Read Sabu 1 YOHANES 2 Bible Online

1 YOHANES 2 - Sabu bible

1 YOHANES 2

¹Woo ana-ana ya! Ne bhuke ri ya ne nadhe tu mu, mita ie mu ta bhole tao lubhu harro nga menyilu. Tapulara kinga era do tao lubhu harro nga menyilu moko do era ke di nga heddau mone tito di, Yesus Kristus do mola do mira ne, No ke ne Mone ami nga menangngi tu di pa hedhapa Ama.

²Jhe do pelake jhara Yesus Kristus ke, ne pehai-pehuba ne lubhu harro nga menyilu di. Jhe adho ta lubhu harro nga menyilu di he we, tapulara lubhu harro nga menyilu hari-hari ddau raiwawa lema.

³Ki do pedhanno ke di nga lipereda-lipereda Deo, napoanne ke ne telia ta do tade ke Deo ri di.

⁴Ddau do lii, ”Do tade ke Deo ri ya,” tapulara adho do pedhanno nga lipereda-lipereda No, ddau do na poanne do pote, jhe Deo adho do era pa dhara ade no.

⁵Tapulara ddau do pedhanno nga lipedai Deo, ddau napoanne do hajha do ddhei nga keteme pa Deo.

⁶Nadu do lii ta no do muri ma da pa dhara heujhu-headde nga Deo, do jhamma ke no ta muri mada pedute kerak ki Kristus.

⁷ Tuahhu-tuahhu ddhei ya! Ne do bhuke ri ya dhe adho ta hahhi lipereda do wiu. Nadhe lipereda do tui ke, do alle alle ke pepedhae pa mu pa awe ta jhari he ko mu ta parahajha pa Kristus, lii do ngati Deo do alle ke ri mu pedhanno uru jhara.

⁸Maji lema ta mina harre, ne lipereda do bhuke ri ya do nadhe do wiu ko ma; rowi ne petu-petarra no ne do nara ke ta ngadde pa ngi'u Kristus nga pa ngi'u mu ma. Rowi ne lua kerabba ne do ju ke ta ele jhe ne te leo ne do petu ne do jhari ke ta kelaka.

⁹Ddau do lii ta no do era pa dhara teleo, tapulara ne ddau napoanne do pee ma nga takka nui-takka bubu nga tuahhu no, ddau napoanne do pee ko ma pa dhara kerabba lohe ma dhara awe nadhe.

¹⁰Ddau do hajha do ddhei nga tuahhu no, do muri mada pa dhara teleo ke no, hakku bhule dho ke hahhi lai he pa no do ta pebunu ddau do wala la dhara lubhu harro nga menyilu.

¹¹Tapulara ddau do takka nui-takka bubu nga tuahhu no, do era ko no pa dhara kerabba. Do narru pa dhara kerabba ko no, jhe toi dho ri no ta kako ju la mii no, rowi ne ne lua kerabba do naanne do pekerabbe ko ne namada no.

¹²Ne bhuke ri ya tu mu, Ana-ana ya, rowi do alla ke ne lubhu harro nga menyilu mu pepehai-pehuba ri Kristus.

¹³Ne bhuke ri ya tu mu do Ama-ama, rowi do tade ke No ri mu do lore ke peera rai ti petari. Ne bhuke ri ya tu mu Ana-ana do ngarru, rowi do alle ke pepejharre ri mu ne Mone Tao Apa ne.

¹⁴Ne bhuke ri ya tu Ana-ana, rowi do tade ke Deo Ama ri mu. Ne bhuke ri ya tu mu, Ama-ama rowi do tade ke ri mu ne Lidara do rai tare ti petari ne. Ne bhuke ri ya tu mu, Ana-ana do ngarru rowi do rui ke mu. Ne Lipedai Deo do era ke pa dhara ade mu, jhe do alle ke pepejharre ri mu ne Mone Tao Apa ne.

¹⁵Bhole ddhei we nga raiwawa do nadhe, kiadho ie ta ne nga we do era pa raiwawa do nadhe. Ki ddhei mu nga raiwawa do nadhe, moko adho ke mu do ddhei ri nga Ama.

