Read Sabu IBRANI 12 Bible Online

IBRANI 12 - Sabu bible

IBRANI 12

¹Nah, jhara lua di miha, do ae tu-tu ne hakahi do lao do ridhe di! Rowi do mina harre ke, mai we di ma hora hari-hari ne do pemejanne di, nga lubhu harro nga menyilu do pee nga keparre pa di. Jhe mai we di ma perai takka-kattu pa lua peuji do nee do hedhape ri di dhe.

²Do jhamma ke ne namada di ta pee nga petuje pa Yesus, rowi No ke ne do pemuri ne lua manno nga kaho di nga do piare-peloje ne lua manno nga kaho di rai ngati petari lohe la pedakka rahi. Do makka tarra Yesus ne dhui hape hedui-herui pa kolo ajhu ketoe ne. Adho No do pedhuli ta do ne lua made pa kolo ajhu ketoe ne ta hahhi lai do ta pemekae dhara. Ne do henge ri No wata ke lua mengallu nge nga kehaka dhara do medae ta narro ta lake ri No pa awe do ta hedhape ne. Pa dhara awe nadhe nnai ke No do mejaddhi pa hebhakka kedhanga kedera era mejaddhi Deo jhe pereda hela'u-la'u nga Deo.

³Hakko ko ta dhino mina mii ne worawwu mejanni ne lua hedui-herui Yesus, pa dhara penaja nga ddau-ddau do nga lubhu harro nga menyilu do mina harre ne worawwu pekiho ngutu ne pelawa-petaddhu nga No! Rowi do mina harre ke bhole wonaiki ne ade mu jhe atta dhara.

⁴Rowi pa dhara lua pelawa-pedhutu nga lubhu harro nga menyilu, ngaddi de dho mu ta pelawa-pedhutu tade dhuti raa.

⁵ Jhe bhole peballo we ri mu ne litakka Deo, do wie pa mu mii ana-ana ri No: ”Woo ana Ya, dhanno we pewoie-ie ne liajha Muri, jhe bhole wonaiki ne ade mu kinga dhai No ta bhani nga mu.

⁶Rowi do ta ajha ri Muri nadu we ne ddau do ddhei No, jhe do ta wabba ri No nadu we ne ddau do hammi ri No ta mii ana No.”

⁷Do jhamma ke ri mu hammi ne gui wolo Deo mii hahhi liajha ngati heddau ama. Rowi ngaddi marra ta era heddau ana ta do dho wolo ri ama no?

⁸Kiadho ke mu do dutu le ta wolo mii hari-hari ana no do hewala he, hela'u he ke mu mii do adho ke ta ana do petu ne, tapulara mii ana jhara tele he we.

⁹Do nga ama di pa raiwawa do nadhe. Ri no do ajha di, jhe ri di do takke pekerihe no. Nah, mina mii ri ko Ama lua manno nga kaho di do pa era do mmau do megala ne, do bhara tatu ke ta do rihi ri ko ri di ne takke No pekerihe, mita ie di ta muri mada.

¹⁰Ina-ama di do pa danni raiwawa do nadhe, do ajha di pa dhara awe do era nga lua pewata, pedutu nga ne nga ne do penge ri ro ta do woie. Tapulara ajha di ri Deo tu lua ie di ma miha, mita ie di, jadhi ta mmau ta megala hela'u le mii No.

¹¹Tarra ma pa dhara awe ajhe ne di, ne lua wolo do naanne adho do pemengallo ne dhara di, tapulara do ta pehedue we ne ade di. Tapulara kialla pemina harre, tu di do alla peajha he, ne lua wolo do naanne do ta pejadhe di ke ta muri mada nga pedute ne lua do ddhei Deo, jhe peera pa di lua kehaka dhara ne.

¹² Rowi do mina harre ke, perue-pekedi we ne ruai au do keloe ne nga kattu rutu au do keraggu ne.

¹³ Narru loro we pa loro jhara do mira, mita do dho he bhalli ne kae au do kai do kedhangngi ne, tapulara ta ju ie ri we.

¹⁴La'a-rui we tu ta muri mada nga pedhuri-pemira nga hari-hari ddau. Jhe la'a-rui lema we tu ta muri mada nga mmau nga megala, petone we ta tu Muri. Rowi bhule dho heddau he do nara ta ngadde Muri ki do adho no do muri mada mina harre.

¹⁵ Jaga we mita do dho era ie ta heddau he ti telora mu do mahhu-anni ti era lua lua woie ade Deo, mita do dho era mina naajhu do nga raho he pa telora mu, jhe pedubhe ne lua hedui nga peapa do ae ddau ri raho ngati no ne.

