Read Sabu IBRANI 13 Bible Online

IBRANI 13 - Sabu bible

IBRANI 13

¹Do jhamma ke mu ta pee loro nga pehajha-peddhei heddau nga heddau, mii do Herani do petuahhu.

² Bhole pekebhe'e-anni ta ammi ddau la ammu mu, ddau-ddau do dho tada dae ri mu. Rowi ri lua tao do mina harre ke do era ddau nga do dho toi dae ri no miha ta do alla ke no pe hammi naju Deo la dahara ammu no.

³Henge we ne ddau-ddau do pa dhara ammu bhaddo, mii mu he le ne do era pa dhara ammu bhaddo hela'u nga ro. Nga ddau-ddau do e'e ne ddhei we ddau ta tao pa ro, do jhamma ke ri mu ta henge ro, mii do mu he le ne do tao ri ddau do mina harre.

⁴Do jhamma ke ri hari-hari ddau ta pedhelo pa wue muri mada ro, do takke pekerihe ne lua banga-ammu, ri do mina harre ke, momone nga mobanni do jhamma ke ta henono-henarru heddau penaja nga heddau. Ddau do kenyo langa huka nga do bute do medae ta wolo ri Deo.

⁵ Bhole we ne muri mada mu ta kepie-keparre nga mada doi, tapulara do jhamma ke ta waji we ne ri ne nga ne do era pa mu. Rowi do alla ke Deo pe lii, ”Adho au do medae ta hane ri ya, kiadho ta pejjhau-anni ngati au.”

⁶ Rowi do mi na harre ke, hakku bhani di ta pali, ”Muri ke ne Mone rabhe nga dharro ya, meda'u dho ke ya. Ne nga ke ne do nara ta tao ri ddau raiwawa penaja nga ya?”

⁷Bhole ballu we ri mu ne mone bhau-bhata mu he, do pedhai ne lira'a-litakka do ngati Deo he pa mu. Heleo we ri mu ne muri mada ro nga mina harre lema ne made ro, jhe pedutu we ne lua manno nga kaho ro.

⁸Yesus Kristus do pee ta hela'u we, ie ta pa awe do uru ne, pa dhara awe do nadhe nga lohe la lodho do nami mii ne.

⁹Bhole hani we hari-hari ne liajha do huli do teballi he, ta pe huli nga teballi mu. Ne ade di do jhamma ke ta perue ri lua woie ade Deo, naanne ke ne do woie, bhole ri, ri lilara-lilara jhara lua bhara nga'a he. Ddau ddau do uru he, do pedutu ne lilara-lilara do na harre, bhule dho ta nara ne lua mangngi ne nga-nga.

¹⁰Di do nga hewue dhea era tunu-menahu tu ta jhole ne bhara tunu-menahu di pa Deo. Jhe ne mone tunu-menahu mone tunu-menahu do pemane pa dhara Ammu bhalla-lai unu Deo ne, adho do era nga haa do ie ta nga'a ne bhara tunu-menahu do pa dhida dhea do naanne.

¹¹ Raa bhada do jhade mii bhara tunu-menahu tu lua pehai-pehuba lubhu harro nga menyilu ne do aggo ri Mone tunu-menahu Mone-ae la dhara Kama do rihi Wiki Mmau nga Megala ne, tapulara ane ngi'u bhada ne do tune pa tele ngati dhara rae Ammu do naanne.

¹²Ri do mina harre ke, hakku Yesus lema do made pa tele ngati ubha toka rae tu ta pemmau-pema'i ne annu-niki No ngati lubhu harro nga menyilu ri raa No miha.

¹³Rowi do mina harre ke, mai we di ma kako la nga No, do pa tele ngati dhara kewolo ammu he jhe dutu ta ka re ta menihe hela'u-la'u nga No.

¹⁴Rowi pa raiwawa bhule dho ne era pee do peloro tu di, ne do kale ri di era pee do medae ta dakka ne.

¹⁵Rowi do mina harre ke, nga pelake jhara Yesus, do jhamma ke di ta wue waje Deo loro-loro; napoanne ke ne bhara tunu nga menahu, kolo lii ie-ae di pa No, ne do jhole ri di tu ta pedhede-pekelode ne ngara No.

¹⁶Bhole peballu-anni we ta tao ne lua do woie jhe perabha-pedharru we heddau nga heddau, rowi lai-lai do na hedhe ke ne bhara tunu nga menahu do pemengallo dhara Deo.

¹⁷Pedutu we ne lipereda mone bhau nga bhata mu he, jhe pewawa-anni we pa ro. Rowi ro ke ne do loro-loro ne do heleo ne lua helama ngi'u mu, jhe ro ke ne do nga lua titu pa hedhapa Deo. Kido pewawa-anni ke mu pa ro, do nara ke ro ta jhagga nga mengallu dhara, kiri do adho, moko do medae ke ro ta jhagga nga hedui ade, jhe ne naanne adho do wie ne lua mangngi pa mu.

¹⁸Hebhajha we loro-loro wie jhi. Do ketarra ri ji ne ade nga penge jhi do mmau, rowi pa dhara hari-hari lai, ne ddhei jhi ta tao ne lai do petu ne we.

¹⁹Rihi-rihi ne ami ri ya nga petarra-tarra, mita ie ke mu ta hebhajha tu ya, mita ie ta aggo bhale wari nga henginga ri Deo la nga mu.

²⁰Alle ke ri Deo pepemure Muri di Yesus ngati lua made mada. Ri lua made No do naanne, pa dhara awe nadhe, No ke ne do jadhi ta Mone Bhata Mone-ae ne tu di do naki'i-naki'i No. Ri lua made No ke do naanne, ta perue ke ne lipejaji do peloro ne, do tao ri Deo ne nga di.

²¹Ne henao ri ya, Deo do kepue kehaka dhara ne ta penabbu mu hari-hari do ie he do paralu he tu mu do pedute ne lua ddhei No. Ki ie mudhe he nga pelake jhara Yesus Kristus ta jhagge ri Deo pa dhara di, ne nga ne do ddhei No. Do jhamma ke Kristus ta wue ta waje lohe la dhara lodho do nami mii ne! Amin.

²²Ne menangnge ri ya he, mita ie ke ta dhanno ri mu hari-hari ne lira'a-litakka ya do na hedhe nga merai dhara, rowi ne huri ya do nadhe do rihi ne merai.

²³Do jhamma ke ta toi ri mu, ta do tuahhu di Timotius do alle ke pegole ngati dhara ammu bhaddo. Ki nga dakka no ma nga ya, do ta aggo no ri ya hine, ki nga dhai ya ta kako la heahu mu.

²⁴Pedhai we ne lipelangu jhi pa hari-hari mone bhau-mone bhata mu nga pa hari-hari annu-niki Deo he. Hammi lema we ne lipelangu tuahhu-tuahhu do ngati Italia he.

²⁵Ne henao ri ya, ki ie mudhe he ta wie ri Deo ne lua tarro ie nga menyarro mangngi tu Tuahhu-tuahhu he hari-hari.