Read Sabu 1 PETRUS 4 Bible Online

1 PETRUS 4 - Sabu bible

1 PETRUS 4

¹Taga tari do alla ke Kristus pe dhui-hape hedui-herui pa ngi'u No do ngadde ri namada ne, do jhamma ke mu ta perui-anni ri lua petitu do mina harre le. Rowi ddau do dhui-hape lua hedui-herui pa ngi'u do ngadde ri namada dhe, adho ke do tao lubhu harro nga menyilu ri.

²Rowi do mina harre ke, do jhamma ke mu pa petrue ne muri mada mu pa raiwawa do nadhe pedute nga lua ddhei Deo, jhe adho do pedutu nga lua ddhei ddau raiwawa.

³Pa awe do ludu he do dhai tui ke mu ne tao lai-lai do ddhei ta tao ri ddau-ddau do dho tade Muri. Ne muri mada mu adho do woie. Do pedute ri mu ne lua ddhei nge nga ade mu do rihi ngati rupehakku ne, nginu mawo, tao lai-tao do keruka-kerakki nga lua dhutu liba ila, nginu-nginu nga wie hu nga mejura pa ajhu nga wowadu do pebhege dhara ddau we.

⁴Pa dhara awe nadhe ddau do dho tade Muri, ta madalae ke taga tari do adho ke mu do muri mada do mii ro ri, do ddhei ta kenani pa dhara lubhu harro nga menyilu do dho bhule nga rutie-rutatta ne. Ri do mina harhe ke hakku ta kara ta menihi ke mu ri ro.

⁵Tapulara do medae ma ro ta titu pa hedhapa Deo do moko ke ta happo ne hala ddau do muri nga do made.

⁶Ri do mina harre ke, hakku ne Li Hagha Dhara ne do alle ke pepeke lema pa ddau-ddau do made. Ne pedabbho ne mita ie ke ro do alla ne hala ro he pa dhara lua ngi'u do nadhe — mii lai hari-hari ddau do medae ta pehappo ne hala he — nara ta muri mada pa dharalua do pedu nga Deo.

⁷Hari-hari ne nga we, do hedharre ke ne lua pedakka rahi ne, rowi do mina harre ke do jhamma ke mu ta nara ta tahe ne ngi'u mu, jhe meniga we pewoie-ie mita nara mu ta hebhajha.

⁸ Rihi ngati hari-hari do napoharre, do jhamma ke mu ta petu-petarra ne pehajha-peddhei heddau nga heddau, rowi ri pehajha-peddhei he ke mu heddau nga heddau ne do medae ta nara mu ta pehuba hala heddau ri heddau.

⁹Do jhamma ke mu ta hammi heddau ri heddau la dhara ammu heddau-heddau nga do dho bhule ne lua penina noho.

¹⁰Ri mu heddau-heddau do alla ke pehammi ne lua ruba dhara do pewala-wala ngati Deo. Rowi do mina harre ke, mii mone peato do woie ngati lua ruba dhara Deo do na harre, do jhamma ke mu ta ta pake ne lua rui nga kedi mu do naanne tu lua paralu mu hela'u-la'u.

¹¹Tuddau do pepeke lii ne, do jhamma ke ta pepeke ne lii do ngati Deo ne, ddau do pemoko ddau do wala, do jhamma ke ta pemoko ri lua rui nga kedi do ngati Deo, mita pa dhara hari-hari lai, nara ke ta pekelode Deo do pelake jhara Yesus Kristus. No ke ne do pereda nga do jhamma ta pekelode lohe la lodho do nami mii ne. Amin.

¹²Tuahhu-tuahhu do ddhei ya! Pa dhara awe nadhe, do dhai tarra ke mu ne hedui-herui, rowi do nee ke mu pa dhara nga hakko ko. Tapulara bhole jadhi ta madalae, mii do ta era he hahhi lai do rihi ngati ihi do ta jadhi pa mu.

¹³Ne woie, do jhamma ke mu ta mengallu dhara, rowi do dhui hape hela'u-la'u ke mu nga Kristus. Moko hine, kinga dhai ke ta peteleo ne lua dhida nga kelodo Kristus, do medae ke mu ta mengallu nge nga kehaka dhara.

¹⁴Do mangngi mu kinga kara menihi mu taga tari mu do pedute Kristus. Napoanne ta peteleo ke ta do ne Henga do kelodo ne, Henga Deo, do era pa dhara mu.

¹⁵Bhole era heddau he ti telora mu do dhui hape hedui-herui taga tari no mone pemade ddau, mone mena'o, kiadho mone tao apa nga kerewe; kiadho taga tari do pehiwu lai pa dhara lai ddau do wala.

¹⁶Tapulara kinga dhui hape mu hedui-herui taga ri do Herani mu, bhole mekae mu ri lai do naanne. Peha'e we ri mu ne kolo lii ie-ae pa Deo, taga tari do aggo ngara Kristus ri mu.

¹⁷Do dhai ke ne awe ta happo ne hala raiwawa do nadhe ri Deo. Jhe ne hala annu-niki Deo dhangnge ma ne do ta happo uru jhara. Nah, ki Deo do ta jhari uru jhara ngati di, mina mii ke ne do ta jadhi hine nga ddau-ddau do dho parahajha pa Li Hagha dhara do ngati Deo ne?

¹⁸ Pa dhara Buku Lidara-Likewahhu Deo do hure do bhuke mina hedhe, ”Kinga ddau-ddau do tao lai do woie do hedui lema ke ta pehelama, ne nga ri ke ne do medae ta jadhi nga ddau-ddau do nga lubhu harro nga menyilu do dho tade Muri?”

¹⁹Rowi do mina harre ke, kinga era ne ddau-ddau do dhui hape ne hedui-herui taga tari do mina harre ke ne ddhei Deo, do jhamma ke ne ddau-ddau do na harre ta muri mada nga mola nga mira, jhe jhula we ne ngi'u pa Mone woro-Mone panynyi ro. Ri No do medae ta pee ta petobe loro ne lijaji No.