¹⁶ Jaga we mita do dho era do muri mada pa dhara lua bute nga jhagga dhawu ki adho do dho pedhuli nga lai-lai do ddhei Deo, mii do tao ri Esau he. Do pewie ri no ne haa no mii haa ana-mone-a'a, hadhi mita nara hemago bhara nga'a we.

¹⁷ Do toi ma ri mu, ta do dhai la leto ri, ta ddhei ri ke Esau ta nara ne lua tarro ie nga menyarro mangngi ne ngati ama no, tapulara wie dho ke pa no. Rowi maji lema nga tangi pedihi-noho ne kale ri no ne loro jhara tu ta peie ne lua hala tao no do naanne, adho ke do era ri ne loro jhara tu lai do naanne.

¹⁸ Tuahhu he adho ke do dakka ta ma penaja nga hahhi lai ri, mii do hedhape ri do Israel do uru he. Ne do hedhape ri ro he hahhi lai do nara ta bhuje Lede Sinai do nga ai do kedu-kedaru, do penaja ro nga lua kerabba, lua kerabba-guru-rai guru wadu nga raga nga opo;

¹⁹do penaja ro nga lii kedu-kadarru wotabbe, nga lii kedu-kedarru do dhai meliri dhara. Ta dhai ta rangnge ri do Israel ne lii kedu-kedarru do naanne, ta ggai-rai ke ro ne ami, mita ie ne lii do naanne ta pengaha ne pedai lii nga ro.

²⁰ Rowi do dho makka ke ro ta dhanno ne lipereda do pedhae lii do napoanne. Rowi do lii mina hedhe ne lipedai do naanne, ”Hari-hari do roh ne lede do naanne, adho do pedhuli, ie ta bhada kiadho ie ta nadu we, do jhamma ke no ta kajjhe ri wowadu tade made.”

²¹ Ne nga ne do ngadde ri ddau-ddau do Israel, do dhai tarra ne meliri dhara ta lii Musa, ”Meda'u nga kerighi-keraggu ya.”

²²Tapulara mu ri, hee ke mu do dakka ma Lede Sion nga rae Deo do muri ne, Yerusalem do era pa era do mmau do megala ne, jhe nga do tabbha-tabbha naju No he.

²³Hee ke mu ma pedutu hahhi lua peowu-peteni do dhai rame — lua peowu-peteni ana-ana mone-a'a ngati Deo, do ne ngara ro do huri do bhuki ke pa dhara buku do era pa era do mmau do megala ne. Ne dakka mu ta ma penaja tanga-ma da nga Deo, Mone happo hala hari-hari ddau raiwawa. Mu do ma penaja nga henga henga ddau do ie, do alla ke pepejadhi ta do keteme.

²⁴ Ne dakka mu ta ma penaja nga Yesus, Mone Pehiri tu lipejaji do wowiu ne; mu ma penaja nga raa do pihe ne, do ta ma peparro ne lai-lai do dhai rihi woie ngati do peparro ri raa Habel ne.

²⁵ Rowi do mina harre ke, meniga we mu pewoie-ie, mita bhole dhai mu ta do dho wae ta dhanno ta tenae No do pedai lii do naanne. Ro do dho wae ta pedhanno nga No do dakka ma danni raiwawa dhe, jhe do ma pedhae ne lii do ngati Deo ne, adho ke do nara ta petegalli-anni ri ngati dhara wolaabba No. Mina mii ri ko di do na hedhe do rangnge ke ne lipedai No do ngati era do mmau do megala ne. Ki dho wae ke di ta pedhanno nga No, mina mii ri di ne nara ta ludu!

²⁶ Pa dhara awe do naanne ne lipedai No do pekebhadde-hagaliga raiwawa. Tapulara pa dhara awe nadhe ta jaji ke No, ”Hewari ri, do medae ri Ya ta pekebhadde-haga-liga adho ke ta raiwawa nadhe we tapulara liru lema.”

²⁷Ne lipedai ”hewari ri” ta peteleo ke ta do hari hewue raiwawa do alle pepeera do nadhe, do medae ta kenyoke pekeridho-radho jhe awe la kejhunga, mita ne do hiha ne, wata ke do dho nara ta kenyoke pekeridho-radho ne ke.

²⁸Rowi do mina harre ke, do jhamma ke di ta peha'e kolo lii ie-ae pa Deo, rowi do hamme ke ri di ngati No hewue rai pereda do dho nara ta kerattu wari ri. Do jhamma ke di ta peha'e kolo lii ie-ae, jhe wie hu nga mejura pa Deo nga pewawa-anni jhe meda'u, pedute ne loro jhara do ddhei No miha.

²⁹ Rowi Deo di do mii ai he do pekappu ladu-ladu ie ta ne nga we.