wie hu nga mejura pa Ana do naanne.”

⁷ Jhara lua naju-naju Deo he, mina hedhe ne lii Deo, ”Tao ri Deo ne naju-naju No he ta jadhi ta ngallu, jhe ne do kako kaddhi pa No he ta jadhi ta weo ai.”

⁸ Tapulara pa Ana do naanne, ne lii Deo, ”Ne kedera era mejaddhi Au, oo Deo do peloro lohe la lodho do nami mii ne! Ne lua pereda Au hahhi lua pereda do mola do mira.

⁹Do ddhei nga do mola do mira au, jhe do paddhu nga lua tao apa nga kerewe ri do mina harre ke Deo, Deo Au, ne jhujhe-ne pidhe Au jhe wie pa Au ne lua takke pekerihe do pewatto ne mengallu nge nga kehaka dhara, do kerihi ngati ihi anga-ihi-anga Au he.”

¹⁰ Do lii lema Deo, ”Au, Muri, do ti petari rai do era raiwawa, jhe Au miha ne do tao liru.

¹¹Hari-hari ne na harre do medae ta ila-ta marra, jhe jadhi ta bura mii bhara pake he; tapulara Au adho do medae ta lari-anni.

¹²Liru nga raiwawa hari ta hewue do medae ta lappe ri Au mii bhajhu he, jhe do medae ta gati ri Au ri do wala. Tapulara adho Au do ngaddi ta lari-anni jhe ne muri mada au adho do era nga pewata.”

¹³ Ngaddi dho Deo ta lii mina hedhe ie ta pa heddau naju No he, ”Mejaddhi we au pa hebhakka kedhanga Ya, tade pejharra ri Ya pa au ne ihi muhu-ihi lawa au he.”

¹⁴Kido mina harre ke, ne nga ke ne do pa petu ne, ne naju-naju Deo he? Ro he, henga-henga do kako do kaddhi pa Deo, jhe do pepu-peju ri Deo ta la ruba dhara nga ddau-ddau do ta hammi ne leua helama tona ie ne.