Read Sabu 3 YOHANES 1 Bible Online

3 YOHANES 1 - Sabu bible

3 YOHANES 1

¹ Gayus, tuahhu ya! Ya mone bhau-bata jemaat, do hajha-do ddhei tarra-tarra nga au,

²hebhajha ki ie mudhe he tuahhu ta era pa dhara lua kedi-keharru, jhe hari-hari do ie-ie he we nga au, hela'u mii hemanga au lema do ie-ie we.

³Dhai mengallu ne dhara ya, ta dhai ta pika do parri ddau do Herani pa ya, ta do dhai halla-anni tarra tuahhu pa Deo do mola do mira ne, rowi do tarra ma Tuahhu ta do era loro pa dhara muri nga pedute ne liajha Deo.

⁴Bhule dho ke do rihi ri ne pemengallo dhara ya ngati rangngi ta do ne ana-ana ya do muri mada pedutu nga liajha Deo.

⁵Tuahhu ya! Do mina harre ke ne worawwu mappe tuahhu pa dhara lua jhagga do jhagge ri tuahhu, tu ihi anga-ihi anga do Herani hela'u, hape la nga do Herani do dho tada dae lema ri tuahhu, do pemoko le ro ri tuahhu.

⁶Alla ke ri ro pepika pa jemaat do pa era jhi pa dhe, ne jhara lua hajha nga ddhei au. Rabha we ro mita nara ri ro ta pelohe ne loro jhara kako ro, jhe rowi do mina harre ke ne do pemengallo dhara Deo,

⁷rowi pa loro jhara kako ro tu ta pemoke Kristus, adho ro do era ta nara ne nga-nga le ngati ddau-ddau do dho tade Deo.

⁸Rowi do mina harre ke, di ddau-ddau do Herani do jhamma ke ta ruba dhara nga ihi anga-ihi anga di do Herani hela'u do minapoharre, mita nara le di ta dutu pa dhara lua la'a-rui ro, tu ta pemenyabbhe ne liajha do mola do mira do ngati Deo ne.

⁹Alla ke ya pebhuki huri do nabhabha he we tu jemaat, tapulara Diotrefes do ddhei ta jadhi kattu pa dhara jemaat, wae dho no ta pedhanno nga ya.

¹⁰Do medae kinga dakka ya hine, domedae ri ya ta megalli hari-hari ne nga we ne do alla petao ri no, jhara lua apa nga kerewe nga pote-appi do alla pepale ri no jhara lua jhi. Tapulara hari-hari ne napoharre waji de dho tu no. Ta dhai ta dakka ne ihi anga-ihi anga do Herani hela'u he, wae dho no ta hammi ne tuahhu do na harre. Rihi ri ko ti naanne, labba ri ko ri no ne ddau-ddau do ddhei ta hammi ne tuahhu do na harre, jhe lii no pa ddau-ddau do na harre ta mahhu-anni ngati jemaat.

¹¹Tuahhu-tuahhu ddhei ya, bhole pedute ne nga ne do woapa. Pedutu we ne nga ne do woie. Ddau do tao lai do woie, ro ke ne do unu do oha ri Deo. Jhe ddau do tao lua do apa nga kerewe, adho dae ddau do tade Deo.

¹²Hari-hari ddau do puji Demetrius. Rihi ri ko, ri Deo le miha do puji no. Ri jhi lema do puji no, jhe do toi ke ri tuahhu ma, ta do ne nga we ne do pedhae ri jhi do nara ke ta parahajha.

¹³Dhai ae ko ne paralu ta pedhae ri ya pa mu, tapulara pa penge ya rihi ie ta bhole jhara huri dhe.

¹⁴Ne henao ri ya adho ke do tui ri do medae ke ya ta la peabu nga mu jhe medae di ta pedai lii penaja hedhapa heddau nga heddau.

¹⁵Ki ie mudhe he ta wie ri Muri ne lua tarro ie nga menyarro mangngi tu Tuahhu. Ihi anga-ihi anga au pa era ya pa dhe, hee do moa lipelangu tu mu. Pedhae lipelangu ya pa ihi anga-ihi anga di he ti heddau la heddau.