Read Sabu 2 YOHANES 1 Bible Online

2 YOHANES 1 - Sabu bible

2 YOHANES 1

¹Tu Ina do pidhe ri Deo nga tu ana-ana ri Ina. Ne huri do nadhe ngati ya, mone bhau-bata jemaat do ddhei tarra-tarra nga mu. Adho ta ya he we, tapulara hari-hari ddau do tade Deo do mola do mira ne, do hajha do ddhei lema nga mu.

²Rowi Deo do pee ke pa dhara ade di, jhe do medae ta era loro nga di lohe la lodho do nami mii ne.

³Ki ie mudhe he ta wie pa di ne lua tarro ie nga menyarro mangngi nga lua ruba dhara nga lua kehaka dhara ri Deo Ama nga ri Yesus Kristus Ana Ama ne. Ki ie mudhe he hari-hari ne na harre ta unu ta oha ri di nga ade do pudi jhe nga lua hajha nga ddhei.

⁴Dhai mengallu dhara tarra ya ta toi ta do era ne ana-ana ri Ina do muri mada pedutu nga liajha Deo, do hela'u mii lipereda Deo Ama pa di.

⁵ Rowi do mina harre ke, ne ame tarra-tarra ri ya pa Ina, mita ie ke di hari-hari ta pehajha-peddhei. Ne do pedhae ri ya nadhe ke, adho ke ta hahhi lipereda do wowiu ri; ne lipereda do nadhe do alle ke pewie pa di rai ti awe ta jhari ne di ta parahajha.

⁶Pehajha-peddhei wala dho ke ngati muri mada do pedute lipereda-lipereda Deo. Jhe ne lipereda do rangnge ri mu ne rai tare ti petari, do nadhe ke, do jhamma ke mu tamuri mada nga pehajha peddhei heddau nga heddau.

⁷Do ae ke ne mone pote-mone appi do menyabbha ke la hari hewue raiwawa dhe. Ro he, ddau-ddau do dho hammi ta do Yesus Kristus ne dakka ma raiwawa dhe mii heddau ddau raiwawa. Ddau do napoharre, do pote do appi, jhe ihi Muhu-ihi lawa Kristus.

⁸Rowi do mina harre ke, jaga we mita do dho dhai ta ila ne nga ne do la'a-rui ri jhi tu mu. La'a-rui we mita ie ri mu ta hammi ngati Deo, hari-hari ne pai pala mu he.

⁹Ddau do dho parru pa liajha Kristus, tapulara do aggu loro jhara do wala ngati ne nga do ajha ri Kristus, ddau do napoanne adho do era nga Deo. Ddau do halla-anni pa dhara liajha Kristus, do ne pa petu ne do ke ri no Deo Ama mina harre lema Ana.

¹⁰Rowi do mina harre ke, kinga era ddau do dakka jhe pe peke pa mu ne liajha do adho do ajha ri Kristus, bhole hammi ri mu ne ddau do na harre la dhara ammu mu, kiadho ta pelangu ro.

¹¹Rowi ddau do pelangu ne ddau do mina harre, do dutu hela'u le ke nga ddau do na harre pa dhara jhagge ne wui ai-wui tao do apa nga kerewe ne.

¹²Dhai ae ko ne jhamma ta peke ri ya pa mu, tapulara pa dhara penge ya rihi ie ta bhole pelake jhara huri do nadhe. Do henao ri ya ta nara ta la peabu nga mu, jhe pedai lii miha nga mu, mita tobo tarra ne mengallu dhara di.

¹³Ana-ana ngati tuahhu Ina do mobanni ne, do jhudhe do pidhe lema ri Deo, hee do moa lipelangu tu Ina.