Read Sabu IBRANI 6 Bible Online

IBRANI 6 - Sabu bible

IBRANI 6

¹Rowi do mina harre ke mai we di ma aggha ju la liajha-liajha do rihi me ramma ri jhara lua kepai pa lua muri mada Herani, jhe bhole we, ta pee nga parru pa kepue-kepue do petari ne we ngati aigama di dhe. Bhole bhale ri la liajha do petari ne, do jhamma ke ddau ta pengaha ti tao ne lai-lai do dho bhule nga pejhara jhe do jhamma ke ta parahajha pa Deo,

²kiadho liajha do pejhari jhara lua pejhiu, kiadho jhara lua dhede ruai pa wokolo ddau, kiadho jhara lua muri bhale wari kialla pemade, kiadho jhara lua wolo do peloro ne.

³Mai we di, ki nga o'o Deo, ma aggha la liajha do meramma ri.

⁴Rowi ne ddau-ddau do alla pekbhatto ne ade ro, adho ke do nara ri ta arri kattu. Do uru he ro do era ke pa dhara teleo ngati Deo, jhe do narro do lake ke ri ro ne lua ruba dhara Deo. Do alla lema ke ro pehelibhu ri Henga Deo.

⁵Do tada ke ro ma ngati lua do narro ri ro he, ta ne lepedai Deo do woie, jhe do toi ke ri ro ma ne karunya-karunya do tobo ri kuaha pa awe do medae ta dakka ne hine.

⁶Tapulara ta alla pemina harre ta kebhatto ke ne ade ro jhe naja-anni ngati Deo! Mina mii ne nara ro ta hewai-hewewe tu ta bhale wari, tu ta jharra ngati lubhu harro nga menyilu ro. Rowi pa dhara awe na dhe do nee pa dhara raje nga ketoe peabbha-rappa ri ke Ana Deo ri ro, jhe pahe No tu kare nga menihe pa hedhapa ddau lowe.

⁷Worai do hemuhi ei-ajjhi do tima pa dhida no, jhe pemuri ne naajhu do nga guna tu ddau do habhe no, worai do naanne do wie ri Deo ne lua tarro ie nga menyarro mangngi.

⁸ Tapulara ki do pemuri widu nga naajhu do dudu do kan na moko worai do naanne bhule dho nga guna jhe do medae ta wie ne lua unu kolo taddhu ri Deo, jhe pedakka rahi ta tune pekappu ladu-ladu.

⁹Tapulara woo Tuahhu ddhei ya, maji lema jhi ta lii mina harre, tapulara do ketarra ri jhi, jhara lua tuahhu he. Do ketarra ri jhi, do alla ke ri mu pehammi ne lai-lai do rihi woie, lua mangngi-lua mangngi do mii hulai ngati lua helama mu ne.

¹⁰Deo adho Deo do bibhi-hebakka. Adho ri No do ballu ne nga ne do tao ri mu tu No nga lua hajha ddhei do pedhelo ri mu pa No, pa dhara awe ruba dhara mu nga tuahhu-tuahhu do hela'u lua manno nga kaho he pa awe do uru he.

¹¹Do ddhei tu-tu jhi mita ie mu heddau nga heddau ta pee nga mappe loro hape la pedakka rahi, tade hamme ri mu ne nga ne do ito nao ai ri mu ne.

¹²Ddhei dho jhi ta jadhi ta do meidha mu. Tapulara ne ddhei jhi, mita ie mu ta pee nga keharru-kelidu hape la pedakka rahi, jhe ri do mina harre ke ta nara ke ta hamme ri mu ne nga ne do jaje ri Deo, taga tari do parahajha pa No nga do pa dhara nga halla-anni ne mate No.

¹³Ta dhai Deo ta pejaji nga Abraham, do pehupa No ta do ta petobe ri No ne nga do alle pejaje ri No. Jhe taga tari do bhule ke do rihi dhida ri ngati Deo, moko ta pehupa ke No pa dhara ngara No miha.

¹⁴ Ta lii ke No, ”Pejaji ya, do ta wie ri ya ne lua tarro ie nga menyarro mangngi tu au, jhe pejadhi ne kolo loro au ta do ae.”

¹⁵Ta mate ke ri Abraham nga penina, moko ta hamme ke ri no ne nga ne do jaje ri Deo ne pa no.

¹⁶Kinga pehupa ddau, do pehupa pa dhara ngara ddau do rihi dhida ri ngati no, moko ri lihupa do napo anne ta pehappo ke hari-hari lua pebhata.

¹⁷Ta ddhai ke Deo ta perue ri pa ddau-ddau do hamme ne lijaji No he, ta adho ke No do medae ta lare ri ne lua pedabbho No ne. Ri do mina harre ke ta pebhuwe ke ri No ne lihupa pa lijaji No ne.

¹⁸Dhue lai do na harre adho ke do nara ri ta lare. Dae dho ke Deo ta pote ri pa lihupa nga lijaji No he. Rowi do mina harre ke, di ne do pehuri-anni pa Deo, do wie ke pa di ne lua pedidi do rui tu ta parru pebharra-bharra pa lua henao do walle pa hedhapa di ne.

¹⁹ Ne lua henao do naanne do mii tenagha do kanynya dhai meramma he, jhe jadhi ta mii era parru do rui nga do kedi'i tu muri mada di. Ne lua henao do naanne do tore pemejarri ke ne didi do pewate Kama do wiki rihi Mau ne nga Kama do mau do megala ne pa dhara Ammu Deo ne.

²⁰ Yesus ke mone jhuru kattu do boke ne loro jhara ju la era do naanne tu di. Alla ke No la ni ta jadhi Mone tunu-menahu Mone-ae unu di tu hape la lodho do nami mii ne, mii Mone tunu-menahu Melkisedek.