Read Sabu IBRANI 11 Bible Online

IBRANI 11 - Sabu bible

IBRANI 11

¹Do era nga lua manno nga kaho, do ne pa petu ne, do ketarra nga petu-tu pa lai-lai do henao ne, do ne pa petu ne, do ketarra pa dhara ade pa lai-lai do dho ngadde ri namada.

²Rowi, ri do manno do kaho ke, moko ne ddau ddau do pa awe do uru he, do mengallu dhara Deo penaja nga ro.

³ Taga tari do manno do kaho ke, moko ta toi ke ri di ta do liru nga raiwawa do nadhe do peera ri lidara Deo, ne nga we ne do ngaddi ri namada, do tao ngati ne nga do dho ngaddi ri namada.

⁴ Taga tari do manno do kaho ke, hakku jhole ri Habel pa Deo ne bhara tunu nga menahu do rihi woie ngati bhara tunu nga menahu Kain. Taga tari lua manno nga kaho no ke do naanne, hakku ta hamme ke Habel ri Deo mii ddau do woie, ro ri do teleo ke ta do hamme ri Deo ne bhara jhula no. Alla ke Habel pemade, tapulara taga tari lua manno nga kaho no, hakku pee ko ma no nga pedaili lohe ma dhara awe nadhe.

⁵ Taga tari do manno do kaho ke, hakku made dho Henokh, tapulara ta dhede jhe aggo no la nga Deo. Bhule dho heddau heddau he do nara ta ngadde no, rowi do alle ke no pe dhede ri Deo. Pa dhara Buku Lidara-Likewahhu Deo do bhuke ta do nga do dho dhede dae Henokh, do pemengallo dhara Deo ri no.

⁶Ki do adho do era nga lua manno nga kaho, bhule dho heddau he do nara ta pemengallo dhara Deo. Rowi ne ddau do dakka la nga Deo do jhamma ta do parahajha ta do era Deo jhe ri Deo do ta wie ne libhale pa ddau do name do kale No.

⁷ Taga tari do manno do kaho ke, hakku ta peke ke ri Deo pa Noh, ne jhara lai do medae ta jadhi dhai leto, do adho dae da nara ta ngadde ri no. Noh do pedhanno nga Deo, hakku tao ri no hewue kapa do dhai ne pa pedakka do pehelame ne ngi'u no nga ana-oha no. Ri loro jhara do mina harre ke raiwawa ne wole jhe bhale Noh miha taga ri lua manno nga kaho no ta peteleo ke ri Deo, ta mii heddau do woie.

⁸ Taga tari do nga lua manno nga kaho ke, hakku ta pedhanno ke Abraham nga Deo, ta dhai ta pedoe no ri Deo, jhe lii ta kako la rai do jaje ri Deo tu no. Moko ta pekaddhi ke Abraham nga do dho toi ta kako ju la mii no.

⁹ Nga lua manno nga kaho, ta pee ke Abraham mii ddau do wala rai pa rai do jaje ri Deo ne. Pee Abraham pa anne pa dhara ammu ngati bhalla-lai. Mina harre lema Ishak nga Yakub, do hamme ne lijaji do hela'u ngati Deo.

¹⁰Rowi pa dhara nga mate-mate ko ri Abraham ne rae do ta peito nga do ta petito ne ri Deo pa era titu do rui.

¹¹ Taga tari do manno do kaho ke, hakku ta nara ke Abraham ne kolo loro nga ti Sara, maji lema ta do dhai weka ke Abraham jhe Sara le miha do kebaki. Do ketarra ri Abraham ta do ta petobe ri Deo ne lijaji No ne.

¹² Maji lema Abraham pa awe do naanne do dho hala ke mii ddau do alla ke pemade ne ngi'u no, tapulara nara ko ma no ne rukolo do ae, do dho makka ta kire ne ae ro — do mii ae moto pa ihi liru nga mii ae wolahalae pa tabbi dahi he.

