Read Sabu 1 PETRUS 5 Bible Online

1 PETRUS 5 - Sabu bible

1 PETRUS 5

¹Ne ami ya mita heleo ri mone bhau-bhata jemaat mu. Ne bhuke ri ya ne nadhe mii ihi-anga do hela'u ta mii mone bhau-bhata, jhe mii ddau do alle pe ngadde mina ne lua hedui-herui Kristus, jhe do medae le ta pekelode hela'u, kinga dhai ne awe lua pekelode Kristus ta pengadde pa ddau raiwawa. Ne ame ei ya nga petarra-tarra,

² mita ie ke ri mu ta bhau-ta bhata ne kewolo naki'i do jhula ri Deo he pa mu. Bhau-bhata we ro nga mengallu nge nga kehaka dhara, mina mii ne do ddhei Deo, jhe bhole nga ade do kewai. Jhe bhole jhagge lema ne lua jhagga mu tu ta nara lua mangngi, tapulara taga tari do tarra-tarra mu ne ddhei ta pemoko ro.

³Bhole tao mii do pereda penaja nga ro do alla pejhula pa mu he, tapulara jadhi we ta telia tu ro.

⁴Jhe pa awe dakka Mone bhata Mone-ae ne hine, do medae ke ta hamme ri mu ne labba do weo nga kana ne, do adho ke do medae ta henunu wari ne lua weo nga kana no.

⁵ Mina harre lema Tuahhu, ddau-ddau do ngarru. Pewawa-anni we pa ddau-ddau do rihi pemuri. Tuahhu he hari-hari do jhamma ke ta pewawa-anni jhe pemoko we heddau ri heddau nga wawa nge danni ade. Rowi pa dhara Buku Lidara-Likewahhu Deo do hure do bhuke mina hedhe, ”Deo do ta pelawa penaja nga ddau do wue-anni tapulara do hajha do ddhei nga ddau do wawa nge danni ade.”

⁶ Rowi do mina harre ke, pewawa-anni we la wolaabba Deo do rui ne, mita pedhida mu ri No kinga dhai ke ne awe ne.

⁷Jhole we hari-hari ne lua keba'a-kepapi mu pa Deo, rowi No ke ne do pedhuli nga mu.

⁸Do jhamma ke mu ta meniga pewoie-ie, jhe nga moko-moko we. Rowi Wango do ihi-muhu ihi-lawa mu ne, no do dho hala ke mii hinga do bela la hebhakka-bhakka jhe do nga keau-au ta kale ne nga we ne do ta dalla-ta hobha ri no.

⁹Lawe we no ri lua manno nga kaho do dho i'a kerattu wari ne, rowi do toi ke ri mu ta do ne Tuahhu-tuahhu do Herani hela'u do wala he do pa hari hewue raiwawa do dhui hape hedui-herui mii mu lema.

¹⁰Tapulara ki moko ke mu ne dhui hape hedui-herui pa dhara hemelila he, moko do medae ri Deo miha ta peketeme mu ta jadhi ta do keteme. Do medae ke ri No ta petitu nga ta perui mu, jhe pebharra mu ri No. Rowi No ke ne Deo do dhai tarra ne woie ade, do alla pepedoa mu tu ta hela'u-la'u le ta narro ta lake ne dhida nga kelodo No do peloro ne, do pe lake jhara Kristus ne.

¹¹No ke ne do pereda lohe la lodho do nami mii ne! Amin.

¹² Huri ya do na bhabha nadhe, ne bhuke ri ya tu mu, do ri ruba dhara Silas do ege ke ri ya ta heddau tuahhu do Herani do mappe. Ne ddhei ya ta pedidi mu nga ta peketarra mu ta do ne nga ne do bhuke ri ya dhe, lii do petu-petarra jhara lua ruba dhara Deo ne. Do jhamma ke mu ta parru pebharra pa lua ruba dhara do naanne.

¹³ Ihi anga-ihi anga pa dhara jemaat pa Babilon, do jhujhu do pidhi lema ri Deo, hee do moa lipelangu tu mu, mina harre lema ne ana ddhei ya, Markus.

¹⁴Pelangu we mu heddau nga heddau, nga do tobo ri lua pehajha-peddhei mii do petuahhu he pa dhara Herani. Ki ie mudhe he, Muri ta wie ne lua tarro ie nga menyarro mangngi tu Tuahhu-tuahhu he hari-hari do jadhi ta unu-oha Kristus. Lipelangu jhi, Petrus