Read Sabu IBRANI 9 Bible Online

IBRANI 9 - Sabu bible

IBRANI 9

¹Lipejaji do petari ne do nga lua do petatu ke jhara lua wie hu nga mejura, jhe do era lema ne era tu ta wie hu nge mejura do tao ri ruai kolo ku'u ddau raiwawa.

² Do petito hewue ammu bhalla-lai, jhe ne kama do pa hedha pa ne do pehune ta kama do Mua do megala. Pa kama do naanne do era hahhi era pejaddhi lapu, jhe do era lema meja do nga roti do ta jula pa Deo.

³ Ju la dhara ne ri pa hebhakka ri bhalla-lai do pewate kama do kedhue ne do pale ta Kama do Rihi Wiki Mmau nga megala.

⁴ Pa dhara kama do naanne do era hewue era tunu-menahu do tao ngati mela lara tu ta tunu dhupa nga do era lema ne Patti Lipejaji, do lape ri mela lara hari ta hewue. Pa dhara patti do naanne era he wue arrubbhahi mela lara do ihe ri manna, kajji Harun do muri ri namelija ne, nga dhue bhue wowadu do wo kebhila, jhe pa dhida wowadu do na harre do bhuki ri henguru lipedara Deo.

⁵ Pa dhida patti do naanne era do dhue Kerub do nga rualla do mii telia ta do era Deo pa anne. Ne rualla ngati hari do dhue Kerub do na harre, do lagghe pehereba pa dhida ketanga patti do naanne, do napoanne ke ne pehai-pehuba lubhu harro nga menyilu ne. Tapulara pa awe nadhe nara de dho ta pejhare nga kenyajjhe.

⁶ Mina harre hari-hari ne peato. Helodho-helodho ne mone tunu-menahu he, ma ho la dhara kama do pa hedhapa ne ngati ammu bhalla-lai do naanne tu ta la pe kako ne lua jhagga ro.

⁷ Ne do maho la dhara kama do rihi hape la dhara ne ngati ammu bhalla-lai do naanne, wata ke mone tunu-menahu Mone-ae we. Ne maho no la anne wata ke hewari we pa dhara hewue ttau. Ne maho no la anne do nga aggu raa ta la jhole pa Deo, tu ngi'u no miha nga taga lubhu harro nga menyilu do tao nga do dho toi ri annu-niki No.

⁸Ri lua peato do mina harre ke, ta pedhelo nga teleo ke ri Henga Deo, ta do kinga do era ko ma ne kama do pa hedhapa ne ngati ammu bhalla-lai do naanne do pee ko ma nga titu, ne rujhara maho ju la dhara Kama do Rihi Wiki Mmau nga Megala ne nara de dho ta boke.

⁹Nadhe mii telia ke pa dhara awe nadhe; do ne pa petu ne ta do ne bhara jhula-bhara jhula nga bhada-bhada tunu-menahu do tunu do menahu pa Deo he, adho do nara ta peketeme ne ade nga penge ddau do aggu bhara jhula he.

¹⁰Rowi ne lua pemane-lua pemane do na harre wata ke do pedu nga bhara nga'a, bhara nginu nga heworawwu-heworawwu lua pemmau-anni we. Hari-hari ne na poharre wata ke lua peato-lua peato jhara lua do ngadde ri na mada we, jhe do nara ta peke wata ke tade dhai la awe tao pewowiu ri Deo.

¹¹Tapulara alla ke Kristus pe dakka mii Mone tumu-menahu Mone-ae ngati lai lai do woie, do lore ke peera. Ne Ammu bhalla-lai Muri ne, do paanne ke Kristus ne jhagge ne lua jhagga No mii heddau Maone tunu-menahu Mone-ae, ammu bhalla-lai do rihi kelodo nga do dhai keteme. Ne ammu bhalla-lai do naanne adho do tao ri ddau raiwawa, adho ngati raiwawa do nadhe.

¹²Kristus ke ne do maho la dhara Kama do Rihi Wiki Mmau nga megala do pa dhara ammu do naanne wa ta ke hewari we tu hape la lodho do nami mii ne. Pa dhara awe do naanne adho No do nga aggu raa ki'i hawu mone kiadho raa nahapi tu ta jhole mii bhara jhu la; ne do aggo ri No wata ke raa No dhangnga ma miha, jhe ri naanne ke ne peballa-kattu di ri No tu hape la lodho do nami mii ne.

