Read Sabu IBRANI 10 Bible Online

IBRANI 10 - Sabu bible

IBRANI 10

¹Uku aigama Yahudi wata ke ta wie ne gaba do henunu he we jhara lai-lai do woie do medae ta dakka ne, jhe adho gaba do petu ne ngati lai-lai do na harre. Bhule dho ne loro jhara ne uku do na harre do na harre do nara ta peketeme ne ddau do dakka la wie hu nga mejura pa Deo nga aggu bhara jhula nga menahu, maji lema ta hewue ttau-hewue ttau do pee nga jhula loro ne bhara tunu-menahu do hela'u.

²Ki ta do tarra he ne ddau-ddau do dakka la wie hu nga mejura he pa Deo, do tarra-tarra ke ta do alla ke pepemmau-pemegala ngati lubhu harro nga menyilu ro, moko adho ke ro do era ri nga penge ta do era ko ro nga lubhu harro nga menyilu ri, jhe bhara tunu-menahu adho ke do ta jhula ri.

³Tapulara do teleo ke ta do ne bhara tunu nga menahu do jhula pa hewue ttau-hewue ttau he, ri na harre ri ko ma ne do ju ta pehewina ne ddau he jhara lubhu harro nga menyilu ro,

⁴rowi do tarra ma, raa hapi nga raa ki'i hawu mone adho do nara ta pehai-pehuba lubhu harro nga menyilu.

⁵ Ri do mina harre ke hakku pa awe ta maho ne Kristus ma danni raiwawa do nadhe do lii ke No pa Deo, ”Adho ke Au do pedhuki nga bhara tunu-menahu nga bhara jhula; tapulara ngi'u ne pemoke ri Au tu Ya.

⁶Maddhi dho ke pa dhara Au, bhara tunu-menahu kiadho bhara tunu-menahu tu ta pehai-pehuba lubhu harro nga menyilu.

⁷Moko ta lii ke Ya, ’Ya ke nadhe, oo Deo! ne dakka Ya tu ta ma tao ne do ddhei Au ke, mii do hure do bhuke ne jhara lua ngi'u Ya pa dhara Buku Lidara-Likewah Deo.’ ”

⁸Uru-uru jhara ne lii Kristus, ”Adho ke au do pedhuki nga bhara tunu-menahu, ddhei le dho ma Au nga bhada do tunu do menahu mii bhara jhula nga lua tunu nga menahu tu lua pehai-pehuba lubhu harro nga menyilu.” Mina harre ke ne lii Kristus, maji lema hari-hari ne bhara tunu nga menahu do na harre do jhula pedutu nga uku aigama Yahudi.

⁹Ta alla pemina harre ta lii ke Kristus, ”Ya ke do nadhe, oo Deo! Ne mai Ya tu ta ma tao ne do ddhei Au.” Hakku ta peila ke ri Deo hari-hari bhara tunu nga menahu do dui he, jhe hoo ri No ri lua jhula-anni Kristus miha.

¹⁰Alle ke pejhagge ri Yesus Kristus ne nga ne do ddhei Deo, nga jhole ne ngi'u No ta mii bhara tunu nga menahu. Ri lua jhula-anni do naanne ke wata le tu hewari we lohe la lodho do nami mii ne, ta pemmau ke di hari-hari ngati lubhu harro nga menyilu.

¹¹ Nadu we ne mone tunu-menahu do Yahudi do pekako ne tenge no mii mone tutu menahu helodho-helodho, jhe do jhajhi wari ne jhula bhara tunu nga menahu do hela'u we. Tapulara ne bhara tunu nga menahu do na harre nara tu-tu dho ta pemmau-pema'i lubhu harro nga menyilu.

¹² Tapulara we Kristus, wata hewari we ne jhula hahhi bhara tunu nga menahu tu ta pehai-pehuba lubhu harro nga menyilu, jhe ne bhara tunu nga menahu do napoanne tu hape la lodho do nami-mii ne ke. Ta alle pe jhole ri Kristus ne bhara tunu nge menahu do naanne, nnai ke Kristus do mejaddhi pa hebhakka kedhanga Deo jhe pereda hela'u nga Deo.

¹³Jhe pa dhara awe do nadhe Kristus ta mata he ke ta pejharra ri Deo ne ihi muhu-ihi lawa No.

¹⁴Hakku ri hahhi bhara tunu nga menahu we ne peketeme ri Kristus ne ddau-ddau do alla pepemmau-pepema'i he ngati lubhu harro nga menyilu.

¹⁵Jhara lua do naanne do peteleo ma ke ri Henga Deo pa di, ne ane Henga Deo.

¹⁶ ” ’Nadhe ke ne lipejaji do medae ta tao ri Ya nga ro, pa lodho-lodho do medae ta dakka,’ ane Muri, ’Do medae ta takke ri Ya ne lidara-likewahhu Ya pa dhara ade ro, jhe bhuki pa dhara penge ro.’ ”

¹⁷ Do lii lema Deo, ”Do ta peballu ke ri ya ne lubhu harro nga menyilu nga lua apa nga kerewe ro.”

¹⁸Hakku lubhu harro nga menyilu nga lua apa nga kere we do na harre alla ke pepehai-pehuba, moko adho ke do tenge ri ta jhula bhara tunu nga menahu tu ta pehai-pehuba lubhu harro nga menyilu.

