Read Sabu IBRANI 7 Bible Online

IBRANI 7 - Sabu bible

IBRANI 7

¹ Melkisedek dhe Duae ngati Salem jhe Mone tunu-menahu ngati Deo do Mone wiki Rihi dhida nga kelodo ne. Ta dhai Abraham ta bhale ngati era muhu jhe pejarra ne duae-duae he, ta dakka ke Melkisedek la hapo Abraham, jhe wie ne tarro ie nga menyarro mangngi pa Abraham.

²Moko ta wie ke ri Abraham pa Melkisedek bhagi henguru ngati hari-hari ti ne nga we ne do nara no ti dhara muhu ne. (Nagara Melkisedek, ne pedabbho do petari-tari, ”Duae Mola Mira” jhe taga tari no duae ngati Salem, moko ne ngara no lema do pale ta, ”Duae lua kehaka dhara.”)

³Jhara lua Melkisedek dhe bhule dho do peteleo ie ta pa mii we ta do era nga ama nga ina kiadho nga ama-appu; bhule le dho ma ne lipejhara jhara lua metana no. No mii heddau Ana Deo; no heddau mone tunu-me nahu do peloro.

⁴Hakku, ngadde ri di pa dhe mina mii mone-ae Melkisedek dhe, do mina harre ne worawwu mone-ae no, hakku Abraham le, ama-appu ddau rai di, do wie pa no bhagi henguru ngati ne nga we ne do nara Abraham ngati dhara pemuhu ne.

⁵ Pa dhara uku aigama Yahudi do petakke ke ta do nemone tunu-menahu do kolo loro Lewi he do jhamma ta hammi bhagi henguru ngati nga'a nara do Israel, do tuahhu ri ro dhangnge ma miha, maji lema ro ta do hela'u-la'u kolo loro Abraham.

⁶Melkisedek ado kolo loro Lewi, maji lema ta mina harre, do hamme lema ri no bhagi henguru ngati ne nga ne do nara Abraham ti dhara pemuhu ne, jhe wie ri no ne lua tarro ie nga menyarro mangngi wari pa Abraham, rowi do alla ke no pehammi liajha ngati Deo.

⁷Do tarra ma ta do adho ke do nara ta bhate ri ta do ne ddau do wie lua tarro ie nga menyarro mangngi ne do rihi dhida ngati ddau do hamme ne lua tarro ie nga menyarro mangngi ne.

⁸Mone tunu-menahu do hammi bhagi henguru he, ddau-ddau do nara ta made. Tapulara pedutu nga Buku Lidara-Likewahhu Deo, Melkisedek do hammi bhara jhula do bhagi henguru ne; ddau do pee ma nga muri.

⁹Ki ta ie ta lii, Lewi — do ne kolo loro no he do hammi bhagi henguru ngati nga'a nara do Israel — do maho le ke ta do ma'i ne bhagi henguru do naanne pelake jhara Abraham, pa awe ma'i ne harre pa Melkisedek.

¹⁰Maji lema Lewi ta do dho medata dae, tapulara do ie ke di ta lii, do era ke no pa dhara ngi'u Abraham ama-appu no ne, pa awe peabu ne Melkisedek nga Abraham.

¹¹Pa dha'i pereda mone tunu-menahu-mone tunu-menahu Lewi he, ta wie ke ne uku aigama Yahudi pa do Israel. Taga tari do dho nara ta pekako nga keteme ri mone-tunu menahu do uru he ne nga do jhamma ta pekako ri ro, moko do jhamma ke ta era ri mone tunu-menahu do wala, mone tunu-menahu do mii Melkisedek jhe do adho ngati kejie Mone tunu-menahu Harun ri.

¹²Nah, ki do pelari ke ne era mejaddhi mone tunu-menahu he, moko uku aigama Yahudi do jhamma lema ke ta do lare ke.

¹³Ne do pedabbho pa dhe ne, wala wari dho ke ngati Muri di: No ngati huhu do wala, jhe ngaddi de dho ta era heddau he ngati huhu No do jadhi ta mone tunu-menahu.

