Read Sabu YAKOBUS 1 Bible Online

YAKOBUS 1 - Sabu bible

YAKOBUS 1

¹ Tuahhu-tuahhu annu-niki Deo hari-hari do menyabbha pa hari hewue raiwawa! Lipelangu ngati ya Yakobus, annu Deo nga annu Muri Yesus Kristus.

²Tuahhu-tuahhu ki nga peabu mu nga heworawwu-heworawwu ruhakku, do jhamma ke ri mu ta hammi mii lua mangngi he.

³Rowi do toi ke ri mu ma, ta do kinga pee ke mu nga parahajha pa Muri, pa dhara peabu mu nga ruluji-ruhakku, ne pe dakka ne, nadhe ke: do ta jadhi ta do makka tee ke mu.

⁴Jage we mita ne lua makka tee ade mu ne pe nga ju teru tade dhai mu ta jadhi tarra-tarra ta kete-me mu jhe bhule dho ke mu nga lua kura nga terujha ri pa dhara lai ne nga we.

⁵Kinga era heddau pa telora mu do dho lohe i'a ne pepagha-penge do jhamma ke no ta ami ngati Deo ne lua do naanne, moko do ta wie ma ri Deo pa no ne lua mmau dhara do naanne; rowi tu nadu we, do ta wie ri Deo nga ade do ruba dhara jhe do nga hajha nga ddhei.

⁶Tapulara ne ddau do ami ne, do jhamma ta parahajha, ie dho no ta kedhue-kepapi. Rowi ddau do kedhue-kepapi, do dho hala ke mii kolo nawa pa dhara dahi do wi'o ri ngallu he la hebhakka-hebhakka.

⁷Ddau do mina harre, adho do titu halla-anni ne lua penge no; nara dho ta aggu lihappo nga-nga pa dhara hari-hari lai do jhagge ri no. Rowi do mina harre ke, tenge dho ke no ta henao ne nga-nga ngati Muri.

⁹Do Herani do kehia do jhamma ke no ta mengallu nge nga kehaka dhara kinga pedhede no ri Deo.

¹⁰ Jhe do Herani do kaja do jhamma ke no ta mengallu nge nga kehaka dhara lema kinga pewawe no ri Deo. Rowi ddau do kaja do medae ta marra mii wila jhu'u he.

¹¹Pa awe hhau lodho jhe pana dhai keti, moko ne wila ju'u do naanne do medae ta merajhu jhe keloro, ta ele lema ke ne lua ga nga jhamma no. Mina harre lema ke nga do kajha; do ta lawo-tebho-ttei no pa dhara nga jhagge ri no ne lua jhagga no.

¹²Mangngi nga mengallu dhara tu ddau do makka tee nga wangnge kinga narro nga lake ri no ne ruluji-ruhakku ne. Rowi ki do nara ke no ta makka tee pa dhara penaja nga ruluji-ruhakku naanne, do medae ke ri no ta hamme ne pai-pa la no, muri mada do jaje ri Deo pa ddau-ddau do ddhei nga Deo.

¹³Kinga luu ke heddau ri ruluji-ruhakku do mina harre, bhole lii ma no, ”Ne ruluji-ruhakku do nadhe, dakka ngati Deo,” rowi Deo adho do nara ta hakko ri lua apa nga kerewe, jhe adho lema No do hakku ie ta nadu we.

¹⁴Tapulara ne lakka ddau ri ruluji-ruhakku, kinga happe no jhe kepie-kepie no pa lua ddhei no miha do apa do kerewe ne.

¹⁵Ki alla ke pemina harre, ki pedute ke ri no ne lua ddhei no do apa do kerewe ne, moko ta metana ke ne lubhu harro nga menyilu ne, jhe kinga ihi ne lubhu harro nga menyilu ne; ne pedakka ngati naanne lua made ne ke.

¹⁶Bhole luu mu. Tuahhu-tuahhu do hajha do ddhei ya!

¹⁷Ne nga we ne lua ruba dhara do woie nga lua parahe do keteme do dakka ngati era do mmau do megala, do pepure ri Deo, do mone peera hari-hari ie ta ne nga we do teleo pa ihi liru. No ke ne Deo do dho i'a lari-anni ne, jhe do adho lema do peera lua kerabba do na mii we.

¹⁸Ti lua ddhei No miha, alla ke di petao ri No ta ana-ana No, pelake jhara lidara No do petu ne. Ne tao ri No mina harre, mita nara ke di ne era do kerihi ne pa telora hari-hari do kemuki do peera ri No he.

¹⁹Helao we ne nadhe pewoie-ie! Tuahhu-tuahhu do hajha-do ddhei ya! Heddau-heddau do jhamma ta hewakka ne dhanno, tapulara bhole hewakka ne pedai lii, jhe adho do henginga ne ha'e bubu dhara.

²⁰Ddau do bubu dhara, adho ke do nara ta tao ne lai do woie, do pemengallo dhara Deo.

²¹Rowi do mina harre ke, hora we ne lua petima-anni pa lai do ra'i do tongo nga lai do apa do kerewe. Hammi we nga wawa nge danni ade ne lipedai do halle ri Deo pa dhara ade mu, rowi ne lipedai do naanne, lua rui nga kedi do tu ta ma pehelame mu ke.

²²Do jhamma ke ri mu ta jhagge ne do pale ri Deo, bhole ta dhanno he we, jhe ki ta dhanno he we, nnau mii do ta pebhalle ngi'u mu dhangnge ma miha.

²³Ddau do dhanno ne lipedai Deo, tapulara adho do lere ri wui ai-wui tao, do dho hala ke mii ddau do pa dhara ketarre ne worawwu no do petu-tu ne pa dhara leo rawwu.

²⁴Ki alle ke ri no peketarre pewoie-ie, jhe kako no, ta ballo dhangnge ke ri no, mina mii ne worawwu no ne.

²⁵Lai do dare ri Deo do keteme, jhe nga lua rui tu ta peballa kattu ddau raiwawa. Jhe ne ddau do ddhei ta kale toi jhe pedute nga woie-ie, jhe do jhagge ne lai-lai do dare ri Deo he, nga do adho do tee ta dhanno he we jhe ballo dhangnge, tu ddau do na poanne do medae ta wie ri Deo ne lua tarro ie nga menyarro mangngi pa ne nga we ne do jhagge ri no.

²⁶Kinga era heddau ddau do toi ke ri no ne ngi'u no, ta no heddau do kenanno pa dhara aigama, tapulara adho do nara ri no ta jage ne we'o no, moko no dhangnge ma ne do pelue ne ngi'u no miha.

²⁷Lua kenanno pa dhara aigama do petu-petarra ne, do pedutu nga lua tada Deo Ama, na hedhe ke: ruba dhara nga nalalu-naleto nga mobanni do bhalu do ula do hedui-herui, jhe do jage ne ngi'u no miha mita do dho peape ri raiwawa do nadhe.