Read Sabu 1 YOHANES 3 Bible Online

1 YOHANES 3 - Sabu bible

1 YOHANES 3

¹ Heleo we mina mii ne hajha nga ddhei Deo Nga di, hakku nara di ta hammi ri No ta mii ana-ana ri No. Jhe do tarra ke di ta ana-ana ri Deo. Ri do mina harre ke, hakku tada dho di ri raiwawa do apa do kerewe dhe, rowi adho do tade Deo ri raiwawa dhe.

²Tuahhu-tuahhu do ddhei ri ya! Pa dhara awe nadhe di ana-ana ri Deo ke, tapulara adho dae do teleo ne lua di ta mina mii hine. Maji lema ta mina harre do toi ke ri di, ta do ki dakka ke Kristus, do medae ke di ta jadhi hela'u mii No le, rowi do medae ta ngadde No ri di ta do mina mii ne lua No do petu-tu ne.

³Hari-hari ddau do nga lua henao do na dhe penaja nga Kristus, do ta jage ke ri no ne ngi'u no mita tarra-tarra ta do mmau do megala, do mmau ngati lubhu harro nga menyilu, hela'u le mii Kristus do mmau do megala.

⁴Ddau do tao lubhu harro nga menyilu, do hihu do pagga lipedara Deo ke; rowi lubhu harro nga menyilu, wala dho ke ngati lua hihu nga pagga lai do da re do kewahho ri Deo.

⁵ Do toi ke ri mu ma ta do ne dakka Kristus ne tu ta ma pehai-pehuba lubhu harro nga menyilu ddau raiwawa ke, jhe do adho do era lubhu harro nga menyilu pa No.

⁶Hari-hari ddau do muri mada pa dhara lua heujhu-headde nga Kristus, adho ke no do pee loro nga tao lubhu harro nga menyilu. Ddau do pee loro nga tao lubhu harro nga menyilu, ngaddi dho ta ngadde Kristus kiadho ta tade No.

⁷Woo ana-ana ya, bhole wie ne lua ie ta pa nadu we ta pehuli-peteballi mu. Ddau do jhagge ne lua ddhei Deo, ro ke ne ana ri Deo, mii Kristus lema do Ana Deo.

⁸Tapulara ddau do pee loro nga tao lubhu harro nga menyilu, do ana ri Wango do nga lubhu harro nga menyilu rai tare ti petari. Tu lai do nadhe ke ne dakka Ana Deo, tu ta ma pemae-tebho-ttei ne lua jhagga Wango.

⁹Ddau do jadhi ke ta ana Deo, adho ke no do pee loro nga tao lubhu harro nga menyilu rowi ne alu nga wue Deo miha do era pa no. Jhe taga tari Deo ke ne Ama no, moko nara dho ke no ta pee loro nga tao lubhu harro nga menyilu.

¹⁰Nadhe ke ne lua pewala pa telora ana-ana Deo nga ana-ana Wango, nadu do dho jhagga ne lua ddhei Deo, kiadho do dho hajha do dho ddhei nga tuahhu no, no adho ana Deo.

¹¹ Rai tare ti petari do alle ke pepedhae ne lii do nadhe pa mu: Do jhamma ke di ta pehajha-peddhei heddau nga heddau.

¹² Bhole we di ta mii Kain, do jadhi ta ana Wango nga pemade ne tuahhu no miha. Ta nga hakku pemade ri Kain ne tuahhu no ne? Rowi ne lai-lai do tao ri Kain do hala, tapulara ne lai do tao ri tuahhu no ne do petu.

¹³Rowi do mina harre ke Tuahhu-tuahhu ya, bhole madalae we mu kinga bubu dhara ne ddau-ddau raiwawa dhe nga mu.

¹⁴ Do toi ke ri di ta do di hedhe do alle ke pemahhu anni ngati lua made mada, jhe do lari-anni ke la dhara muri mada. Do toi ke ri di nenaanne, rowi di do pehajha-peddhei di nga tuahhu di. Ddau do dho pehajha-peddhei, do pee ko no pa dha'i pereda made mada.

¹⁵Ddau do bubu dhara nga tuahhu no, do mone pemade ddau no, jhe do toi ke ri mu ma ta do heddau mone pemade ddau adho do era nga muri mada do petu nga do peloro ne.

¹⁶Nga loro jhara do nadhe ke ne nara di ta toi ne loro jhara pehajha peddhei nga ddau nga ddau ihi-anga: Alle ke pejhole ri Kristus ne muri mada No tu di. Rowi do mina harre ke, di lema do jhamma ke ta jhole ne muri mada di tu tuahhu-tuahhu di!

¹⁷Kinga heddau do ne muri mada no do waji ke, jhe ngadde ne tuahhu no do era pa dhara lua dau nga gahara, jhe do dho wae no ta ruba dhara nga tuahhu no do naanne, mina mii ne ddau do naanne ne nara ta pa li ta do hajha do ddhei no nga Deo?

¹⁸Woo ana-ana ya! Bhole we ta pehajha-peddhei pa kuri ubha he we, kiadho ke ta wata pa kolo lipali lipedai he we. Do jhamma ke di ta pehajha-peddhei nga lua hajha nga ddhei do petu-petarra do dute ri wui ai-wui tao di.

¹⁹Mina harre ke ne loro jhara ne mii ta toi ri di ta di hedhe do maho ke ta kejie ana-ana Deo do mola do mira ne, jhe ne ade di do nara ke ta ketanna pa hedhapa Deo.

²⁰Do toi ke ri di, ki do hala ke di ne ane ade di, lua tada Deo do rihi ngati lua tada ade di, jhe do toi ke ri No hari-hari ie ta nenga we.

²¹Hakku Tuahhu-tuahhu ddhei ya, ki do dho hala ke di ne ane ade di, do nara ke di ta mengadha nga Deo nga bhani dhallu.

²²Jhe ne nga ne do ami di ngati No do ta nara di, rowi do pedhanno do nga lipereda-lipereda o jhe jhagge ri di ne nga ne do pemengallo dhara No.

²³ Ne lipereda No pa, nadhe ke: Do jhamma ke di ta parahajha pa Ana No, Yesus Kristus, jhe do jhamma ke di ta pehajha-peddhei heddau nga heddau, mii do alla ke Kristus peli pa di.

²⁴Hari-hari ddau do pedhanno nga lipereda-lipereda Deo, do heujhu headde ke nga Deo ne muri mada ro, jhe Deo do peheujhu-headde ke nga ro. Jhe do toi ke ri di ta Deo do muri mada peheujhu-headde nga di, rowi do wie ke ri No ne Henga No pa di.