¹⁴Ri hari-hari ddau do toi ta do Muri di ngati huhu Yehuda; jhe ngaddi dho ta pale ri Musa ne huhu do naanne pa awe pedae ri no jhara lua mone tunu-menahu he.

¹⁵Lai do pedae do nadhe do jadhi ke ta rihi teleo ri, ri lua hhau heddau mone tunu-menahu do wala do mii Melkisedek.

¹⁶Ne dhede No ta jadhi mone tunu menahu ne adho do do jhalli pa lai-lai do petakke ri ddau raiwawa, tapulara do parru pa lua muri mada No do nga kuaha ne jhe do dho bhule nga pewata ne.

¹⁷ Rowi pa dhara Buku Lidara-Likewahhu Deo do pale mina hedhe, ”Au ke ne mone tunu-menahu lohe la lodho do nami mii ne, mii Mone tunu-menahu Melkisedek.”

¹⁸Hakku pa dhara awe nadhe, ne uku do dui ne do awe la kejhunga ke, ro wi adho ke do rui jhe bhule dho ke nga guna nga-nga ri.

¹⁹Uku aigama Yahudi nara dho ta tao ne nga-nga ri ta jadhi ta peketeme. Ri do mina harre ke ta wie ke pa di pa dhara awe nadhe hahhi lua henao do rihi woie; jhe ri lua henao do naanne ta nara ke di ta hedharre-hedakke Deo.

²⁰Hari lema, hari-hari ne napoharre do lere ri lihupa ngati Deo. Bhule dho lihupa do mina harre pa awe ta dhede he ne mone tunu-menahu do wala he.

²¹ Tapulara ta dhai ta dhede Yesus ta jadhi Mone tunu-menahu, do pake lihupa pa awe lii Deo pa No, ”Alla ke Muri pepehupa, jhe adho ke No do i'a lari-anni ri ti lua petitu No, ’Au ke ne maone tunu-menahu lohe la dhara lodho do nami mii ne.’ ”

²²Ri nadhe ri ke Yesus ne jadhi ta mii era parru tu hahhi lipejaji do rihi woie.

²³Nee ri ko hahhi lai ri: mone tunu-menahu do wala he do lowe, rowi do he ddau-ddau do ta made, hakku adho do nara ta pekako teru ne lua jhagga ro.

²⁴Tapulara Yesus do muri loro lohe la lodho do nami mii ne, hakku ne lua jhagga No mii heddau mone tunu-menahu adho ke do nara ta lare ri pa ddau do wala.

²⁵Rowi do mina harre ke, hakku lohe la lodho do nami mii ne, do nara ri Yesus ta pehelama ne ddau-ddau do dakka langa Deo, lake jahara No, rowi do muri No lohe la lodho do nami mii ne, tu ta pedhae pa Deo ne liami tu ddau-ddau do na harre.

²⁶Hakku Yesus ke ne Mone tunu-menahu Mone-ae ne, do kale ri di ne. No do mmau do megala, pa No adho do era nga hala nga ludu, kiadho lubhu-harro nga menyilu ne nga we. No do petale ngati ddau-ddau do nga lubhu harro nga menyilu, jhe do peha'e lohe la era do rihi dhida ngati hari-hari ihi liru.

²⁷ Adho No mii mone tunu-menahu Mone-ae do wala he, do helodho-helodho do jhamma ta jhula bhara tunu nga menahu, taga lubhu harro nga menyilu ro ko uru, jhe itu ri tu lubhu harro nga menyilu ddau lowe. Yesus wata hewari we ne jhula bhara tunu nga menahu tu hape la lodho do nami mii ne, pa awe jhole ri No ne ngi'u No miha mii bhara tunu nga menahu ne.

²⁸Pa uku aigama Yahudi ddau do dho keteme ne do dhede ta jadhi mone tunu-menahu mone-ae. Tapulara we, leto ngati uku do naanne, ta tao ke ri Deo ne lijaji nga pake lihupa ta do ta dhe de ri No mii Mone tunu-menahu Mone-ae, Ana do alle pepejadhe ta Mone-ma'i Mone-golo do keteme lohe la lodho do nami mii ne.