Read Sabu IBRANI 5 Bible Online

IBRANI 5 - Sabu bible

IBRANI 5

¹Mone tunu-menahu Mone-ae do na mii we, do pidhe ngati telora annu-niki jhe dhede ta pekako lua jhagga tu Deo mii wake ngati ro. Ne tenge No tu ta jhole ne bhara jhula-bhara jhula nga bhara tunu-menahu pa Deo tu ta pehai pehuba lubhu harro nga menyilu.

²Mone tunu-menahu mone-ae do naanne dhangnge ma miha do keloe pa dhara ae lua, jhe taga ri do mina harre ke hakku do dhai lumu nga majho no penaja nga ddau-ddau do dho i'a nga-nga, do huli do teballi ne loro jhara kako ro.

³ Jhe taga tari no miha do keloe, do jhamma ke no ta jhula bhara tunu nga menahu, adho ke ta tu lubhu harro nga menyilu ddau lowe we, tapulara tu lubhu harro nga menyilu no lema.

⁴ Bhule dho heddau ddau he do dhede wari-anni ne ngi'u no jadhi mone tunu-menahu mone-ae. Ne jadhi ddau ta mone tunu-menahu mone-ae, ki pedoe no ri Deo ta tu lai do do naanne — hela'u mii Harun.

⁵ Mina harre lema Kristus. Dhede dho wari-anni ta jadhi Mone tunu-menahu Mone-ae. Deo miha ne do dhede No, Ane Deo langngu No, ”Au ke ne Ana Ya; pa dhara lodho do nadhe ke ne jadhi Ya ta Ama ri Au.”

⁶ Pa era do wala ri do pali lema Deo, ”Au ke ne mone tunu-menahu ne lohe la lodho do nami mii ne, mii Mone tunu-menahu Melkisedek.”

⁷ Pa dhara awe muri mada ne Yesus pa raiwawa do nadhe, hebhajha No jhe ami do nga peka jhe do nga tangi pa Deo, do nara ta pelude No ngati lua made mada. Jhe taga tari do pewawa-anni No pa Deo, jhe do dhai tarra ne pewawa-anni, moko ta hamme ke ri Deo ne liami No ne.

⁸Yesus Ana ri Deo, tapulara maji lema ta mina harre, petima-anni No ta pewawa-anni, do pelake jhara lua hedui-herui No.

⁹Moko ta alla No pejadhi ta Mone ma'i-Mone golo do keteme, ta jadhi ke No ta kepue lua helama tona ie do peloro tu hari-hari ddau do pe pewawa-anni pa No,

¹⁰jhe ri Deo lema ta peteleo ke No ta mii Mone tunu-menahu Mone-ae, mii Mone tunu-menahu Melkisedek!

¹¹Jhara lua era mejaddhi Yesus mii Mone tunu-menahu Mone-ae, hee do ae ne do jhamma ta peke ri jhi pa mu, tapulara do hedui ne peteleo ne do naanne pa mu, rowi do dhai ramu tarra mu jhe itu tada.

¹² Do ne pa tu ne do awe ke tu mu ta jadhi guru, tapulara, ne do teleo dhe mu do ie ko ta ajha ti ddau do wala jhara lua kepue-kepue do petari ngati liajha Deo. Nara de dho mu ta hammi bhara nga'a do adu; do jhamma ta nginu ei-huhu he ko we mu.

¹³Ddau do pee nga nginu ei-huhu ko, do pee ko ma no ta namea, adho dae do lai nga-nga dae jhara lua do petu nga do hala.

¹⁴Bhara nga'a do adu tu ddau do kepai rowi do ae ke ne do narro do lake ri no, do nara ke ta petala nami do woie nga nami do woapa.