Read Sabu 2 PETRUS 2 Bible Online

2 PETRUS 2 - Sabu bible

2 PETRUS 2

¹Pa awe do ludu, pa telora annu-niki Deo he do hhau ke ne nabi-nabi do pote do appi. Mina harre lema hine pa telora mu do medae ta hhau ne guru-guru do pote do appi. Do medae ta pemaho ri ro ne liajha-liajha ro do dho petu he, do ta peapa pekerewe ddau we. Jhe do medae ta pehile ri ro ne Mone Pereda do alla pepeballa kattu ro he. Jhe ri do mina harre ke, do ta pedubhe ke ri ro ne lua apa nga kerewe tu ngi'u ro ma miha, jhe adho ke do tui ri do medae ke ta ma nappi ma kebii ro.

²Maji lema ta mina harre, ae ddau do ta pedutu ne loro jhara muri mada guru-guru dopote do appi do na harre do menya'e ri lua ddhei nge nga ade ro do rihi ti rupehakku he. Jhe ngati wui ai-wui tao guru-guru do na harre do medae ta pejadhi do ae ddau ta kare ta mene Loro Jahara do Mola do Mira ne, ne pedabbho ne do ju la nga Deo ke.

³Taga tari do lala ro, moko ne guru-guru do pote do appi do na harre ta pedhiri ke pa mu ne lipedhiri-lipedhiri do tao ri he ke miha, mita nara ro ne lua mangngi ngati mu. Tapulara ne era happo hala tu ta pebunu ne lua wolo tu ro, do tui ke ne alle pepemoke, jhe ne lua apa nga kerewe ne do alle ke pepetakke tu ro, do nnai ke pa dhara nga mata ro.

⁴Ne naju-naju Deo do tao lubhu harro nga menyilu he, adho do ta hani ri Deo ta peludu ri ngati lua wolo, tapulara do medae ta nabha la dhara rao ai do peloro ne. Do ta pemaho ke ro la dhara ro'a rairoo do kerabba ne, tu ta hani ko pa ni tade dhai ne Lodho Pehappo hala ne.

⁵ Mina harre lema nga raiwawa do pa awe do uru ne, adho no do ta hane ri Deo tu ta ludu ngati lua wolo. Do moe ri Deo ne ei-waa talo-rai ne la rai wawa ddau-ddau do apa do kerewe he pa dhara do naanne. Wata Nuh we, hela'u-la'u nga do pidu ddau do wala he, ne do pehelama, taga tari do pelebe ri Nuh ne lii jhara muri mada do pelatta ne pa dhara Deo.

⁶ Hela'u lema ne lai ne mii rae Sodom nga Gomora; do do peila-lu bolo-janna ri Deo ne rae-rae do na harre ri ai, mita jadhi ta te lia ke, ne jhara lua ne nga we ne do medae ta jadhi pa ddau-ddau do apa do kerewe he.

⁷ Tapulara Lot do pehelame rowi do pedute ri Lot ne lua ddhei Deo; do dhai tarra Lot ne dhui hape hedui-herui ri wui ai-wui tao do apa do kedha dhi ngati ddau-ddau do apa do kedhaha he.

⁸Pa telora ddau-ddau do mina harre ke ne worawwu, Lot do woie do naanne, ne muri mada nga majje ade, rowi he lodho-helodho do ngaddi nga do rangngi ri no wui ai-wui tao do apa do kerewe he.

⁹Hakku, do toi ke ri Muri, mina mii ne pelama ne ddau-ddau do pedute ne lua ddhei No, ki penaja ro nga ruluji ruhakku. Jhe do toi ri Muri mina mii ne takka ne ddau-ddau do apa do kerewe he tu ta wolo pa Lodho Pehappo hala ne,

¹⁰jhe rihi ri tu ddau-ddau do pedutu lua ddhei ro do rihi ngati rupe hakku he, do ra'i do tongo nga do kare do menihe ne lua pereda Deo. Do mina harre ke ne worawwu bhani nga wue-anni ne guru-guru do pote do appi do na harre, hakku bhule le dho ro nga meghighi he ne kara nga menihi ro ne do kemuki do dhida do kelodo do era pa era do mmau do megala ne le ma.

¹¹Jhe ri naju-naju Deo he le ma miha do rihi ri ko ne rui nga kuaha ngati guru-guru do pote do appi he, ngaddi dho ta pewoapa ro do kemuki do na harre ri likara nga menihi pa hedhapa Muri.