¹³ Hari-hari ne ddau do na harre do pee ma nga manno nga kaho tade made. Hammi dho ri ro ne lai-lai do jaje ri Deo he, tapulara wata ke ta heleo jhe hammi ngati jjhau we ri ro. Jhe ri do mina harre ke ta peteleo ke ri ro wata ke ta mii ddau do ta melero he we ro pa raiwawa do nadhe.

¹⁴Ri ddau do lii mina harre ta peteleo ke nga teleo ta do ro, do pa dhara nga kale ne rai do medae ta jadhi ta rai nga liha ro.

¹⁵Adho rai nga liha do alle pehane ri ro ne do peito-perijho ri ro he. Rowi ki do mina harre, moko do dhai ae ke ne awe tu ro, tu ta bhale la rai do naanne.

¹⁶Tapulara ne do teleo, do pee ma nga ito nao-ai ri ro, hewue ne rai do rihi woie, ne rai do naanne, rai do pa era do mmau do megala ne. Ri do mina harre ke, hakku mekae dho ne dhara Deo, ki nga pale No ta Deo ro, rowi do alle ke pepemoke ri Deo hewue ne rae tu ro.

¹⁷ Taga tari do manno do kaho ke, hakku ta jhole ke Ishak ri Abraham mii bhara tunu nga menahu ta dhai ta hakko no ri Deo. Pa Abraham ke ne wie ri Deo ne lijaji No, ta mina harre lema ta o'o he we Abraham ne ana no do henamuhi ddau ne.

¹⁸ Do alla ke Deo pe lii pa Abraham, ”Ti Ishak do nadhe ke, do medae au ta nara ne kolo loro do jaje ri Ya ne pa au.”

¹⁹Do ketarra ri Abraham ta do medae ma ri Deo ta pemure bhale wari Ishak ngati lua made mada.

²⁰ Taga tari do manno do kaho ke, hakku ta jaje ke ri Ishak ne lua tarro ie nga menyarro mangngi pa Yakub nga Esau tu awe do ta hedhape.

²¹ Taga tari do manno do kaho ke, hakku nga do dho made dae Yakub, ta wie ke ri no ne lua tarro ie nga menyarro mangngi pa ana-ana Yusuf he — nga pelaga-anni pa hu kajji no, jhe wie hu nga mejura no pa Deo.

²² Taga tari do manno do kaho ke, hakku Yusuf — pa awe ta umu ne no ta ma de — ta pedae ke ri no ne jhara lua mahhu-anni do Israel ngati Mesir, jhe hane ri no ne litakka jhara lua ne nga ne do jhamma ta tao penaja nga ngi'u no ki alla ke no pemade.

²³ Taga tari do manno do kaho ke, hakku ta pewune ke Musa ri ina-ama no pa dhara tallu warru ne tui ta alla no pemetana. Ta heleo ri ro ne naiki do naanne ana do mone-ie, jhe meda'u dho ro ta pelawa nga lipereda duae.

²⁴ Taga tari do manno do kaho ke, hakku ta dhai Musa ta kepai, wae dho ke no ta pedoe ta ana ri ana mobanni ngati duae Mesir ne.

²⁵Do rihi ddhei no ta hedui-herui hela'u-la'u nga annu-niki Deo, ngati muri mada tu do hemelila he we pa dhara mengallu dhara do kenani pa dhara lubhu harro nga menyilu.

²⁶Do toi ke ri Musa ma ta do rihi ne woie tu ta nara lua kara nga menihi ta ga Duae Mone ma'i-Mone golo do jaje ri Deo ne, ngati nara hari-hari lua kaja nga kete'e pa rai Mesir, rowi do henao ri Musa ne pai-pala mangngi do pa awe do ta hedhape ne.

²⁷ Taga tari do manno do kaho ke, hakku ta hane ke rai Mesir ri Musa nga dho bhule lua meghighi meda'u penaja nga lua bubu dhara duae. Dabbho teru Musa petuje ne lua pedabbho no, mii do ngadde he ke Deo do dho ngadde ri namada ne ri no.

