Read Sabu 1 YOHANES 1 Bible Online

1 YOHANES 1 - Sabu bible

1 YOHANES 1

¹ Ne ihi huri do nadhe jhara lua Lidara do wie muri mada, Lidara do era ke rai ti awe do petari rai. Do alle alle ke ri jhi pedhanno ne jhara lua no, jhe do ngadde ke ri namada jhi miha. Do alle ke ri jhi peketarre no, jhe do alle ke no peparro ri ruai jhi.

² Ta dhai ne muri mada do naanne ta peteleo do ngadde ke ri jhi. Ri do mina harre ke moko ta pepeke ke ri jhi ne jhara lua no. Pepeke ri jhi pa mui ne jhara lua muri mada do petu nga do peloro ne, do era hela'u nga Ama, jhe do alle ke pepeteleo pa jhi.

³Ne nga ne do ngadde nga do dhanno ri jhi, naanne ke ne do pepeke ri jhi pa mu, mita dutu hela'u le mu nga jhi, ta henate ne muri mada do peheujhu-headde nga Ama nga Ana No Yesus Kristus.

⁴Ne bhuki ri jhi ne huri do na hedhe mita ie ke ne adi ta tarra-tarra ne mengallu nge nga kehaka dhara.

⁵Nadhe ke ne lii do dhanno ri jhi ngati Ana No, jhe pedhae ri jhi pa mu; Deo ke ne teleo ne, jhe pa No adho do era tu-tu ne lua kerabba ne.

⁶Kinga lii ke ta di do muri mada do heujhu-headde nga No, jhe moko di do muri mada pa dhara kerabba, moko do pote ke di, ie ta pa kolo lipali lipedai mina harre lema pa dhara wui ai-wui tao.

⁷Tapulara ki do muri mada ke di pa dhara teleo do mina mii Deo do era pa dhara teleo, moko do bharra do kedi'i ke ne muri ma da di, do pedhuri-pemira ke heddau nga heddau, jhe raa Yesus, Ana No ne, do pemmau-pema'i ke di ngati hari-hari lubhu harro nga menyilu di.

⁸Kinga lii ke di ta do dho bhule di nga lubhu harro nga menyilu, di dhangnge ne do pelue ngi'u di miha, jhe adho ke do era pa dhara ade di.

⁹Tapulara ki do kelole mola ke ri di ne lubhu harro nga menyilu di pa Deo, do medae ke ta petobe ri No ne lijaji No nga tao ne do mola-do mira. Do ta pehai-pehuba ri No ne lubhu harro nga menyilu di, jhe lonye pemmau ne ngi'u di ti hari-hari wui ai-wui tao di do hala he.

¹⁰Tapulara ki do lii ke di ta do dho bhule di nga lubhu harro nga menyilu, do ege ke Deo ri di ta do pote jhe adho ke do takke ri ne lipedai Deo pa dhara ade di.