¹⁹Nah, Tuahhu-tuahhu, ri lua made Yesus ne, pa awe nadhe, bhani ke di ta ma ho la dhara Kama do Rihi Wiki Mmau nga Megala ne.

²⁰Alle ke peboke ri Yesus, hahhi loro jhara do wiu tu di, hahhi loro jhara do wie lua muri mada. Ne loro jhara do naanne do lake jhara ruhedhidhi bhalla, do ngi'u Yesus dhangnge ma miha.

²¹Jhe di pa awe nadhe do era ke pa di heddau Mone tunu-menahu Mone-ae, do nga lua titu penaja nga Ammu Deo.

²² Rowi do mina harre ke, mai we di ma hedharre-hedakke Deo nga ade do mola do mira, nga lua manno nga kaho do titu halla-anni, nga ade do alle pepemo-pemegala ti lua tada ngi'u ta do hala, nga ngi'u do alle ke pepemo ri ei do mmau do megala.

²³Do jhamma ke di ta parru pebbharra-bbharra pa lua henao do ketarra ri di ne, rowi do nara ri di ta pa haja Deo, jhe do medae ri No ta petobe ne lijaji No.

²⁴Jhe do jhamma ke di ta hela'u-la'u ne heleo heddau ri heddau mita nara di ta pedidi heddau ri heddau tu ta pehajha-peddhei nga ddau nga ddau ihi-anga, nga tao ne lai-lai do woie.

²⁵Do jhamma ke di ta peteni hela'u-la'u, jhe bhole peballu-anni mii ddau do wala he. Do ne pa petu ne ri ko, di ri ko ne jhamma ta rihi mappe ne perui heddau ri heddau, rowi do toi ke ri di ma, adho ke do rajja ri Muri ne medae ta dakka.

²⁶Rowi ki nga ne lii do petu do ngati Deo ne do alle ke pepedhae pa di, tapulara jhe do pee ma di nga tao loro ne lubhu harro nga menyilu ne nga hengaja, moko adho ke do era ri ne bhara tu nu nga menahu tu ta pehai-pehuba ne lubhu harro nga menyilu di.

²⁷ Ne do era tu di wata ke ta la penaja la era happo hala ngati Deo, jhe ne ai lua kete nga bubu dhara No do medae ta tunu pekappu ladu-ladu ne ddau-ddau do pelawa petaddhu nga No!

²⁸ Ne ddau do dho pedhanno nga uku do wie ri Musa he, do ta wolo nga do dho bhule lua pehuba, ki nga padhara lilolo do dhue-ttallu hakahi, do teleo ke no ta do hala.

²⁹ Do dhai rihi apa ri ko ne mejanni ne lua wolo tu ddau do jhalle do kerupe Ana Deo. Ddau do napoanne do ege ta do woapa ne raa lipejaji Deo ne, lua made Kristus ne, do pemo no ngati lubhu harra nga menyilu. Ri no ta kare ta menihe Henga mone wie lua ruba dhara ne.

³⁰ Do toi ke ri di, nadu No do pali, ”Do medae ta bhale ri Ya! Do medae ta wolo ri Ya!” jhe lii ri, ”Muri do medae ta happo ne hala-ludu annu-niki No.”

³¹Do dhai tarra ne meliri dhara ki bui la dhara wolaabba Deo Do Muri ne!

³²Henge we ne jhara lua Tuahhu-tuahhu he pa awe do ludu he. Pa awe do naanne, ta dakka ne lua weo nga kana Deo la pekelale pa mu, do ae mu ne do nga dhui hape hedui-herui, tapulara pe ma mu nga titu halla-anni nga do dho bhule ta kerattu.

³³Do ki nga nga marra do kara do menihi mu, jhe tao ne lai-lai do woapa penaja nga mu pa hedhapa ddau lowe. Do ki nga nga marra mu lema do ta dutu hela'u ta dhui nga ro do na harre,

³⁴jhe mu lema do dutu hari ta hedui nga ddau do pemaho la dhara ammu bhaddo. Jhe pa dhara awe raba hari-hari ne unu oha mu he, ta hammi he we ri mu nga mengallu dhara, rowi do toi ke ri mu ta do era ko hahhi ne do rihi woie do unu ri mu, do dho i'a ele lohe la lo dho do nami mii ne.

³⁵Rowi do mina harre ke, bhole atta dhara we, rowi ki do pee ko ma mu nga parahajha, moko do era ma ne pai-pala do mone-ae tu mu.

³⁶Do jhamma ke mu ta makka tee nga wangnge ko mita nara mu ta tao ne do ddhei Deo, jhe ri do mina harre ke do ta hammi ke ri mu ne nga ne do jaje ri No.

³⁷ Rowi pa dhara Buku Lidara-Likewahhu Deo do hure do bhuke, ”Wata ke pa dhara hekedhiki he ke, moko No ne do ta dakka ne, do ta dakka ke nga henginga; adho ke do pelajho ri ne lua dakka No.

³⁸Jhe ne annu-niki Ya do mola do mira he do ta parahajha ke jhe muri mada; tapulara ki do era ti telora ro do nuni-anni, moko Ya adho do mengallu dhara penaja nga no.”

³⁹Di hede adho annu-niki do ta nuni-anni, nga do huli nga teballi. Tapulara, do hedhe annu-niki do parahajha pa Deo nga do pehelama ri No.