²⁸ Taga tari do manno do kaho ke, hakku ta tao ke ri Musa ne lua nga'a Paskah ne, jhe pereda ta pihi ri raa pa ubha kelae ammu do Israel he mita ie ne Naju Made mada he ta do dho la pemade ne ana-ana mone a'a he ngati do Israel.

²⁹ Taga tari do manno do kaho ke, hakku nara do Israel ta pagge Dahi Mea, mii do narru pa kolo lede do kemangu he we ro, jhe bhale ma ne do Mesir he ta janna bholo-ngala ke, jhe dalla nga hobha ri dahi ne, pa awe ta hakko ta pagge ri ro ne dahi do naanne.

³⁰ Taga tari do manno do kaho ke, hakku nara ri do Israel ta pekeloli ne tebo-tebo pa Yerikho ne ta alle ri ro pepekehero pa dhara pidu lodho peduke-duke.

³¹ Taga tari do manno do kaho lema ke, hakku jadhi dho Rahab, mobanni do kerejhe ne, ta pemade hela'u-la'u nga ddau-ddau do pelawa petaddhu nga Deo he; rowi do hammi nga mahu ri no ne do Israel do la kale-toi dhara rae Yerikho ne.

³² Nah, do nara he we ya ta pedai-peahhe, tapulara bhule dho ke ne awe tu ya. Rowi pedae de dho Gideon, Barak, Simson, Yefta, Daud, Samuel, nga nabi-nabi he ri ya.

³³ Taga tari do manno do kaho ke, hakku nara ri ro ta pejharra ne raipereda-rai pereda do pemuhu nga ro he. Do tao ri ro ne nga ne do mola do mira ne, hakku nara ta hamme ri ro ne nga ne do alle pejaje pa ro ri Deo. Nara ri ro ta henabbhi ne ubha hinga-hinga he,

³⁴ ta pemade ai do kedu-kedaru ludu ngati rakka kelewa do tabbhu pa ro he. Do rogho do keloe ro, tapulara jadhi ro ta do rui do kedi, do dhai kemelo ro pa dhara pemuhu hakku pejharra ri ro ne ihi muhu-ihi lawa ngati ddau do wala rai.

³⁵ Taga tari do manno do kaho ke, hakku nara ri mobanni-mobanni he ta hammi bhale wari ne ddau-ddau ro do alla pemade he. Era ri do pemoko-anni ta dede ta merahhu tade made, jhe wae dho ta golo nga ti ammu bhaddo, rowi do ddhei ta pemuri bhale wari tu hahhi lua muri mada do rihi woie.

³⁶ Era do dede do merahhu ri gui, do kara do menihi, do petuki ri rate jhe pemaho la dhara ammu bhaddo.

³⁷ Kajji-kebii ri wowadu tade made, era do rodo ri rodo, era do para ri kelewa tade made. Bela nga lappa ro la hebhakka-hebhakka, nga pake bhara ngati kuri ki'i jhawa kiadho ti kuri ki'i hawu; do kehia nga gahara ro, do hudhi-do peraga, nga do dede do dhaba.

³⁸Raiwawa do nadhe adho do jhamma tu ro. Do bela do lappa pa dhara kebhalla-ae nga pa kolo lede kolo bhojo, jhe do pee pa ro'a lie-ro'a lie nga pa ro'a-ro'a worai.

³⁹Do dhai tarra ne mone-ae ne lua nara do kajhe-dhae ri hari-hari ddau do na harre taga tari lua manno nga kaho ro! Tapulara hammi de dho ri ro ne nga ne do jaje ri Deo ne pa ro,

⁴⁰rowi Deo do nga lua pedabbho do rihi woie tu di. Ne lua pedabbho No, nadhe ke, do wata ke ta hela'u nga di, do medae ke ro ta jadhi ta keteme.