Read Sabu 2 PETRUS 1 Bible Online

2 PETRUS 1 - Sabu bible

2 PETRUS 1

¹Tuahhu-tuahhu do tarra-tarra ke ne parahajha do mii jhi le! Yesus Kristus, Deo nga Duae Mone ma'i-Mone golo ne di, do wie ne loro jhara pa di tu ta parahajha pa No, rowi No ke ne do mola do mira. Huri do nadhe ngati Simon Petrus, heddau naannu nga rasul Yesus Kristus.

²Ki ie mudhe he, ta wie ri Deo pa mu ne lua tarro ie nga menyarro mangngi nga lua kehaka dhara do dhai re'a nga lale, rowi do tade ke ri mu, Deo nga Yesus, Muri di.

³Alla ke Deo pe pake ne kuaha No miha tu ta wie pa di hari-hari ne nga we ne do paralu pa lua muri mada ta wie hu nga mejura pa Deo. Ne do tao ri No ne nadhe, do pelake jhara ne nga ne do toi ri di jhara lua Yesus Kristus, do alla pepedoa di tu ta narro — ta lake ne lua bebu nga meragi nga lua woie ade No.

⁴Ri loro jhara do naanne ke, ne wie ri Deo pa di ne lua tarro ie nga menyarro mangngi do rihi nga ihi nga do rihi dhida kebhue do alle pejaje ri No ne. Ri lua tarro ie nga menyarro mangngi do na harre ke ne nara mu ta golo-anni ngati lua ddhei-lua ddhei do woapa he pa raiwawa do nadhe, jhe hamme ri mu ne alu nga hadha do dakka ngati Deo ne.

⁵Rowi do mina harre ke, la'a-rui we mu nga petarra-tarra, mita pee mu nga parahajha pa Kristus, jhe ne lua parahajha mu ne do rabhe ri muri mada do woie. Wala ngati muri mada do woie ne do paralu mu ta jadhi ddau do era nga lua mmau dhara,

⁶jhe do wala ri ngati lua mmau dhara ne do jhamma ke ri mu do nara ta labbe ne ngi'u mu. Jhe ne do wala ri ngati nara ta labbe ngi'u ne, do jhamma lema mu ta petima-anni tu ta makka tee penaja nga hari-hari lai ne nga we. Do wala ri ngati lua makka tee ne, do jhamma lema ke mu ta muri mada pedute nga lua ddhei Deo.

⁷Jhe ti muri mada do pedute lua ddhei Deo ne, do jhamma ke ta penabbo ri lua pehajha-peddhei nga tuahhu-tuahhu do hela'u lua manno nga kaho he, jhe pebhue ri, ri lua pehajha-peddai nga hari-hari ddau.

⁸Hari-hari ne napoharre wue-wue do paralu ke tu mu. Kinga do era ke ne wue do napoharre do re'a do lale pa mu ta mejhanni jhe do nga wue nga wila, jhe tade nga rihi woie ri Yesus Kristus Muri di.

⁹Tapulara ddau-ddau do dho bhule nga wue-wue do mina harre, do kedhaddu ke ne lua penge no, nara dho ke ri no ta heleo nga do ballo ke ri no lubhu harro nga menyilu no do uru he ta do alle ke pepemo.

¹⁰Rowi do mina harre ke Tuahhu-tuahhu, la'a-rui we mu rihi rui ri, mita ne lilangu-lipedoa nga lua jhujhu nga pidhi mu ri Deo ne, ta ju ri ne rui. Ki nga tao ke ri mu ne lai do mina harre, adho ke mu do medae ta kebhatto ri.

¹¹Jhe ki do mina harre ke, do medae ke ta wie pa mu ne higa do tobo tu ta maho la dhara Rae Pereda do peloro ngati Muri nga Duae Mone ma'i-Mone golo di ne, Yesus Kristus.

¹²Rowi do mina harre ke, pee ri ya nga pekebhaddi jhara lua do naanne, maji lema ta do toi ke ri mu ma, jhe do dhai parahajha ke mu pa liajha do ngati Deo do alla pehammi ri mu he.

¹³Pa dhara nga muri mada ko ya, pa penge ya, do jhamma ya ta pehewina mu pa lai-lai do na harre.

¹⁴Rowi do toi ke ri ya ta do adho ke do tui ri, do medae ke ta hane ri ya ne raiwawa do nadhe, ro wi do alle ke pepeke nga teleo-teleo ri Muri di Yesus Kristus pa ya.

¹⁵Moko do ta pee ma ya nga la'a-ruimaji lema ta alle ke ya pemade, do pee ma ri mu nga henge ne lai-lai do na hedhe.

¹⁶Pa awe peke ri jhi pa mu ta do dhai kelodo tarra ne lua dakka Muri di Yesus Kristus, adho jhi do peketoe-anni pa lijawi-lijawi do penahhu ri ddau raiwawa. Lua dhida nga kelodo Kristus do naanne do alle ke pe ngadde ri namada pa kattu jhi miha.

¹⁷ Do era jhi pa ni ta dhai No ta pekerihe nga ta pe kelode ne ri Deo Ama. Pa dhara awe naanne do rangnge ri jhi ne lipedai ngati Do Rihi Wiki Dhida nga Kelodo ne, do pali pa No, ”Nadhe ke ne Ana Ya, Ana hajha nga ddhei ne Ya. No ke ne do pemengallo dhara Ya!”

¹⁸Do rangnge miha ri jhi ne lipedai do naanne do dakka ngati era do mmau do megala ne, pa awe era he jhi hela'u-la'u nga No pa kolo lede do mmau do megala ne.

¹⁹Rowi do mina harre ke ta rihi ri ke ne ketarra pa jhi ne jhara litakka Deo do pepeke ri nabi-nabi he. Ne woie ne, ta dhanno-ta tenae ke ri mu ne li takka do naanne, rowi ne litakka do naanne do mii lapu do kelala he pa era do kerabba tade dhai hape la hhau lodho, jhe mii weo moto mmau-rai he ne kelala pa dhara ade mu.

²⁰Ne do rihi tarra-tarra ri, do jhamma ta henge ri mu ne nadhe: Ne litakka Deo do pedhae ri nabi-nabi he adho do ie tahe pedutu nga lua tada miha.

²¹Rowi, ngaddi dho ne litakka do ngati Deo ne ta pepeke ri lua ddhei ddau raiwawa. Tapulara Henga Deo ke ne do jaga do meniga ddau tu ta la pedhae ne litakka do ngati Deo miha.