Read Sabu 1 YOHANES 4 Bible Online

1 YOHANES 4 - Sabu bible

1 YOHANES 4

¹Tuahhu-tuahhu do ddhei ya! Bhole parahajha we pe hari-hari ddau do mengaku ta do era Henga Deo pa ro, tapulara uji uru ko ro mita toi ne he nga do era pa ro do ngati Deo we do adho. Rowi ae ke ne nabi do pote do appi do bela do lappa la hebhakka-hebhakka ke.

²Mina hedhe ke ne loro jhara mita toi ri mu, Henga Deo we do adho: Ddau do mengaku ta do Yesus Kristus dakka ma raiwawa do nadhe do mii ddau raiwawa, ddau napoanne do nga Henga do dakka ngati Deo.

³Tapulara ne ddau do dho ketarra ne lai do nadhe jhara lua Yesus, adho do nga Henga Deo. Ddau napoanne do nga henga ngati ihi Muhu Kristus. Do rangngi ke tuahhu he ta do ne henga do napoanne do medae ta dakka, jhe pa dhara awe nadhe do hee ke pa danni raiwawa do nadhe.

⁴Tapulara Ana-ana ya, mu do unu-oha ri Deo. Do alla ke ri mu pepejharra ne nabi-nabi do pote do appi do na harre, rowi do era Henga Deo pa dhara mu do rihi rui ngati henga do era pa ddau-ddau do unu ri raiwawa do nadhe.

⁵Ne nabi-nabi do pote do appi do na harre do pedai jhara lai-lai raiwawa dhe, jhe ri raiwawa dhe do dhanno ne lipedai ro, rowi ro do unu-oha ri raiwawa dhe.

⁶Tapulara di do ana-ana ri Deo; jhe ddau do tade Deo do pedhanno nga di. Ddau do adho do unu-oha ri Deo, adho do pedhanno nga lipedai di. Mina harre ke ne loro jhara mita toi ri di ne lua pewala pa telora Henga do wei ne liajha do mola do mira ne nga henga do pehuli-peteballi ddau he.

⁷Tuahhu-tuahhu do ddhei ya! Mai we di ma pehajha peddhei heddau nga heddau rowi ne lua pehajha nga peddhei ne do dakka ngati Deo. Ddau do pehajha-peddhei, do ana-ana ri Deo ke, jhe do tade Deo ke.

⁸Ddau do dho bhule nga lua pehajha-peddhei, adho ddau do tade Deo; rowi Deo ke ne lua pehajha-peddhei ne.

⁹Peteleo ri Deo ta No do hajha-do ddhei nga di nga pepue ne Ana No do Mone Miha ne ma danni raiwawa, mita nara muri mada do pelake jhara Ana No ke do naanne.

¹⁰Na dhe ke ne lua hajha nga ddhei ne: Adho di do alla pehajha-peddhei nga Deo, tapulara Deo ke ne do alla pehajha-peddhai nga di, jhe pepue ne Ana No ne, mita lake jhara No ke, ta nara ke di ne lua pehai-pehuba ngati lubhu harro nga menyilu di.

¹¹Tuahhu-tuahhu do ddhei ya, ki do mina harre ke Deo ne hajha nga ddhei nga di, di lema do jhamma ke ta pehajha-peddhei heddau nga heddau.

¹² Bhule dho heddau he do ngaddi ta ngadde Deo tapulara ki do pehajha-peddhei ke di heddau nga heddau, do peheujhu-headde ke di nga Deo, jhe lua hajha nga ddhei No do keteme ke pa dhara ngi'u di.

¹³Rowi do alla ke pewie pa di ri Deo ne Henga No ne, moko do toi ke ri di ta do muri mada ke di pa dhara heujhu-headde nga Deo, jhe Deo do muri mada peheujhu-headde ke nga di.

¹⁴Ri jhi miha do ngadde ke Ana Deo, jhe pepeke ri jhi ri ta No ke ne do pepue ri Ama tu ta ma jadhi Duae Mone ma'i-Mone gole raiwawa do nadhe.

¹⁵Jhe nadu do ketarra ke ta Yesus ke ne Ana Deo ne, Deo do peheujhu-headde ke nga ddau do napoanne, jhe ddau do napoanne lema do peheujhu-headde ke nga Deo.

¹⁶Ri di miha do toi ke jhe do parahajha ke ne jhara lua hajha nga ddhei Deo ne penaja nga di. Deo ke ne lua hajha nga ddhei ne. Ddau do pereda ri lua hajha nga ddhei ne muri mada no, ddau napoanne do heujhu headde ke nga Deo, jhe Deo do peheuju-headde ke nga no.

¹⁷Do pejadhi ta do keteme ke ne lua hajha nga ddhei pa dhara ngi'u di mita mita era di nga lua bhani-dhallu Lodho Pehappo hala ne. Do bhani ke di, rowi ne muri mada di pa raiwawa do nadhe do hela'u ke mii mu ri mada Kristus.

¹⁸Ddau do narro do lake ke ne lua hajha nga ddhei Deo, adho ke do petada ri nga lua meda'u. Hakku do teleo ke, ne ddau do dho tarra dae ne lua hajha nga ddhei Deo nga keteme, ki do meghighi tarra dae ne lua hajha nga ddhei Deo nga keteme, ki do meghighi meda'u ko no ta he dhape ne Lodho Happo hala ne.

¹⁹Do pehajha-peddhei ke di, rowi Deo do alla ke pahajha-peddhei uru jhara nga di.

²⁰Ki nga lii ke heddau, ”Ya dhe, do hajha do ddhei ke nga Deo,” tapulara adho do hajha nga ddhei nga tuahhu no, ddau na poanne do pote do appi. Rowi ddau do dho hajha do dho ddhei nga tuahhu no do ngadde ri namada, moko bhule dho ke ne rujhara tu no ta nara ta hajha ta ddhei nga Deo do dho ngadde ri namada ne.

²¹Rowi do mina harre ke, nadhe ke ne lipereda do wie ri Kristus pa di: Nadu do hajha do ddhei nga Deo, do jhamma ke ta hajha ta ddhei nga tuahhu no lema.