¹²Tapulara ne guru-guru do naharre, do dhai tarra! Hala dho ke ro mii bhada addu do kappa jhe tabbhu pemade. Adho ke do penge uru jhara ko ri ro, wata ke ddhei ta tao pedutu nga lua tada ro he ke miha, hakku ta giu-ta waggi ke ne lai-lai do dho toi dae ri ro. Rowi do mina harre ke, ri wui ai-wui tao ro miha, do medae ke ro ta apa ta kedhaha mii bhada-bhada bhani he.

¹³Mii gui-wolo ajhu-wabba taga tari lua hedui-herui do dakka wui ai-wui tao ro he, do medae ke ro ta dhui-hape hedui-herui. Tu ro, ne lai do pemengallo dhara ro, wala dho ke ti tao ne nga we pa awe anni lodho, tu ta petobe ne lua ddhei ngi'u ro. Ki ga mejaddhi ke ro hela'u-la'u nga mu pa dhara lai tao ne wue ro do pebhege dhara ddau, rowi do mawo ro ri lua dhhei nge nga ade ro do rihi ngati rupehakku he.

¹⁴Ngaddi dho ro ta i'a bhenya ne tao lubhu harro nga menyilu jhe ne mengallu dhara ro peketarri nga mobanni do kerejhe we. Jhe ne ddau do ta itu ko ta parahajha jhe adho dae do hole ne ketarra, do ta hii ke ri ro. Ne ade ro do dhai tima ke nga lua lala nga hopa. Ro he, ddau-ddau do nga lua unu kolo taddhe ke!

¹⁵ Rowi adho ke ro do ddhei ta pedutu lo ro jhara do mola, moko ta huli ta teballi he ke ro. Ro he do narru pa loro do narro ri Bileam ana Beor do uru he. Bileam dhe do ddhei tarra ke ta nara doi ngati wui ai do woapa ne.

¹⁶Tapulara do nara no lua pekebhadde do dhai rui penaja nga wui ai-wui tao no do woapa ne, ta dhai ta pedai lii ne keledai no ne mii lipedai ddau raiwawa he. Moko ta pehahhe ke ne nabi do naanne mita pengahe ne wui ai no do kepona do naanne.

¹⁷Guru-guru do pote do appi do na harre, hala dho ke mii mada ei-wattu do kemangu he, jhe do mii buru-rai do hewi'o ri raga nga opo he. Do moko ke ri Deo tu ro ne hahhi era do kerabba-guru-rai.

¹⁸Do tao ri ro ne lijaji-lijaji do manynyi do natta do dho bhule nga ihi, pake ri ro ne lua ddhei do bute ne tu ta pebunu ne ddau do ta itu ta bhale kattu, ngati telora ddau do muri mada pa dhara huli nga teballi.

¹⁹Ne guru-guru do pote do appi he do na harre do jaji ne lua balla kattu pa ddau-ddau do na harre, tapulara ro miha do ujhu do laggu ko ri lua tima-lua tima do peapa ddau raiwawa. Rowi ki jharra ke ddau ri hahhi lai, moko ddau napoanne do jadhi ta annu ke ri lai do pejharre no ne.

²⁰Ddau do tade Muri nga Mone ma'i-Mone golo di ne, Yesus Kristus do balla kattu ke ngati kuaha-kuaha raiwawa do peapa ddau raiwawa. Tapulara kinga alla ke pemina harre, jhe lakka ri no ri hii hewari ri, jhe jharra no ri kuaha-kuaha do na harre, moko ne lua ddau do napoanne pa pedakka ra hi do rihi apa ri ke ngati do uru ne.

²¹Rihi ie ne ddau-ddau do na harre ta do dho ngaddi dae ta tade ne loro jhara do petu do ngati Deo ne, ngati do ta de ke ri ro tapulara pa dhai leto adho do wae ta pedute ri ro ne lipereda-lipereda do wie ri Deo ne pa ro.

²² Ne nga ne do tao ri ro ta peteleo ta do pe tu ne lipepahhi do nadhe, ”Ngaka do nga'a wari ne nga ne do alle pemaddo ri no,” nga ”Wawi do alle pepejhio pemmo, moko do medae bhale wari la bba'i pebhare-gore pa dhara lubhu.”