Read Sabu IBRANI 8 Bible Online

IBRANI 8 - Sabu bible

IBRANI 8

¹ Ne kepue ngati hari-hari lipedai do na hedhe, nadhe ke: Di do nga Mone tunu-menahu Mone-ae do mina harre ke, do mejaddhi ta pereda hela'u nga Deo do Mone Rihi Wiki Mone-ae ne, pa era do mmau do megala ne.

²Ne jhagge ri No ne tenge mii heddau Mone tunu-menahu Mone-ae pa Kama do Rihi Mmua nga Megala ne, do pa dhara Ammu Bhalla-lai Muri do petu ne, do petito ri Muri mi ha, adho ri ddau raiwawa.

³Nadu we ne mone tunu-menahu mone-ae, do dhede tu ta la jhula bhara tunu-menahu, kiadho bhara jhula pa Deo. Mina harre lema ke ne Mone tunu-menahu Mone-ae di ne, do jhamma ke No ta do era hahhi bhara jhula tu ta jhole pa Deo.

⁴Ki ta unu pala he do era No pa raiwawa do nadhe, adho No do medae ta jaddhi mone tunu-menahu, rowi do era ke mone tunu-menahu do jhula bhara tunu-menahu do dhuke ri uku aigama Yahudi.

⁵ Lua jhagga do tao ri ro mii mone tunu-menahu he, ne pa petu ne mii hahhi telia nga raimawo he we ngati ne nga do era pa era do mmau do megala ne. Ne telia do naanne do alle ke pepeke ri Deo pa Musa, pa awe do uru he, pa awe ta ddhei ne Musa ta petito Ammu Muri do ti bhalla-lai ne. Mina hedhe ne lii Deo pa Musa, ”Henge we! Hari-hari ne na harre do jhamma ta tao ri au pedute nga wue do alle pepedhelo ri ya pa au pa ko lo lede ne.”

⁶Tapulara pa awe nadhe Yesus ke ne do nara ne tenge mone tunu-menahu do dhai kelodo ne ngati do jhagga ri mone tunu-menahu do na harre. Rowi ne lipejaji do tao ri No pa telora Deo nga ddau raiwawa, lipejaji do rihi woie rowi do jhalli pa lipejaji tu lai-lai do rihi woie.

⁷Kita do adho he ta do era ne lua kura nga gahara pa lipejaji do petari-rai ne, moko tenge dho ke ta tao ri ne lipejaji do kedhue ne.

⁸ Tapulara do ngadde ke ri Deo ne lai do hala pa annu-niki No, hakku ta lii ke Deo, ”Henge we do medae ta dhai ne awe ne, do medae ri Ya ta tao ne lipejaji do wowiu nga do Israel, nga do Yehuda.

⁹Adho do mii lipejaji do tao ri Ya nga ama-appu ro he pa awe lere nga kelau he ro ri Ya ta mahhu-anni ngati dhara rai Mesir. Adho ro do henarru pa lipejaji do tao ri Ya ne nga ro; rowi do mina harre ke hakku adho ke Ya do pedhuli nga ro.

¹⁰Tapulara pa dhara awe nadhe, nadhe ke ne lipejaji do medae ta tao ri Ya nga do Israel pa lodho-lodho do ta medae, ane Muri: Do ta takke ke ri Ya ne dara ya pa dhara penge ro, jhe bhuke pa dhara ade ro. Ya ke ne do ta jadhi Deo ro jhe ro ke ne do ta jadhi annu-niki Ya.

¹¹Adho ke ro do tenge ri ta peajha nga ddau ro kiadho ta pepeke ri pa tuahhu ro ’Tade we Muri.’ Rowi hari-hari do kepai nga do naiki, do medae ta tade Ya.

¹²Ri Ya do ta pehuba ke ne hala nga ludu ro, jhe adho ke do henge wari ri ne lubhu harro nga menyilu ro.”

¹³Nga pedhae ri ne hahhi lipejaji do wowiu, ta tao ke ri Deo ne lipejaji do petari ne ta do dui ke jhe do bura ke; jhe ne nga ne do dui ne, do ta ele ke nga henginga.