Read Sabu IBRANI 4 Bible Online

IBRANI 4 - Sabu bible

IBRANI 4

¹Nah, ne lijaji Deo ne do pee ko ma hape ma dhara awe do nadhe, jhe do medae ta wie pa di ne lua pengaha-ihi do jaje ri No ne. Hakku, do jhamma ke ta jage ri di mita bhole era ie ta heddau he ngati telora mu do dho narro ne lua pengaha-ihi do jaje do jaje do naanne.

²Rowi ne Li Hagha Dhara ne, do alle ke pepeke pa di hela'u lema mii pa ro he. Maji lema ta mina harre, pa ro ne lii do naanne bhule dho nga guna. Rowi ta rangnge, wae dho ro ta parahajha.

³ Tapulara di do parahajha he do hamme ke ne lua pengaha-ihi do jaje ri Deo ne. Napoanne do penau ke nga ne nga ne do pale ri Deo, mina hedhe, ”Do bubu dhara ke ya jhe pehupa, ’Adho ke ro do medae ta maho tu ta nara ta la pengaha-ihi hela'u nga Ya.’ ” Pali Deo mina harre maji lema ne lua jhagga No do moko ke rai ti awe ta peera ne ri No raiwawa do nadhe.

⁴ Rowi jhara lodho do kepidu ne, do era ma do hure do bhuke pa dhara Buku Lidara-Likewahhu Deo mina hedhe, ”Pa lodho do kepidu ne ta pengaha-ihi ke Deo, ngati hari-hari lua jhagga No.”

⁵ Jhara lua do naanne do bhuke ri mina hedhe, ”Adho ro do medae ta maho la dhara rai do naanne tu ta nara ta pengaha-ihi hela'u nga Ya.”

⁶Hakku ro ne do petari-tari do rangnge ne Li Hagha Dhara do naanne, nara dho ta hamme ne lua pengaha-ihi do naanne rowi do dho parahajha ro. Ki do mina harre do teleo ke ta do era ddau-ddau do wala do ie ta hamme ne lua pengaha-ihi do naanne.

⁷ Rowi do alle ke pepetato ri Deo helodho do wala ri, do pale ta ”Lodho do nadhe.” Ttau-ttau ta alla pe mina harre ta pedae ke ri Deo ri, ne jhara lai do napoanne pelake jhara Daud, pa dhara lilolo do ngine ne, ”Kinga rangnge ke ri mu pa dhara lodho do nadhe ne lipedai Deo, bhole keti ri we mu, mii do tao ri ama-appumu pa awe pelawa-petaddhu he ro nga Deo.”

⁸ Ki ta unu pala he do alla ke pe wie ri Yosua ne lua pengaha-ihi do jaje ri Deo ne, moko pedae dho ke ri Deo jhara lua lodho do wala ri.

⁹Hakku, tu annu-niki Deo do era ri ko ma ne li jaji tu ta pengaha-ihi mii Deo do pengaha-ihi pa lodho do kepidu ne.

¹⁰ Rowi ne ddau do hamme ne lua pengaha-ihi do jaje ri Deo ne, do medae ta pengaha ngati hari-hari jhagga no hela'u le mii Deo.

¹¹Rowi do mina harre ke, mai we di ma wohe la'a rui nga petu-petarra tu ta hamme ne lua pengaha-ihi do jaje ri Deo ne. Bhole era ie ta heddau he ngati di do dho dhae ta hamme mii ro le do uru he, taga tari do dho parahajha ro pa Deo.

¹²Lipedai Deo, lipedai do muri jhe do rui; do rihi na'a ngati kelewa rakka dhue. Ne lipedai do naanne do tabbhu lohe la era pewata pa telora hemanga nga henga; hape la wata kewahhu-kewahhu nga rui dhole, hakku do dhai toi tade meramma-ramma ne lua penge nga lua pedabbho ade ddau raiwawa.

¹³Bhule dho hahhi he ngati do kemuki do pehuni-peniti ngati dhara namada Deo. Hari-hari ne nga we do boke petelale-alle pa hedhapa No. Jhe di do jhamma ke ta wie ne libhale pa No.

¹⁴Rowi do mina harre ke, do jhamma ke di ta kedhagu perui pa lua ketarra lua parahajha di. Rowi di do nga Mone tunu-menahu Mone-ae, do maho lohe la hedhapa Deo — Yesus, Ana Deo ne.

¹⁵Ne Mone tunu-menahu Mone-ae di ne adho mone tunu-menahu do dho nara ta dutu hela'u ta narro-ta leke ne lua rogho nga keloe di. Do rihi ri ti naanne, alle ke No pehakko pa dhara hari-hari la lai, do hela'u lema mii di miha, tapulara we, adho No do ngaddi ta tao lubhu harro nga menyilu.

¹⁶Rowi do mina harre ke, mai we di ma kako nga dhai bhani dhallu la hedhapa Deo do parru lua pereda nga ade do woie. Do ta hajha ta ddhei Deo nga di, jhe do medae ta wie ne lua tarro ie nga menyarro mangngi tu di, mita ie di pa awe do petu ne ta nara ne lua ruba dhara no.