Read Sabu YAKOBUS 5 Bible Online

YAKOBUS 5 - Sabu bible

YAKOBUS 5

¹Lua pehewina ddau-ddau do kaja! Dhanno ko we ne litakka ya. Do jhamma ke mu ta tangi nga penina noho rowi do medae mu ta dhui hape lua hedui-herui.

² Ne lua kaja nga kete'e mu he do wwau ke. Ne bhara pake mu do nga'a ke ri rurai.

³Ne mela-lara nga mela pudi unu mu he do keboro ke ri rutu, ne rutu ro he do jadhi ke ta hakahi tu ta pelawa nga mu, jhe do medae ke ta nga'a ne ngi'u mu, mii ri ai he. Do alla ke mu peudu nga ra'a ne unu-oha mu pa awe hedhape ne awe pedakka rahi dhe.

⁴ Adho mu do wae ta ma'i ne ihi kehiwa ddau-ddau do jhagga pa maa mu he. Pa awe nadhe dhanno we ri mu ne lipenina noho ro! Ddau-ddau do pemoko ne ihi-habha ngati maa mu he, do peko-peka ke ta ami lua ruba dhara jhe lipeko-peka ro do dhai ke la wodilu Deo, Muri do Mone Rihi Wihi Higa nga pereda ne.

⁵Do muri mada ke mu pa dhara kereja kenata, jhe do narro do lake ke ri mu ne lua mengallu nge nga kehaka dhara pa raiwawa do nadhe. Hala dho mu mii do ta pekebhabbhu-anni he tu ta mate ne awe ta jhue ta kehabbhe ne.

⁶Do wolo do pemade ke ri mu ne ddau-ddau do dho bhule hala nga ludu he, jhe do adho ro do pelawa nga mu.

⁷Rowi do mina harre ke, makka tee nga wangnge we Tuahhu-tuahhu he, tade dhai la awe dakka Muri ne. Heleo we ne lua halla-anni mone jhagga worai wowadu, ne pemata no tade dhai ne worai no ne ta wie ne ihi-habha do nga kebhue tu no. Jhe mina harre lema no ne makka tee nga wangnge, ne mate awe ajjhi pa awe muru rrau nga ajjhi pa awe kehabbha wila.

⁸Do jhamma lema ke mu ta makka tee nga wangnge, jhe nga worena ade, rowi do hedharra ke ne lodho dakka Muri.

⁹Bhole pegu-pegallo jhe dhhei ta nyakka hala ri heddau pa heddau, mita do dho wolo mu ri Deo. Henge we! Ne Mone happo hala ne do hedharra ke, do moko ke No ta dakka.

¹⁰Tuahhu-tuahhu, henge we ne nabi-nabi do pedai lii pa dhara ngara Muri ne. Ro do makka tee jhe do halla-anni ne dhui hape hedui-herui. Hakku pake we ro ta mii telia he.

¹¹ Do pali ke ro ta ddau do mengallu nge nga kehaka dhara rowi do titu halla-anni ro. Do rangnge ke ri mu ma ne jhara lua makka tee Ayub, jhe do toi ke ri mu ma mina mii Muri pa pedakka rahi ne wie ne lua tarro ie nga menyarro mangngi tu no. Rowi Muri do dhai tarra ruba dhara nga do woie ade.

¹² Ne do rihi ketutu, nadhe ke: Bhole dhede lipehupa, ie ta nga ngara liruballa, mina harre lema nga ngara raiwawa, kiadho nga ngara ne nga we. Ta lii he we, ”Tarra” ki nga ne lua pedabbho ne do tarra, jhe ”Adho” ki do ne lua pe dabbho mu ta adho, mita do dho wole mu ri Deo.

¹³Kinga era pa telora mu do era pa dhara hedui, do jhamma ke no ta hebhajha. Kinga era do mengallu dhara, do jhamma ke no ta alo-ree majho koko ta wue waje Deo.

¹⁴ Kinga era do paddha do jhamma ke no ta pedoa kattu-kattu jemaat. Jhe ne kattu-kattu jemaat do na harre do jhamma ke ta hebhajha tu ddau do paddha do naanne jhe pehame ri ei-manynyi pa dhara ngara Muri.

¹⁵Ki do pedhae ke ri ro ne lihebhajha ro nga lua ketarra, do ta peie ma ri Muri ne ddau do paddha do naanne jhe pehai-pehuba ne lubhu harro nga menyilu do tao ri no.

¹⁶Rowi do mina harre ke do jhamma ke mu ta kelole ne hala mu heddau pa heddau jhe hebhajha we mu heddau tu heddau, mita peie mu ngati lua paddha mu. Jhe ne lihebhajha ddau do pedute ne lua ddhei Deo, do nga kuaha do mone-ae.

¹⁷ Elia do hela'u we ta ddau raiwawa mii di lema. Hebhajha no nga petarra-tarra mita do dho puru ajjhi, moko ta do dho puru tarra ma ajjhi ttalu bhue ttau nga hebhakka.

¹⁸ Ta alla pemina harre ta hebhajha ri ke no, moko ta puru ke ajjhi, hakku ta wie ke ri worai ri ne ihi-habha.

¹⁹Tuahhu-tuahhu ya! Kinga era heddau ti telora mu, do adho ke do pedutu ri ne liajha do ngati Deo ne, jhe era heddau do nara ta pebhale ne kattu ddau do naanne la nga Deo,

²⁰ henge ne lilolo do nadhe: Ddau do nara ta pebhale ne kattu heddau do nga lubhu harro nga menyilu ti loro jhara no do hala ne, moko ne ddau do napoanne do pehelame ke ne hemanga ddau do nga lubhu harro nga menyilu do naanne ngati lua made mada je do ae ne lubhu harro nga menyilu no do pehai-pehuba. Lipelangu jhi, Yakobus