¹⁶Hari-hari ne nga we do era pa danni raiwawa do nadhe — do ddhei ri wue ddau raiwawa do nga lubhu harra nga menyilu ne ke, do ngadde ri namada, do ngadde ri namada jhe ddhei ta unu jhe pehewue-wue ta pekerihe — hari-hari ne napoharre lai-lai do adho ngati Ama, tapulara ngati raiwawa dhe.

¹⁷Raiwawa nga hari-hari do era pa dhara no, do ddhei ri ddau raiwawa, do nee ke pa dhara ta ele. Tapulara ddau do pedute lua ddhei Deo, do ta pemuri mada lohe la lodho do nami mii ne.

¹⁸Woo ana-ana ya, awe pedakka rahi raiwawa do hedharre ke! Do alla ke pepika uru ri ya pa mu ma, ta do medae ta dakka ne ihi Muhu-ihi lawa Kristus; jhe pa dhara awe nadhe, ae ke do hhau ne ddau do pemuhu-pelawa nga Kristus. Napoanne ke ne telia ta do hedharra ke ne awe pedakka rahi raiwawa.

¹⁹Ne ihi muhu-ihi lawa Kristus he, wala dho ke ngati ddau-ddau do alla pehani di he, rowi ro he do ne pa petu ne do adho ma ddau-ddau di. Kita ro ddau-ddau di ma, do tatu ro ta do era ma hela'u-la'u nga di. Tapulara alla ke pehani di ri ro, mita teleo ke ta do dho bhule heddau ti telora ro do tarra-tarra do maho ma kejie di.

²⁰Tapulara do alle ke ri mu pehamme ne Henga Deo do hegute ri Yesus Kristus, jhe ri do mina harre ke, hakku do toi ke ri mu hari-hari ne liajha do petu ne.

²¹Hakku bhuke ri ya ne huri nadhe tu mu adho taga tari do dho toi dae ri mu ne liajha do petu ne, tapulara taga tari do toi ke ri mu, jhe do toi lema ke ri mu ta adho do era ne lua do pote pa dhara liajha do petu do naanne.

²²Ne do pote ne wata ke ddau do pali ta Yesus, adho No Duae Mone ma'i-Mone golo do jaje ri Deo ne. Ddau do naanne ke ne ihi Muhu-ihi lawa Kristus, adho ri no do hamme Ama mina harre lema Ana.

²³Ddau do dho hamme Ana, ne pa petu ne do dho hamme Ama lema ke. Jhe ne ddau do hamme Ana, no do hamme Ama lema ke.

²⁴Rowi do mina harre ke, ne lii do dhanno ri mu ne do rai ti petari ne mu ta parahajha, do jhamma ke ri mu ta jage pewoie-ie pa dhara ade mu. Kinga he leo ri mu pewoie-ie ne liajha do naanne, do medae ke mu ta era loro do muri mada pa dhara heujhu headde nga Ana jhe nga Ama lema.

²⁵Jhe nadhe ke ne do jaje ri Kristus miha pa di; muri mada do petu nga do peloro ne ke.

²⁶Ne bhuke ri ya ne nadhe tu mu jhara lua ddau-ddau do pee nga petadi he ta pelu mu.

²⁷Tapulara jhara lua mu miha, do alle ke ri Kristus pehegute ne Henga No pa mu. Jhe ki do era ko ma ne Henga No pa mu, tenge dho ta era ddau do wala ne do ajha mu. Rowi ri Henga No miha do ta ajha ma mu jhara lua hari hari lai ie ta ne nga we; jhe ne nga ne do ajha ri ri No do petu, adho do po te. Rowi do mina harre ke do jhamma ke mu ta pedhanno nga ne nga ne do ajha ri Henga ne pa mu, jhe do jhamma ke mu ta pee nga muri mada pa peheujhu-headde nga Kristus.

²⁸Ri do mina harre ke, woo ana-ana ya, halla-anni we mu pa dhara muri mada do peheujhu-headde nga Kristus, mita ki dhai hine ta dakka No, nara di ta penaja nga No nga bhani dhallu jhe adho do pewui-wui-anni taga tari do mekae.

²⁹Do toi ke ri mu ma ta Kristus do muri mada pedute nga lua ddhei Deo. Rowi do mina harre ke, do jhamma lema ke ta toi ri mu ta do nadu we do muri ma da nga pedute ne lua ddhei Deo, no ke ana Deo.