Read Sabu 1 YOHANES 5 Bible Online

1 YOHANES 5 - Sabu bible

1 YOHANES 5

¹Ddau do parahajha ta do Yesus ke ne Duae Mone ma'i-Mone golo do jaje ri Deo ne, ddau do napoanne ke ana ri Deo. Ddau do hajha do dhhei nga heddau ama, do hajha do ddhei lema ke nga ana no.

²Nga loro jhara do naanne ke ne toi ri di, ta di do hajha do ddhei nga ana-ana Deo: Di do hajha do ddhei ke nga Deo, napoanne ke ne telia ta do pedhanno di nga lipereda-lipereda No.

³ Rowi, hajha-ddhei nga Deo, do ne pa petu ne wala dho ke ngati pedhanno nga lipereda-lipereda No. Jhe ne lipereda-lipereda No. Jhe ne lipereda No adho do mejanni tu di,

⁴rowi nadu we ne ana ri Deo do nara ta pejharre raiwawa do apa do kerewe do nadhe. Jhe ne nara ri di ta pejharre ne raiwawa dhe ri lua manno nga kaho di.

⁵Nadu do nara ta pejharre ne raiwawa do nadhe? Wata ke ri ddau do parahajha ta Yesus ke ne Ana Deo ne.

⁶Yesus Kristus do dakka ma raiwawa dhe nga ei-pejhiu No nga raa lua made No. Ne dakka No adho ke wata ta nga ei-loke he we, tapulara ei-loko nga raa. Jhe Henga Deo miha do wie ne lua ta peteleo ta do ne lai do naanne do petu-petarra, rowi Henga Deo peteleo ta do ne lai do naanne do petu-petarra, rowi Henga Deo adho do ngaddi ta pote.

⁷Era do tallu ne hakahi:

⁸Henga Deo, ei-loko nga raa — ro hari do tallu do wie ne lilolo do hela'u.

⁹Do parahajha do pa lilolo ddau raiwawa, tapulara lilolo Deo do rihi rui ri ko. Jhe naanne ke ne ne li lolo do alle pewie ri Deo jhara lua Ana No.

¹⁰Rowi do mina harre ke ne ddau do parahajha pa Ana Deo, do alle ke ri pehamme ri no ne lilolo do naanne pa dhara ade no, tapulara ddau do dho parahajha pa Deo, do peege ta do pote do appi Deo ri no, rowi do dho parahajha no nga ne nga ne do peke ri Deo jhara lua Ana No ne.

¹¹ Nadhe ke ne lilolo do naanne: Alle ke pewie ri Deo pa di ne muri mada do petu nga do peloro ne, jhe Ana No ke ne muri mada do naanne.

¹²Ddau do hamme Ana Deo, do unu ke ri no ne muri mada do naanne, jhe ddau do dho hamme Ana Deo, bhule dho ddau napoanne nga muri mada do peloro ne.

¹³Bhuke ri ya tu mu do parahajha pa Ana Deo, mita toi ke ri mu ta do unu ke ri mu ne muri mada do petu nga do peloro ne.

¹⁴Jhe do bhani ke di ta la peabu nga Deo rowi do ketarra ke di ta do ta hammi ri No ne lihabhajha di, ki ami ke di ne nga we ne do penau nga lua ddhei No.

¹⁵Rowi do toi ke ri di ta do ne liami di do dhanna ri No, ki ami di pa No, moko ta toi lema ke ri di ta do wie ke ri No pa di ne nga ne do ami ri di nga No.

¹⁶Kinga ngadde ri mu heddau do Herani hela'u do tao lubhu harro nga menyilu do adho do pedakka ta la ele ne muri mada do petu nga do peloro ne, do jhamma ke mu ta hebhajha pa Deo; jhe ri Deo do medae ta wie pa No ne muri mada do naanne. Nadhe do pedu nga ro do tao lubhu harro nga menyilu he, ro do adho do pedakka ta ju la ele he ne muri mada ro do naanne. Tapulara era ne lubhu harro nga menyilu do nara ta peele ne lua muri mada ro do petu nga do peloro ne. Jhara lai do naanne lii dho ya pa mu ta hebhajha pa Deo.

¹⁷Rowi hari-hari wui ai-wui tao do hala, do na poharre ke ne lubhu harro nga menyilu ne, tapulara do era ne lubhu harro nga menyilu do nara ta peele ne muri mada do petu nga do peloro ne.

¹⁸Do toi ke ri di ma ta do hari-hari ddau do jadhi ke ana-ana Deo, adho ke do ta pee loro nga toa lubhu harro nga menyilu, rowi do herimo-heruge ke no ri Ana Deo, jhe ne Mone Tao Apa nga Kerewe ne, nara dho ke ta tao nga-nga ri penaja nga no.

¹⁹Do toi ke ri di ta di do unu do oha ke ri Deo, maji lema hari hewue raiwawa do nadhe do pa dha'i pereda Mone Tao Apa nga Kerewe ne.

²⁰Do toi ke ri di ta do alla ke pedakka Ana Deo, jhe do alla ke pewie ri No ne lua tada pa di, mita ie di ta tade Deo do mola do mira ne. Muri mada di peheujhu-headde nga Ana No Yesus Kristus. Nadhe ke ne Deo do mola do mira ne, jhe nadhe ke ne muri mada do petu nga do peloro ne.

²¹Woo ana-ana ya, pejjhau-anni we ngi'u mu ngati wie hu nga mejura pa ajhu pa wowadu he!