Read Sabu YAKOBUS 2 Bible Online

YAKOBUS 2 - Sabu bible

YAKOBUS 2

¹Tuahhu-tuahhu ya! Mii ddau do parahajha pa Muri Yesus Kristus, Muri do Mone Rihi Wiki Dhida nga Kelodo ne, bhole we mu ta petala-tala ddau taga tari lua-lua do ngadde ri namada dhe we.

²Rowi kinga era ke heddau do kaja do nga pake teru'u mela lara jhe nga pake bhara do woie do dakka la dhara lua peowu mu, jhe dakka ri heddau do kehia do nga pake bhara do kejai-jai,

³moko do ta takke pekerihe ri mu ne ddau do nga pake bhara do woie ne. Do ta lii mu pa no, ”Tua, mai ma mejaddhi pa kedera do rihi woie do nadhe.” Tapulara pa ddau do kehia ne, ne lii mu, ”La titu la nidhe,” kiadho, ”Ma mejaddhi ma wo rai pa dhe.”

⁴Ri wui-ai do mina harre, do petala-tala ke ri mu ne ddau nga ddau ihi-anga mu, jhe peege kebhue ddau ri mu pedutu nga lua penge mu do woapa ne.

⁵Henge we, Tuahhu-tuahhu do ddhei ri ya! Ddau do kehia nga gahara he pa raiwawa do nadhe, do pidhi ri Deo ta jadhi ddau do kaja pa dhara lua manno nga kaho. Ddau do na harre do jadhi ta ai-alla annu-niki Deo, mii do alla pejaji ri Deo, mii do jaje ri No pa ddau do ddhei nga No.

⁶Tapulara ne do tao ri mu ju ta kara ta menihi ri we ne ddau do kehia nga gahara, jhe ne pa petu ne ddau-ddau do kaja he do jhalli do kerupu mu nga do nuni do pera'u mu la hedhapa kattu!

⁷Ro ke ne do kare do menihe ngara do dhida do ketutu ne, do hamme ri mu ngati Deo ne.

⁸ Do jhagga lai do petu ke ri mu, ki do petobe ke ri mu ne uku Raipereda do era pa dhara lilolo Buku Lidara-Likewahhu Deo do nadhe, ”Hajha-ddhei we nga ddau nga ddau ihi-anga hela'u le mii ddhei nga ngi'u mu miha.”

⁹Tapulara ki do petala-tala ke ddau ri mu nga jhalli pa lua do ngadde ri namada we, napoan ne ta tao lubhu harro nga menyilu we mu jhe ri lai do dare ri Deo ne do peteleoke mu ta do pehihu-pejhajjhi ke mu nga do dare do kewahho ri Deo ne.

¹⁰Ddau do hiho jhajjhe hala hahhi he we ngati lai-lai do dare do kewahho ri Deo ne, napoanne do hihu do jhajjhi hari-hari ke ngati lai-lai do dara do kewahhu do na harre.

¹¹ Rowi do lii ta, ”Bhole kenyo langa huka,” napoanne lema ke do li ta, ”Bhole pemade ddau.” Hakku ki do dho kenyo langa huka ke mu, tapulara do pemade ddau, moko do pee ma mu ta do hiho do pagge ne nga we ne do dare do kewahho he.

¹²Pedai lii we jhe jhagga we, mii ddau do ta pereha he ne hala pedute nga lii do dare do kewahho ri Deo do peballa kattu ddau raiwawa.

¹³Rowi Deo adho do medae ta pedhelo lua ruba dhara pa ddau do dho bhule nga lua ruba dhara. Tapulara lua ruba dhara do rihi ne rui ngati lua wolo.

¹⁴Tuahhu-tuahhu! Ne nga ke ne guna we, kinga lii ddau, ”Ya dhe ddau do parahajha”, kiadho ke do pedhelo ne lua parahajha no ne pa dhara wui ai-wui tao no? Nara marra ne lua manno nga kaho do mina harre ta wie pa no ne lua helama?

¹⁵Kita era he heddau tuahhu kiadho heddau nawanni do ta paralu nga bhara pake jhe do adho lema ke do era nga bhara nga'a tu do helodho-helodho ne.

¹⁶Ne nga ke ne guna kinga lii mu pa no, ”Pake we ri au ne bhara mita do dho meringi jhe nga'a we au!” — jhe do adho do wie ri au ne nga ne do paralu ri no tu ta muri mada?

¹⁷Mina harre lema nga lua manno nga kaho, ki do dho pedute ri wui ai-wui tao, moko bhule dho nga lua guna nga-nga.

¹⁸Wue marra ta era do lii, ”Era ddau do peini-anni pa lua manno nga kaho no jhe era lema do peini-anni pa wui ai-wui tao no.” Do medae ri ya ta bhale, ”Pedhelo ko we pa ya mina mii ddau ne nara ta era nga lua manno nga kaho nga do adho do lere ri wui ai-wui tao, jhe do medae ta pedhelo ri ya, ri wui ai-wui tao ta do ya dhe, do nga lua manno nga kaho.”

¹⁹Do parahajha mu ta Deo, titu wata ta do hahhi we, we adho? Nah, henga-henga kerabba lema do parahajha jhe do kerigghi-keraggu ri meda'u.

²⁰Do dhai bhodho mu! Do paralu ko ma ke ta peteleo pa mu, ta do bhule ne guna ta era lema nga lua manno nga kaho ki do dho lere ri wui ai-wui tao?

²¹ Heleo we Abraham ama-appu di. Do hamme nga woie no ri Deo taga tari wui ai-wui tao no, pa dhara jhole Ishak ri no, ana no ne, pa Deo pa dhida dhea era tunu-menahu ne.

²²Pa dhe ke ne teleo, ta do ne lua manno nga kaho ne do jhamma ta pedhelo ri wui ai-wui tao mita jadhi ta ke teme.

²³ Napoanne do penau nga lilolo pa dhara Buku Lidara-Likewahhu Deo do nadhe, ”Abraham do parahajha pa Deo jhe ri lua manno nga kaho no do naanne, ta hamme ke no ri Deo mii heddau do jhagge ne lua ddhei Deo.” Ri do mina harre ke, hakku pale Abraham ta, ”Ihi-anga Deo.”

²⁴Teleo ke pa awe do nadhe, tu do ne hamme no nga woie ri Deo, taga tari ne nga ne do tao ri ddau do naanne, jhe adho taga tari lua manno no he we.

²⁵ Heleo lema we Rahab, mobanni do woapa muri mada ne. Hamme no nga woie ri Deo, taga tari wui ai-wui tao no, pa awe hammi ri no la dhara ammu no ne mone pehodho dhara-dhara ti do Israel he, jhe kale ne loro jhara mita nara ro ta perai peludu-anni lake jhara rujhara do wala.

²⁶Nah, mina mii ngi'u do dho bhule nga henga, do jadhi ta ngi'u do made ke, mina harre lema nga lua manno nga kaho do dho lere ri wui ai-wui tao, do jadhi ta lua manno nga kaho do made.