¹³ Raa ngati ki'i hawu nga hapi mone mina harre lema awu ngati ana hapi do tune, do pake tu ta pihi ne ddau-ddau do nga rue nga taru pedutu nga lua do peato ri uku aigama, mita jadhi ro ta mmau ta megala. Nah, kinga raa nga awu do na harre do nara ta pemmau ne lua rue nga taru ddau-ddau do na harre,

¹⁴rihi-rihi ri ko raa Kristus ri. Pelake jhara Henga do peloro ne, ta jhole ke ri Kristus ne ngi'u No miha pa Deo mii bhara tunu-menahu do keteme. Raa No ke ne do pemmau pemegala ne ade nga penge di ngati lua pemane pa dhara aigama do dho bhule nga guna he mita nara di ta pemoke Deo do muri ne.

¹⁵Rowi do mina harre ke, do jadhi ke Kristus ta Mone Titu pa Telora tu hahhi lipejaji do wowiu, mita ne ddau do alla pepedoa ri Deo he nara ta hammi ne lua tarro ie nga menyarro mangngi do peloro ne, do alle pejaje ri Deo ne. Hari-hari ne na poharre ne nara ta jadhi taga tari do era ke ne do alla pemade, Kristus; jhe ne lua made No do naanne ta peballa kattu ddau ke ngati hala nga ludu do tao ri ro he pa dhara awe parro ko ri ro ne lipejaji do petari ne.

¹⁶Ki do era ne huri puhaka ne, do jhamma lema ke ta do era ne tada ta do ne ddau do tao ne huri do na poanne do alla ke pemade.

¹⁷Rowi huri puhaka adho dae do nara ta pake ki do muri ko ne ddau do tao huri do naanne. Ne nara ta pake ne huri do naanne ki do alla ke pemade ne ddau do naanne.

¹⁸Rowi do mina harre ke, ne lipejaji do petari ne do jhamma ke ta perue ri raa.

¹⁹ Uru jhara-jhara pedhae ri Musa hari-hari ne lipereda ngati lidara Deo pa do Israel. Ta alla pemina harre ta aggo ke ri Musa ne raa nahapi nga raa ki'i hawu mone, jhe la pehiwu nga eiloko, ta alla pemina harre ta pihi ke ri no pa Buku Lipedara ngati Deo ne, jhe mina harre lema pa hari-hari do Israel nga pake ru jhu'u hisop nga rrau ki'i jhawa do mea adu.

²⁰Pa dhara nga pihi ri Musa ta pali ke Musa, ”Nadhe ke ne raa do ta perue ne lipejaji do ngati Deo ne do jhamma ke ta pedute ri mu.”

²¹ Ta alla pemina harre nga loro jhara do hela'u ta la pihe ke ri Musa ne raa do naanne lema la Ammu bhalla-lai Muri ne, nga pa hari-hari nalu tu lua wie hu nga mejura he.

²² Do tarra ma pedutu nga uku aigama Yahudi, miga ta hari hari ie ta ne nga we do pemmau-pemegala ri raa; jhe lubhu harro nga menyilu ne nara ta pehai-pehuba wata ke kinga era raa do pehute.

²³Ri loro jhara do mina harre ke ne bhara do mii telia lai-lai do era pa era do mmau do megala, do paralu ta pemmau-pemegala. Tapulara tu lai-lai do era pa era do mmau do megala ne miha do paralu bhara tunu-menahu do dhai rihi woie.

²⁴Rowi adho Kristus do maho la dhara Kama do Mmau do Megala do tao ri ddau raiwawa do wata ke ta mii telia he we ngati Kama do Mmau do Megala do pe tu ne. Kristus do maho la era do mmau do megala ne ke miha, pa ni No pa dhara awe nadhe do mengadha nga Deo tu lua parahu di.

²⁵Mone tunu-menahu Mone-ae do Yahudi, hewue ttau-hewue ttau, maho la dhara Kama do Rihi Wiki Mmau nga Megala do pa dhara Ammu Deo ne, do nga aggu raa hengi'u bhada. Tapulara Kristus adho do maho kebhali-bhali ta la jhole ne ngi'u No.

²⁶Rowi ki do mina harre ke, napoanne ne pa petu ne do alla ke pejhajhi-jhajhi-wari No, ne dhui hape hedui-herui rai ti awe ta peera raiwawa do nadhe. Tapulara do teleo ke pa dhara awe nadhe, hewari we No ne dakka ta ma pehai-pehuba lubhu harro nga menyilu nga loro jhara jhole-pae ne ngi'u No miha.

²⁷Do alle ke pepetakke ri Deo ta ddau raiwawa do hewari we ne made jhe ki alla ke pemina harre ta pehappo he ke ne hala ro ri Deo.

²⁸ Mina harre lema Kristus, hewari we ne jhole ri No ne ngi'u No mii ki'i para-manu hiba tu ta pehai-pehuba lubhu harro nga menyilu do ae ddau. Do medae ta dakka ri No pa awe do kedhue wari ne; adho ke ta ma pemoko lua lai lubhu harro nga menyilu, tapulara tu ta ma pehelama ne ddau-ddau do mate ne lua dakka No ne.