Read Sabu YAKOBUS 3 Bible Online

YAKOBUS 3 - Sabu bible

YAKOBUS 3

¹Tuahhu-tuahhu! Bhole we ta rihi ae ti telora mu do ddhei ta jadhi guru. Do toi ke ri mu ma, ta do di ne jadhi guru he, do medae ta pereha ne hala di do rihi rui ri ngati ddau do wala he.

²Di hari-hari do jhajhi wari ne tao hala nga ludu. Tapulara ddau do dho ngaddi ta tao hala nga ludu ri kolo lipali-lipedai no, no ddau do keteme ke, do nara ta tahe ke hari heddau ne ngi'u no.

³Ki rape ke ri rapa ne ubha jhara mita ie ke ta pedutu ke ri no ne lua ddhei di, moko ne jara napoanne do nara ke ri ta peato hari hengi'u.

⁴Mii hewue kapa lema, maji lema ta do mina harre ne worawwu worena jhe do aggo ke ri ngallu do dhai maddu, do nara ta kemudhe ri ulu do mina harre ne wonaiki, ta pedute nga lua ddhei mone parru uli.

⁵Mina harre lema nga we'o di; maji lema we'o ta do hemadha naiki, tapulara do nara wue-anni jhara lua-lua do mone-ae. Dhino miha, ta mina mii lema worena hewue jhami, do nara ta tune ri ai do mina harre ne worawwu na iki!

⁶We'o do hela'u ke nga ai. Pa ngi'u di, no ke ne jadhi ta kepue apa nga kerewe do pejhale ne lua apa nga kerewe la hari heddau ne ngi'u di. Ri ai do ti dhara naraka ne, no ke ne do pekappo ladu-ladu hari-hari ne muri mada di.

⁷Hari-hari bhada bhani, do lila, do rodho ri kabu nga nadu'u do nara ta pemabo jhe do alla tarra ke pepemabo ri ddau raiwawa.

⁸Tapulara we'o ddau raiwawa adho do nara ta pemabo ie ta ri heddau he. We'o dhe do apa do kerewe jhe nara dho ta peato, jhe do tobo ri raho do wie lua made mada.

⁹ No, pake ri di tu ta peha'e kolo lii ie-ae pa Muri nga Ama di, tapulara do pake lema ri di ta wie lua unu kolo taddhu pa ddau nga ddau ihi-anga, do alla peworo-pepanynyi nga hia nga wewo Deo.

¹⁰Ngati ubha do naanne lema, mahhu ne kolo lii ie-ae, jhe mina harre lema lii lua-unu kolo taddhu. Do ne pa petu ne adho do mina poharre!

¹¹Era marra made ei-wattu do pewattu ei do meringi nga ei do paddhu; ngati hahhi mada ei-wattu do hela'u ne we?

¹²Kepue kepallu, Tuahhu-tuahhu, nara dho ta wue, wue zaitun, jhe kepue ago nara dho ta wue, wue kepallu. Mada ei-wattu do harro nara dho ta pewattu ei do meringi.

¹³Kinga era pa telora mu do mmau dhara nga do i'a tao ie, do jhamma ke ri ri no ta pedhelo ne muri mada do woie, nga do tao ne lai-lai do woie, do lere ri lua wawa nge danni-ade nga lua uku nga mmau dhara.

¹⁴Tapulara ki do pana dhara mu, do paddha ade, jhe do penge ngi'u miha ke mu, bhole pahe we ne mmau dhara mu do naanne, rowi ri naanne ke ne pepote-pekewarro ri mu ne do petu pe tarra do ngati Deo ne.

¹⁵Lua mmau do mina harre adho do dakka ngati era do mmau do megala ne. Lua mmau dhara do naanne do dakka ngati raiwawa, ngati lua ddhei nge nga ade ddau raiwawa do rihi ngati rupehakku ne, jhe ri do mina harhe ke ngati wango!

¹⁶Pa mii we ne era lua pana dhara nga lua ddhei nga ngi'u miha, pa anne lema ke ne era lua kenya'u nga buluru nga heworawwu-heworawwu wui ai-wui tao do apa do kerewe.

¹⁷Tapulara ne ddau do nga uku nga mmau dhara do dakka ngati dhida nidhe, petari-tari do adho do pehiwo ri do woapa, jhe do ddhei nga lua pedhuri-pemira do kehaka jhe do pedhanno. Do tobo no ri lua dhara, nga do wie ne wue-wue wui ai-wui tao do woie. Adho no do anga jhara he bhakka, nga adho do peuku-uku-anni.

¹⁸Do tarra ta do ne lua do woie ne do dakka ngati wini pedhuri-pemira ne, do kojhe ri ddau-ddau do ddhei nga lua pedhuri-pemira ne!